ಕ್ವಾರಂಟೈನ್​ನಲ್ಲಿ ಉಳಿದ ಪಿವಿ ಸಿಂಧು

ಹೈದರಾಬಾದ್: ಇಂಗ್ಲೆಂಡ್​ನ ಬರ್ವಿುಂಗ್​ಹ್ಯಾಂನಲ್ಲಿ ನಡೆದ ಆಲ್ ಇಂಗ್ಲೆಂಡ್ ಬ್ಯಾಡ್ಮಿಂಟನ್ ಟೂರ್ನಿಯಲ್ಲಿ ಆಡಿದ ಬಳಿಕ ತವರಿಗೆ ವಾಪಸಾಗಿರುವ ಸ್ಟಾರ್ ಷಟ್ಲರ್ ಪಿವಿ ಸಿಂಧು ಕ್ವಾರಂಟೈನ್​ನಲ್ಲಿ (ಎಲ್ಲರ ಸಂಪರ್ಕದಿಂದ ದೂರ) ಉಳಿಯಲು ನಿರ್ಧರಿಸಿದ್ದಾರೆ. ಸಿಂಧು ತರಬೇತಿ ಪಡೆಯುತ್ತಿರುವ ಸಾಯ್-ಗೋಪಿಚಂದ್ ಬ್ಯಾಡ್ಮಿಂಟನ್ ಅಕಾಡೆಮಿಯನ್ನು ಕರೊನಾ ಭೀತಿಯಿಂದ ಈಗಾಗಲೇ ಅನಿರ್ದಿಷ್ಟಾವಧಿಗೆ ಮುಚ್ಚಲಾಗಿದೆ. ತೆಲಂಗಾಣ ಸರ್ಕಾರ ಕೂಡ ಮುನ್ನೆಚ್ಚರಿಕೆ ಕ್ರಮವಾಗಿ ರಾಜ್ಯಾದ್ಯಂತ ಕ್ರೀಡಾ ಚಟುವಟಿಕೆ ಸ್ಥಗಿತಗೊಳಿಸಿದೆ.

ಈ ಕುರಿತು ಪ್ರತಿಕ್ರಿಯಿಸಿರುವ ಪಿವಿ ಸಿಂಧು ತಂದೆ ರಮಣ, ಒಂದು ವಾರದ ಬಳಿಕ ಪರಿಸ್ಥಿತಿ ಅವಲೋಕಿಸಿ ಸಿಂಧು ಅಭ್ಯಾಸ ಶುರು ಮಾಡಲಿದ್ದಾರೆ. ಅಭ್ಯಾಸ ಆರಂಭಿಸದಿದ್ದರೆ, ಒಲಿಂಪಿಕ್ಸ್ ಸಿದ್ಧತೆ ಕಷ್ಟವಾಗುತ್ತದೆ. ಈ ಮಹಾಕೂಟಕ್ಕೆ ನಾಲ್ಕು ತಿಂಗಳಷ್ಟೇ ಬಾಕಿ ಉಳಿದಿದೆ’ ಎಂದಿದ್ದಾರೆ. ‘ಕ್ರೀಡಾ ಸಚಿವರೇ ಅಭ್ಯಾಸ ನಡೆಸಲು ಸೂಚಿಸಿದ್ದು, ಈ ಕುರಿತು ಸಂಬಂಧಪಟ್ಟವರೊಂದಿಗೆ ಚರ್ಚೆ ನಡೆಸಲಾಗುವುದು’ ಎಂದು ರಮಣ ತಿಳಿಸಿದ್ದಾರೆ. -ಏಜೆನ್ಸೀಸ್

ವಿದೇಶದಿಂದ ಮರಳಿದ ಎಲ್ಲ ಕ್ರೀಡಾಪಟುಗಳಿಗೆ ಕ್ವಾರಂಟೈನ್

ಕೊವಿಡ್-19 ಪೀಡಿತ ದೇಶಗಳಿಂದ ತವರಿಗೆ ಮರಳುವ ಎಲ್ಲ ಕ್ರೀಡಾಪಟುಗಳಿಗೆ ಕ್ವಾರಂಟೈನ್ ಕಡ್ಡಾಯ ಎಂದು ಕ್ರೀಡಾ ಸಚಿವ ಕಿರಣ್ ರಿಜಿಜು ತಿಳಿಸಿದ್ದಾರೆ. ಚೀನಾ, ದಕ್ಷಿಣ ಕೊರಿಯಾ, ಇರಾನ್, ಇಟಲಿ, ಸ್ಪೇನ್, ಫ್ರಾನ್ಸ್, ಜರ್ಮನಿ ಮತ್ತಿತರ ದೇಶಗಳಿಂದ ಮರಳಿದ ಇತರರಿಗೆ ಇರುವ ಕಡ್ಡಾಯ ಐಸೋಲೇಶನ್​ನಂಥ ಮಾರ್ಗಸೂಚಿಗಳನ್ನು ಕ್ರೀಡಾಪಟುಗಳೂ ಪಾಲಿಸಬೇಕೆಂದು ತಿಳಿಸಿದ್ದಾರೆ. ಕ್ರೀಡಾಕೂಟ ಗಳು ಮತ್ತು ತರಬೇತಿ ಮತ್ತಿತರ ಕ್ರೀಡಾ ಚಟುವಟಿಕೆ ಗಳಲ್ಲಿ ತೊಡಗಿದ್ದ ದೇಶದ ಹೆಚ್ಚಿನ ಕ್ರೀಡಾಪಟುಗಳು ಈಗ ತವರಿಗೆ ಮರಳುತ್ತಿದ್ದಾರೆ. ಅವರಲ್ಲಿ ಕುಸ್ತಿಪಟು ವಿನೇಶ್ ಪೋಗಟ್, ಜಾವೆಲಿನ್ ಥ್ರೋಪಟು ನೀರಜ್ ಚೋಪ್ರಾ ಪ್ರಮುಖರು.

https://www.vijayavani.net/4th-death-in-india-for-coronavirus/