ಕೊಹ್ಲಿ ಆ ರೀತಿ ಅಂದುಕೊಂಡು ಆಡಿದ್ದರಿಂದಲೇ ಬೇಗ ಔಟಾದ್ರು: ಅಚ್ಚರಿ ಹೇಳಿಕೆ ನೀಡಿದ ಮೊಹಮ್ಮದ್ ಕೈಫ್! Virat Kohli

Virat Kohli : ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಸ್ಟಾರ್ ಬ್ಯಾಟ್ಸ್‌ಮನ್ ವಿರಾಟ್ ಕೊಹ್ಲಿ ಪ್ರಸಕ್ತ ಐಪಿಎಲ್ ಋತುವಿನಲ್ಲಿ ರನ್ ಗಳಿಸಲು ಕೊಂಚ ಕಷ್ಟಪಡುತ್ತಿದ್ದಾರೆ. ಶುಕ್ರವಾರ (ಏಪ್ರಿಲ್​ 18) ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಪಂಜಾಬ್ ಕಿಂಗ್ಸ್ ವಿರುದ್ಧ ನಡೆದ ಪಂದ್ಯದಲ್ಲೂ ಕೊಹ್ಲಿ ವಿಫಲರಾದರು. ಅನುಭವಿ ಆಟಗಾರ ಅರ್ಷದೀಪ್​ ಸಿಂಗ್ ಬೌಲಿಂಗ್‌ನಲ್ಲಿ ಔಟಾದ ಕೊಹ್ಲಿ, ಕೇವಲ ಮೂರು ಎಸೆತಗಳನ್ನು ಎದುರಿಸಿ ಒಂದು ರನ್ ಗಳಿಸಿದರು. ಈ ಹಿನ್ನೆಲೆಯಲ್ಲಿ ಅವರ ಬ್ಯಾಟಿಂಗ್ ಶೈಲಿಗೆ ಭಾರಿ ಟೀಕೆಗಳು ವ್ಯಕ್ತವಾಗುತ್ತಿವೆ.

ಪಂಜಾಬ್ ವಿರುದ್ಧದ ಪಂದ್ಯದಲ್ಲಿ ಕೊಹ್ಲಿ ನಿರ್ಲಕ್ಷ್ಯದ ಶಾಟ್ ಹೊಡೆದು ಪೆವಿಲಿಯನ್ ತಲುಪಿದರು ಎಂದು ಟೀಮ್ ಇಂಡಿಯಾದ ಮಾಜಿ ಆಟಗಾರ ಮೊಹಮ್ಮದ್ ಕೈಫ್ ಹೇಳಿದ್ದಾರೆ. ಕೊಹ್ಲಿ ಇದನ್ನು 6 ಓವರ್‌ಗಳ ಪಂದ್ಯ ಎಂದು ಭಾವಿಸಿ, ಮೊದಲ ಎಸೆತದಿಂದಲೇ ಸ್ಫೋಟಕ ಬ್ಯಾಟಿಂಗ್‌ಗೆ ಇಳಿದಿದ್ದರಿಂದ ಅವರು ಔಟ್ ಆದರು ಎಂದು ಕೈಫ್​ ಟೀಕಿಸಿದ್ದಾರೆ.

ಸಾಮಾನ್ಯವಾಗಿ ಕೊಹ್ಲಿ 20 ಓವರ್‌ಗಳ ಪಂದ್ಯದಲ್ಲಿ ಇಂತಹ ಹೊಡೆತಗಳನ್ನು ಆಡುವುದಿಲ್ಲ. ಇದು 14 ಓವರ್‌ಗಳ ಪಂದ್ಯವಾದ್ದರಿಂದ, ಕೊಹ್ಲಿ ಮೊದಲ ಎಸೆತದಿಂದಲೇ ಹೊಡೆಯಲು ಬಯಸಿದ್ದರು. ಅವರು ಸ್ವಲ್ಪ ಸಮಯ ತೆಗೆದುಕೊಂಡು ಇಂತಹ ಕಠಿಣ ಪಿಚ್‌ನಲ್ಲಿ ಆಡಿದ್ದರೆ ಉತ್ತಮವಾಗಿತ್ತು. ಕೊಹ್ಲಿ ಕನಿಷ್ಠ 5 ಎಸೆತಗಳವರೆಗೆ ತಾಳ್ಮೆಯಿಂದಿರಬೇಕಿತ್ತು. ಆ ಬಳಿಕ ಆಕ್ರಮಣಕಾರಿಯಾಗಿ ಆಡಿದ್ದರೆ ಉತ್ತಮವಾಗಿತ್ತು. ಆದಾಗ್ಯೂ, ಕೊಹ್ಲಿ ಈ ಪಂದ್ಯವನ್ನು 6 ಓವರ್‌ಗಳ ಪಂದ್ಯವೆಂದು ಪರಿಗಣಿಸಿದರು. ಅದಕ್ಕಾಗಿಯೇ ಅವರು ಕೆಟ್ಟ ಹೊಡೆತವನ್ನು ಆಡಿ ಔಟಾದರು ಎಂದು ಕೈಫ್ ಹೇಳಿದರು.

ಇದನ್ನೂ ಓದಿ: ಮಾಜಿ ಡಾನ್​ ಮುತ್ತಪ್ಪ ರೈ ಪುತ್ರನ ಮೇಲೆ ನಡೆದ ಗುಂಡಿನ ದಾಳಿಗೆ ಕಾರಣವೇನು? ಆಘಾತಕಾರಿ ಮಾಹಿತಿ ಬಹಿರಂಗ! Muttappa Rai

ಅಂದಹಾಗೆ ಮಳೆ ಅಡ್ಡಿಪಡಿಸಿದ ಕಾರಣ ಪಂದ್ಯವನ್ನು 14 ಓವರ್‌ಗಳಿಗೆ ಇಳಿಸಲಾಯಿತು. ಮೊದಲು ಬ್ಯಾಟಿಂಗ್ ಮಾಡಿದ ಬೆಂಗಳೂರು 14 ಓವರ್‌ಗಳಲ್ಲಿ 9 ವಿಕೆಟ್‌ಗಳ ನಷ್ಟಕ್ಕೆ 95 ರನ್ ಗಳಿಸಿತು. ನಂತರ 96 ರನ್‌ಗಳ ಗುರಿಯನ್ನು ಬೆನ್ನಟ್ಟಿದ ಪಂಜಾಬ್ 12.1 ಓವರ್‌ಗಳಲ್ಲಿ 5 ವಿಕೆಟ್‌ಗಳ ನಷ್ಟಕ್ಕೆ ಗುರಿಯನ್ನು ತಲುಪಿತು.

ಈ ಸೀಸನ್​ನಲ್ಲಿ ಇಲ್ಲಿಯವರೆಗೆ ಕೊಹ್ಲಿ 7 ಪಂದ್ಯಗಳಲ್ಲಿ 49.80 ಸರಾಸರಿ ಮತ್ತು 141.47 ಸ್ಟ್ರೈಕ್ ರೇಟ್‌ನಲ್ಲಿ 249 ರನ್ ಗಳಿಸಿದ್ದಾರೆ, ಇದರಲ್ಲಿ ಮೂರು ಅರ್ಧಶತಕಗಳು ಸೇರಿವೆ. (ಏಜೆನ್ಸೀಸ್​)

https://www.vijayavani.net/mother-of-four-elopes-with-daughters-father-in-law-in-up

https://www.vijayavani.net/rcb-vs-pbks-same-scene-repeated-after-18-years-its-strange-why-are-you-so-afraid-of-virat-kohli