ಬಣ್ಣಗಳ ಹಬ್ಬಕ್ಕೆ ಗೆಲುವಿನ ಗಿಫ್ಟ್​ ನೀಡುವುದೇ ಆರ್​ಸಿಬಿ? ತವರಿನ ಮೊದಲ ಪಂದ್ಯದಲ್ಲಿ ಇಂದು ಪಂಜಾಬ್​ ಎದುರಾಳಿ

ವಿಜಯವಾಣಿ ಸುದ್ದಿಜಾಲ ಬೆಂಗಳೂರು

ಐಪಿಎಲ್​-17ರಲ್ಲಿ ಸೋಲಿನ ಆರಂಭ ಕಂಡಿರುವ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ತಂಡ ತವರಿನ ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಪಂಜಾಬ್​ ಕಿಂಗ್ಸ್​ ವಿರುದ್ಧ ಸೋಮವಾರ ನಡೆಯಲಿರುವ ಪಂದ್ಯದಲ್ಲಿ ಗೆಲುವಿನ ಖಾತೆ ತೆರೆಯುವ ಹಂಬಲದಲ್ಲಿದೆ. ಜತೆಗೆ ಉದ್ಯಾನನಗರಿಯ ಕ್ರಿಕೆಟ್​ ಪ್ರೇಮಿಗಳ ಹೋಳಿ ಸಂಭ್ರಮವನ್ನು ದುಪ್ಪಟ್ಟುಗೊಳಿಸುವ ತವಕದಲ್ಲಿದೆ.

ಹಾಲಿ ಚಾಂಪಿಯನ್​ ಚೆನ್ನೈ ಸೂಪರ್​ಕಿಂಗ್ಸ್​ ವಿರುದ್ಧ ನಡೆದ ಉದ್ಘಾಟನಾ ಪಂದ್ಯದಲ್ಲಿ ಆರ್​ಸಿಬಿ 6 ವಿಕೆಟ್​ಗಳಿಂದ ಮುಗ್ಗರಿಸಿತ್ತು. ಜತೆಗೆ ಈ ಸೋಲು ತಂಡದ ಕೆಲ ದೌರ್ಬಲ್ಯಗಳನ್ನು ಒಂದೇ ಪಂದ್ಯದಲ್ಲಿ ಬಹಿರಂಗಪಡಿಸಿದೆ. ಬ್ಯಾಟಿಂಗ್​ ವಿಭಾಗದ ಕುಸಿತ ಮತ್ತು ಬೌಲಿಂಗ್​ ವಿಭಾಗದ ನೀರಸ ನಿರ್ವಹಣೆಯನ್ನು ಸುಧಾರಿಸಬೇಕಾದ ಅಗತ್ಯ ಫಾಫ್​ ಡು ಪ್ಲೆಸಿಸ್​ ಬಳಗದ ಮುಂದಿದೆ.

ಹೊಸ ಲಾಂಛನ, ಹೊಸ ಜೆರ್ಸಿ, ಹೊಸ ಕೋಚ್​ ಜತೆಗೆ ತಂಡದ ಹೆಸರಿನಲ್ಲೂ ಅಲ್ಪ ಬದಲಾವಣೆ ಮಾಡಿದರೂ, ಆರ್​ಸಿಬಿ ತಂಡ ತನ್ನ ಹಳೆಯ ಸಂಪ್ರದಾಯದಂತೆ ಆರಂಭಿಕ ಪಂದ್ಯದಲ್ಲಿ ಸೋಲು ತಪ್ಪಿಸಿಕೊಳ್ಳಲು ಆಗಲಿಲ್ಲ. ಆದರೆ ತವರಿನ ಅಭಿಮಾನಿಗಳ ಎದುರು ಆರ್​ಸಿಬಿ ಮತ್ತೆ ಉತ್ಸಾಹದಿಂದ ಕಣಕ್ಕಿಳಿಯಬೇಕಾಗಿದೆ.

