ಕಪ್​ ಗೆಲ್ಲಬೇಕಾದರೆ ಮೂರು ಸೇಡು ತೀರಿಸಿಕೊಳ್ಳಬೇಕಿದೆ ಆರ್​ಸಿಬಿ! ಇದು ಬಾಕಿ ಉಳಿದಿರುವ ಅಧ್ಯಾಯ!

ಬೆಂಗಳೂರು: ಆರ್​ಸಿಬಿ ತಂಡ ಈ ಮುನ್ನ 2020, 2021, 2022ರಲ್ಲೂ ಪ್ಲೇಆಫ್​​ ಹಂತಕ್ಕೇರಿದ್ದರೂ, ಕ್ರಮವಾಗಿ ಸನ್​ರೈಸರ್ಸ್​, ಕೆಕೆಆರ್​ ಮತ್ತು ರಾಜಸ್ಥಾನ ವಿರುದ್ಧ ಎಲಿಮಿನೇಟರ್​ನಲ್ಲೇ ಹೊರಬಿದ್ದಿತ್ತು. ಇದೀಗ ಆರ್​ಸಿಬಿ ಜತೆಗೆ ಇವೇ 3 ತಂಡಗಳು ಪ್ಲೇಆಫ್​​ಗೇರಿವೆ. ಹೀಗಾಗಿ ಆರ್​ಸಿಬಿ ಈ ಬಾರಿ ಪ್ರಶಸ್ತಿ ಜಯಿಸಬೇಕಾದರೆ ಇವೇ 3 ತಂಡಗಳನ್ನು ಸೋಲಿಸಿ ಸೇಡು ತೀರಿಸಿಕೊಳ್ಳಬೇಕಾಗಿದೆ.

ಮೇ ತಿಂಗಳಿನಲ್ಲಿ ಆರ್​ಸಿಬಿ ಸೋತಿಲ್ಲ, ಆರ್​ಆರ್​ ಗೆದ್ದಿಲ್ಲ!

ಆರ್​ಸಿಬಿ ಸತತ 6 ಜಯದೊಂದಿಗೆ ಪ್ಲೇಆಫ್​ಗೇರಿದ್ದರೆ, ರಾಜಸ್ಥಾನ ಕೊನೇ 5 ಲೀಗ್​ ಪಂದ್ಯಗಳಲ್ಲಿ ಗೆಲುವು ಕಾಣದ ನಡುವೆಯೂ ಪ್ಲೇಆಫ್​​ಗೇರಿದೆ. ಆರ್​ಸಿಬಿ ಏಪ್ರಿಲ್​ 21ರಂದು ತನ್ನ ಕೊನೇ ಸೋಲು ಕಂಡಿದ್ದರೆ, ರಾಜಸ್ಥಾನ ಏಪ್ರಿಲ್​ 27ರಂದು ತನ್ನ ಕೊನೇ ಗೆಲುವು ಸಾಧಿಸಿದೆ. ಅಂದರೆ ಮೇ ತಿಂಗಳಲ್ಲಿ ಆರ್​ಸಿಬಿ ಇದುವರೆಗೆ ಸೋಲನ್ನೇ ಕಂಡಿರದಿದ್ದರೆ, ಆರ್​ಆರ್​ ಗೆಲುವಿನ ಮುಖವನ್ನೇ ನೋಡಿಲ್ಲ.

ಸತತ 5 ಪಂದ್ಯ ಗೆದ್ದಾಗ ಆರ್​ಸಿಬಿ ಫೈನಲ್​ಗೇರಿದೆ!

ಆರ್​ಸಿಬಿ ತಂಡ ಸತತ 6 ಗೆಲುವಿನೊಂದಿಗೆ ಪ್ಲೇಆಫ್​​ ಹಂತಕ್ಕೇರಿದೆ. ಆರ್​ಸಿಬಿ ಈ ಮುನ್ನ ಐಪಿಎಲ್​ ಆವೃತ್ತಿಯೊಂದರಲ್ಲಿ ಸತತ 5 ಅಥವಾ ಅದಕ್ಕಿಂತ ಹೆಚ್ಚಿನ ಪಂದ್ಯ ಗೆದ್ದ 3 ಸಲವೂ ಫೈನಲ್​ಗೇರಿತ್ತು. ಅಂದರೆ 2009, 2011 ಮತ್ತು 2016ರಲ್ಲಿ ಸತತ 5 ಪಂದ್ಯ ಗೆದ್ದಿತ್ತು ಮತ್ತು ಪ್ರಶಸ್ತಿ ಸುತ್ತಿಗೇರಿತ್ತು. ಹೀಗಾಗಿ ಈ ಸಲವೂ ಅದು ಪುನರಾವರ್ತನೆಯಾಗುವುದು ಮಾತ್ರವಲ್ಲದೆ, ಒಂದು ಹೆಜ್ಜೆ ಮುಂದೆ ಹೋಗಿ ಕಪ್​ ಗೆಲ್ಲುವ ನಿರೀಕ್ಷೆ ಅಭಿಮಾನಿಗಳದ್ದಾಗಿದೆ.

https://www.vijayavani.net/india-won-a-record-gold-in-the-asian-relay-championship