ರಜತ್​ ಪಾಟಿದಾರ್​ ನಾಯಕತ್ವ ವಿರುದ್ಧ ಬೇಸರಗೊಂಡ್ರಾ ಕೊಹ್ಲಿ? ಡಿಕೆ ಬಳಿ ವಿರಾಟ್​ ಹೇಳಿದ್ದೇನು? RCB vs DC

RCB vs DC : ಪ್ರಸಕ್ತ ಐಪಿಎಲ್ ಆವೃತ್ತಿಯಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ಮತ್ತೊಂದು ಸೋಲನ್ನು ಅನುಭವಿಸಿದೆ. ಗುರುವಾರ (ಏಪ್ರಿಲ್​ 10) ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ರಜತ್​ ಪಾಟಿದಾರ್​ ಸೇನೆ ಆರು ವಿಕೆಟ್‌ಗಳ ಸೋಲು ಕಂಡಿತು. ತಂಡದ ವೈಫಲ್ಯವು ಅವರ ತವರು ಮೈದಾನವಾದ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಕಹಿ ಅನುಭವ ನೀಡಿದೆ.

ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ಆರ್‌ಸಿಬಿ ಉತ್ತಮ ಆರಂಭವನ್ನು ಪಡೆದುಕೊಂಡಿತು. ಪವರ್‌ಪ್ಲೇನಲ್ಲಿ ಉತ್ತಮ ಸ್ಕೋರ್ ಗಳಿಸಿದರೂ, ಸತತವಾಗಿ ವಿಕೆಟ್‌ಗಳನ್ನು ಕಳೆದುಕೊಂಡು ತಂಡವು ಸಂಕಷ್ಟಕ್ಕೆ ಸಿಲುಕಿತು. ಆರಂಭಿಕರಾದ ಫಿಲ್ ಸಾಲ್ಟ್ (17 ಎಸೆತಗಳಲ್ಲಿ 37 ರನ್​) ಉತ್ತಮ ಆರಂಭ ನೀಡಿದರು. ಆದರೆ, ರನ್​ಔಟ್​ ಆಗಿದ್ದು ಆರ್​ಸಿಬಿ ಅಭಿಮಾನಿಗಳಿಗೆ ಬೇಸರ ತರಿಸಿತು. ವಿರಾಟ್ ಕೊಹ್ಲಿ (14 ಎಸೆತಗಳಲ್ಲಿ 22 ರನ್) ಮತ್ತು ನಾಯಕ ರಜತ್ ಪಾಟಿದಾರ್ (25) ನಿರೀಕ್ಷಿತ ಪ್ರದರ್ಶನ ನೀಡಲಿಲ್ಲ. ದೇವದತ್ ಪಡಿಕ್ಕಲ್ (1), ಲಿಯಾಮ್ ಲಿವಿಂಗ್‌ಸ್ಟೋನ್ (4) ಮತ್ತು ಜಿತೇಶ್ ಶರ್ಮಾ (3) ಸಂಪೂರ್ಣ ವಿಫಲರಾದರು. ಕೊನೆಯಲ್ಲಿ, ಟಿಮ್ ಡೇವಿಡ್ (20 ಎಸೆತಗಳಲ್ಲಿ 37 ರನ್) ಸ್ವಲ್ಪ ವೇಗವಾಗಿ ಆಡಿದರು. ಆರ್‌ಸಿಬಿ ನಿಗದಿತ 20 ಓವರ್‌ಗಳಲ್ಲಿ ಏಳು ವಿಕೆಟ್‌ಗಳ ನಷ್ಟಕ್ಕೆ 163 ರನ್ ಗಳಿಸಿತು. ಸತತ ಗೆಲುವಿನೊಂದಿಗೆ ಒಳ್ಳೆಯ ಲಯದಲ್ಲಿರುವ ದೆಹಲಿ, 17.5 ಓವರ್‌ಗಳಲ್ಲಿ ಕೇವಲ ನಾಲ್ಕು ವಿಕೆಟ್‌ಗಳನ್ನು ಕಳೆದುಕೊಂಡು ಅರ್​ಸಿಬಿ ನೀಡಿದ ಗುರಿಯನ್ನು ತಲುಪಿತು.

