ಆರ್​ಸಿಬಿ ತಂಡದ ಹೊಸ ನಾಯಕನ ಹೆಸರು ಇಂದು ಘೋಷಣೆ; ರೇಸ್​ನಲ್ಲಿದ್ದಾರೆ ಇಬ್ಬರು ಬ್ಯಾಟರ್ಸ್​​!

ಬೆಂಗಳೂರು: ಮುಂಬರುವ ಐಪಿಎಲ್​ 18ನೇ ಆವೃತ್ತಿಗೆ ಆರ್​ಸಿಬಿ ತಂಡದ ನಾಯಕನ ಹೆಸರು ಗುರುವಾರ ಬೆಳಗ್ಗೆ 11.30ಕ್ಕೆ ಘೋಷಣೆಯಾಗಲಿದೆ. ವಿರಾಟ್​ ಕೊಹ್ಲಿ ಮತ್ತೆ ಆರ್​ಸಿಬಿ ನಾಯಕರಾಗುವರು ಎನ್ನಲಾಗುತ್ತಿದೆ. ಜತೆಗೆ ರಜತ್​ ಪಾಟೀದಾರ್​ ಹೆಸರೂ ನಾಯಕನ ಸ್ಥಾನಕ್ಕೆ ಮುಂಚೂಣಿಯಲ್ಲಿದೆ. ಕೊಹ್ಲಿ ಈ ಮುನ್ನ 2013ರಿಂದ 2021ರವರೆಗೆ ಆರ್​ಸಿಬಿ ನಾಯಕರಾಗಿದ್ದರು.

ಕೋಚ್​ ಆಂಡಿ ಫ್ಲವರ್​ ಮತ್ತು ಕ್ರಿಕೆಟ್​ ನಿರ್ದೇಶಕ ಮೋ ಬೋಬಟ್​ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ಹೊಸ ನಾಯಕನ ಹೆಸರು ಪ್ರಕಟಿಸಲಿದ್ದಾರೆ.

ಕಳೆದ 3 ವರ್ಷಗಳಿಂದ ತಂಡದ ನಾಯಕರಾಗಿದ್ದ ಫಾಫ್​ ಡು ಪ್ಲೆಸಿಸ್​ ಈ ಬಾರಿ ತಂಡದಲ್ಲಿ ರಿಟೇನ್​ ಆಗಿರಲಿಲ್ಲ. ಅಲ್ಲದೆ ಕಳೆದ ಹರಾಜಿನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಪಾಲಾಗಿದ್ದರು. ಹೀಗಾಗಿ ಆರ್​ಸಿಬಿ ಈ ಬಾರಿ ಹೊಸ ನಾಯಕನನ್ನು ನೇಮಿಸುವುದು ಅನಿವಾರ್ಯವಾಗಿದೆ.

ವಿರಾಟ್​ ಕೊಹ್ಲಿ ಈ ಹಿಂದೆ 143 ಪಂದ್ಯಗಳಲ್ಲಿ ಆರ್​ಸಿಬಿ ತಂಡವನ್ನು ಮುನ್ನಡೆಸಿದ್ದರು. ಆದರೆ ಒಮ್ಮೆಯೂ ತಂಡಕ್ಕೆ ಪ್ರಶಸ್ತಿ ಗೆದ್ದುಕೊಡದ ನಿರಾಸೆಯಲ್ಲಿ ಅವರು ನಾಯಕತ್ವ ತ್ಯಜಿಸಿದ್ದರು. ಅಲ್ಲದೆ 2021ರಲ್ಲಿ ಕೊಹ್ಲಿ ಬ್ಯಾಟಿಂಗ್​ನತ್ತ ಹೆಚ್ಚಿನ ಗಮನಹರಿಸುವ ಸಲುವಾಗಿಯೂ ಈ ನಿರ್ಧಾರ ತೆಗೆದುಕೊಂಡಿದ್ದರು. ಆದರೆ ಸದ್ಯ ಅವರು ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್​ನಿಂದ ನಿವೃತ್ತಿ ಹೊಂದಿರುವುದರಿಂದ ಹೆಚ್ಚಿನ ಒತ್ತಡವಿಲ್ಲದೆ ಆರ್​ಸಿಬಿ ನಾಯಕತ್ವವನ್ನು ಮರಳಿ ವಹಿಸಿಕೊಳ್ಳುವ ಸಾಧ್ಯತೆಗಳಿವೆ.

ಮಧ್ಯಪ್ರದೇಶದ 31 ವರ್ಷದ ರಜತ್​ ಪಾಟೀದಾರ್​ ಇತ್ತೀಚೆಗೆ ದೇಶೀಯ ಟಿ20 ಕ್ರಿಕೆಟ್​ ಟೂರ್ನಿ ಸಯ್ಯದ್​ ಮುಷ್ತಾಕ್​ ಅಲಿ ಟ್ರೋಫಿಯಲ್ಲಿ ತನ್ನ ತವರು ರಾಜ್ಯ ತಂಡದ ನಾಯಕರಾಗಿ ಫೈನಲ್​ಗೇರಿಸಿದ್ದರು. ಅಲ್ಲದೆ ಬ್ಯಾಟಿಂಗ್​ನಲ್ಲೂ ಮಿಂಚಿ 428 ರನ್​ಗಳೊಂದಿಗೆ ಟೂರ್ನಿಯ 2ನೇ ಗರಿಷ್ಠ ರನ್​ ಸ್ಕೋರರ್​ ಆಗಿದ್ದರು. ಈ ನಾಯಕತ್ವ ಅನುಭವದ ಹಿನ್ನೆಲೆಯಲ್ಲಿ ರಜತ್​ ಪಾಟೀದಾರ್​ ಕೂಡ ಈಗ ಆರ್​ಸಿಬಿ ನಾಯಕತ್ವದ ರೇಸ್​ನಲ್ಲಿದ್ದಾರೆ.

https://www.vijayavani.net/in-t20-leagues-the-current-year-is-the-winning-trend-of-new-teams-continuing-in-the-ipl