ತವರು ಮೈದಾನದಲ್ಲಿ ಕೆಎಲ್ ರಾಹುಲ್ ಅತ್ಯುತ್ತಮ ಇನ್ನಿಂಗ್ಸ್ (53 ಎಸೆತಗಳಲ್ಲಿ ಅಜೇಯ 93 ರನ್) ಮೂಲಕ ದೆಹಲಿಯನ್ನು ಗೆಲುವಿನತ್ತ ಕೊಂಡೊಯ್ದರು. ಉಳಿದವರಲ್ಲಿ ಟ್ರಿಸ್ಟಾನ್ ಸ್ಟಬ್ಸ್ (23 ಎಸೆತಗಳಲ್ಲಿ ಅಜೇಯ 38 ರನ್) ಗಮನ ಸೆಳೆದರು.

ಆರ್‌ಸಿಬಿ ಬೌಲರ್‌ಗಳಲ್ಲಿ, ಭುವನೇಶ್ವರ್ ಕುಮಾರ್ (2/26) ಮತ್ತು ಸುಯೇಶ್ ಶರ್ಮಾ (1/25) ಉತ್ತಮ ಪ್ರದರ್ಶನ ನೀಡಿದರು. ಆದರೆ, ಜೋಶ್ ಹ್ಯಾಜಲ್‌ವುಡ್ ಮತ್ತು ಯಶ್ ದಯಾಳ್​ ಹೇರಳವಾಗಿ ರನ್ ನೀಡಿದರು. ಹ್ಯಾಜಲ್‌ವುಡ್ ಮೂರು ಓವರ್‌ಗಳಲ್ಲಿ 40 ರನ್‌ಗಳನ್ನು ನೀಡಿದರೆ, ದಯಾಳ್​ 3.5 ಓವರ್‌ಗಳಲ್ಲಿ 45 ರನ್‌ಗಳನ್ನು ನೀಡಿದರು.

ವಿರಾಟ್ ಕೊಹ್ಲಿ ಕೋಪ

ದೆಹಲಿಯ ಅಗ್ರ ಕ್ರಮಾಂಕದ ಫಾಫ್ ಡುಪ್ಲೆಸಿಸ್ (2), ಜೇಕ್ ಫ್ರೇಸರ್ ಮಗಾರ್ಕ್ (7), ಮತ್ತು ಅಭಿಷೇಕ್ ಪೊರೆಲ್ (7) ಅವರನ್ನು ಬೇಗನೆ ಪೆವಿಲಿಯನ್‌ಗೆ ಕಳುಹಿಸಲಾಯಿತು. ಆದರೆ, ಆರ್‌ಸಿಬಿಗೆ ಯಾವುದೇ ಪ್ರಯೋಜನವಾಗಲಿಲ್ಲ. ಮಧ್ಯಮ ಮತ್ತು ಕೊನೆಯ ಓವರ್‌ಗಳಲ್ಲಿ ಆರ್‌ಸಿಬಿ ಬೌಲರ್‌ಗಳ ವೈಫಲ್ಯದಿಂದಾಗಿ ಪಂದ್ಯ ಹಾಳಾಯಿತು. ಆರ್‌ಸಿಬಿ ಸೂಪರ್‌ಸ್ಟಾರ್ ವಿರಾಟ್ ಕೊಹ್ಲಿ ಈ ವಿಷಯದಲ್ಲಿ ತಮ್ಮ ಕೋಪವನ್ನು ವ್ಯಕ್ತಪಡಿಸಿದರು.

ದೆಹಲಿ ತಂಡದ ಇನ್ನಿಂಗ್ಸ್‌ನ 15ನೇ ಓವರ್‌ನಲ್ಲಿ ಜೋಶ್ ಹ್ಯಾಜಲ್‌ವುಡ್ 22 ರನ್‌ಗಳನ್ನು (4,4,2,2,4,6) ನೀಡಿದಾಗ, ಬೌಂಡರಿ ಲೈನ್‌ನಲ್ಲಿ ತಮ್ಮ ಬ್ಯಾಟಿಂಗ್ ಕೋಚ್ ದಿನೇಶ್ ಕಾರ್ತಿಕ್ ಬಳಿ ಬಂದು ಕೊಹ್ಲಿ ಅಸಮಾಧಾನ ವ್ಯಕ್ತಪಡಿಸಿದರು. ತಮ್ಮ ಆಟಗಾರರ ಕಡೆಗೆ ಕೈ ತೋರಿಸಿ, ಬೌಲರ್‌ಗಳು ಮತ್ತು ಫೀಲ್ಡಿಂಗ್ ಸೆಟಪ್ ಸರಿಯಾಗಿಲ್ಲ ಎಂಬಂತೆ ಅವರು ತಮ್ಮ ಅಸಹನೆಯನ್ನು ವ್ಯಕ್ತಪಡಿಸಿದರು.

ನಾಯಕನೊಂದಿಗೆ ಮಾತನಾಡಬೇಕಿತ್ತು!

ಇದರ ದೃಶ್ಯಗಳು ವೈರಲ್ ಆಗುತ್ತಿದ್ದಂತೆ, ನಾಯಕ ರಜತ್ ಪಾಟಿದಾರ್ ಅವರ ನಿರ್ಧಾರದ ಬಗ್ಗೆ ಅತೃಪ್ತಿಯಿಂದ ಕೊಹ್ಲಿ ಹೀಗೆ ಮಾಡಿದ್ದಾರೆ ಎಂಬ ಕಾಮೆಂಟ್‌ಗಳು ಬರುತ್ತಿವೆ. ಘಟನೆಯ ಸಮಯದಲ್ಲಿ ಹಿಂದಿ ಕಾಮೆಂಟರಿ ಮಾಡುತ್ತಿದ್ದ ಮಾಜಿ ಭಾರತೀಯ ಕ್ರಿಕೆಟಿಗ ಆಕಾಶ್ ಚೋಪ್ರಾ, ಅವರು ದಿನೇಶ್ ಕಾರ್ತಿಕ್ ಅವರೊಂದಿಗೆ ಗಂಭೀರ ಚರ್ಚೆ ನಡೆಸುತ್ತಿದ್ದರು. ವಾಸ್ತವವಾಗಿ, ನಾಯಕ ರಜತ್ ಪಾಟಿದಾರ್ ಅವರೊಂದಿಗೆ ಮಾತನಾಡಬೇಕಿತ್ತು. ರಜತ್ ಈ ತಂಡದ ನಾಯಕ. ಆದ್ದರಿಂದ, ದಿನೇಶ್ ಕಾರ್ತಿಕ್ ಅವರೊಂದಿಗೆ ಮಾತನಾಡುವ ಬದಲು, ವಿರಾಟ್ ಕೊಹ್ಲಿ ರಜತ್ ಅವರೊಂದಿಗೆ ಮಾತನಾಡಿದ್ದರೆ ಉತ್ತಮವಾಗುತ್ತಿತ್ತು ಎಂದು ಅವರು ಹೇಳಿದರು. ಮತ್ತೊಂದೆಡೆ, ವೀರೇಂದ್ರ ಸೆಹ್ವಾಗ್, ಜೋಶ್ ಹ್ಯಾಜಲ್‌ವುಡ್ 22 ರನ್‌ಗಳನ್ನು ಬಿಟ್ಟುಕೊಟ್ಟ ಕಾರಣ ವಿರಾಟ್ ಕೊಹ್ಲಿ ಕೋಚ್ ಜೊತೆ ಈ ಬಗ್ಗೆ ಚರ್ಚಿಸಿರಬೇಕು ಎಂದು ಹೇಳಿದರು. (ಏಜೆನ್ಸೀಸ್​)

https://www.vijayavani.net/rcb-vs-dc-kl-rahuls-emotional-comments-after-victory-over-bangalore

https://www.vijayavani.net/kunal-kamra-turns-down-offer-to-be-part-of-salman-khans-bigg-boss-rather-check-into-a-mental-hospital