ವಿಶ್ವಾಸದಲ್ಲಿ ಪಂಜಾಬ್​

ಶಿಖರ್​ ಧವನ್​ ಸಾರಥ್ಯದ ಪಂಜಾಬ್​ ಕಿಂಗ್ಸ್​ ತಂಡ ತನ್ನ ಮೊದಲ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್​ ವಿರುದ್ಧ ಗೆದ್ದ ವಿಶ್ವಾಸದಲ್ಲಿದೆ. ಆಲ್ರೌಂಡರ್​ಗಳಾದ ಸ್ಯಾಮ್​ ಕರನ್​, ಲಿಯಾಮ್​ ಲಿವಿಂಗ್​ಸ್ಟೋನ್​ ಮೊದಲ ಪಂದ್ಯದ ಗೆಲುವಿನಲ್ಲಿ ಮಿಂಚಿದ್ದರೆ, ಅರ್ಷದೀಪ್​ ಸಿಂಗ್​ ಮತ್ತು ಕಗಿಸೊ ರಬಾಡ ಬೌಲಿಂಗ್​ ವಿಭಾಗದ ಪ್ರಮುಖ ಬಲ ಆಗಿದ್ದಾರೆ. ಆರ್​ಸಿಬಿಯ ಮಾಜಿ ವೇಗಿ ಹರ್ಷಲ್​ ಪಟೇಲ್​ ಈ ಬಾರಿ ಪ್ರವಾಸಿ ತಂಡದಲ್ಲಿದ್ದು, ಚಿನ್ನಸ್ವಾಮಿ ಮೈದಾನದಲ್ಲಿನ ಅವರ ಅನುಭವ ಆರ್​ಸಿಬಿಗೆ ಸವಾಲೊಡ್ಡಬಹುದು.

ಮಿಂಚಬೇಕಿದೆ ಕೆಜಿಎಫ್​!

ಆರ್​ಸಿಬಿ ತಂಡದ ಬ್ಯಾಟಿಂಗ್​ ವಿಭಾಗದ ಸಮಸ್ಯೆ ನೀಗಿಸುವ ಪರಿಹಾರ ಸರಳವಾಗಿದೆ. ಕೆಜಿಎ್​ (ಕೊಹ್ಲಿ, ಗ್ಲೆನ್​, ಫಾಫ್​) ಮಿಂಚಿದರೆ ಆರ್​ಸಿಬಿಗೆ ದೊಡ್ಡ ಮೊತ್ತ ಪೇರಿಸುವುದು ಕಷ್ಟವಾಗದು. ಮೊದಲ ಪಂದ್ಯದಲ್ಲಿ ಪ್ಲೆಸಿಸ್​ ಉತ್ತಮ ಆರಂಭದ ಬಳಿಕ ಔಟಾಗಿದ್ದರೆ, ವಿರಾಟ್​ ಕೊಹ್ಲಿ ಲಯ ಕಂಡುಕೊಳ್ಳುವ ಹಂತದಲ್ಲೇ ಔಟಾಗಿದ್ದರು. ಇನ್ನು ಗ್ಲೆನ್​ ಮ್ಯಾಕ್ಸ್​ವೆಲ್​ ಖಾತೆ ತೆರೆಯಲು ವಿಫಲರಾಗಿದ್ದರು. ಇವರಿಗೆ ಯುವ ಬ್ಯಾಟರ್​ಗಳಾದ ರಜತ್​ ಪಾಟೀದಾರ್​, ಅನುಜ್​ ರಾವತ್​ ಸಮರ್ಥ ಬೆಂಬಲ ನೀಡಬೇಕಿದೆ.

ಬೌಲಿಂಗ್​ ವಿಭಾಗದ್ದೇ ತಲೆನೋವು

ಹರಾಜಿನ ದಿನಗಳಿಂದಲೇ ಆರ್​ಸಿಬಿ ಬೌಲಿಂಗ್​ ವಿಭಾಗದ ಬಗ್ಗೆ ಟೀಕೆಗಳು ಕೇಳಿಬಂದಿದ್ದವು. ಮೊದಲ ಪಂದ್ಯದ ಬಳಿಕ ಆರ್​ಸಿಬಿ ಬೌಲಿಂಗ್​ ವಿಭಾಗ ಇನ್ನಷ್ಟು ಟೀಕೆ ಎದುರಿಸಿದೆ. ಚೆಪಾಕ್​ನ ಸ್ಪಿನ್​ ಸ್ನೇಹಿ ಪಿಚ್​ನಲ್ಲೂ ಆರ್​ಸಿಬಿಯ ಸ್ಪಿನ್ನರ್​ಗಳಾದ ಕರ್ಣ್​ ಶರ್ಮ, ಮಯಾಂಕ್​ ದಾಗರ್​ ಪರಿಣಾಮಕಾರಿ ಎನಿಸಲಿಲ್ಲ. ವೇಗದ ಬೌಲಿಂಗ್​ನಲ್ಲೂ ಸಿರಾಜ್​, ಅಲ್ಜಾರಿ ಜೋಸೆಫ್​, ಯಶ್​ ದಯಾಳ್​ ದುಬಾರಿ ಎನಿಸಿದರು. ಇವರಿಗೆ ಹೋಲಿಸಿದರೆ ಆಲ್ರೌಂಡರ್​ ಕ್ಯಾಮರಾನ್​ ಗ್ರೀನ್​ ವಿಕೆಟ್​ ಬೇಟೆಯಲ್ಲಿ ಹೆಚ್ಚಿನ ಯಶ ಕಂಡರು. ಚಿನ್ನಸ್ವಾಮಿಯಲ್ಲಿ ಕಿರು ಬೌಂಡರಿ ಗೆರೆ ಇರುವುದರಿಂದ ಬೌಲರ್​ಗಳಿಗೆ ಇನ್ನಷ್ಟು ಕಠಿಣ ಸವಾಲು ಇದೆ. ಈ ಬಾರಿ ಸ್ಥಳಿಯ ವೇಗಿ ವೈಶಾಕ್​ ವಿಜಯ್​ ಕುಮಾರ್​ ಮತ್ತು ಕಿವೀಸ್​ ವೇಗಿ ಲಾಕಿ ಗ್ಯುರ್ಸನ್​ಗೆ ಅವಕಾಶದ ನಿರೀೆ ಇದೆ.

*ಮುಖಾಮುಖಿ: 31

ಆರ್​ಸಿಬಿ: 14

ಪಂಜಾಬ್​: 17

*ಆರಂಭ: ರಾತ್ರಿ 7.30

*ನೇರಪ್ರಸಾರ: ಸ್ಟಾರ್​ ಸ್ಪೋರ್ಟ್ಸ್​, ಜಿಯೋಸಿನಿಮಾ

ಮೊದಲ 3 ಪಂದ್ಯಗಳ ಟಿಕೆಟ್​ ಸೋಲ್ಡ್​ಔಟ್​

ಬೆಂಗಳೂರಿನಲ್ಲಿ ನಿಗದಿಯಾಗಿರುವ ಆರ್​ಸಿಬಿ ತಂಡದ ಮೊದಲ 3 ಪಂದ್ಯಗಳ ಟಿಕೆಟ್​ಗಳು ಸೋಲ್ಡ್​ಔಟ್​ ಆಗಿವೆ. ಈ ಬಾರಿ ಆ್​ಲೈನ್​ನಲ್ಲಿ ಟಿಕೆಟ್​ ಮಾರಾಟ ಮಾಡಲಾಗುತ್ತಿಲ್ಲ. ಆನ್​ಲೈನ್​ನಲ್ಲಿ ಮಾರಾಟಕ್ಕಿಟ್ಟಿರುವ ಅಗ್ಗದ ಟಿಕೆಟ್​ಗಳು ಒಂದೇ ದಿನದಲ್ಲಿ ಖಾಲಿಯಾಗಿದ್ದರೆ, ದುಬಾರಿ ಟಿಕೆಟ್​ಗಳೂ ಕೆಲ ದಿನಗಳ ಹಿಂದೆ ಸಂಪೂರ್ಣ ಮಾರಾಟವಾಗಿವೆ. ಆರ್​ಸಿಬಿ ತಂಡ ಇನ್ನು ಮಾ. 29ಕ್ಕೆ ಕೆಕೆಆರ್​ ಮತ್ತು ಏ. 2ಕ್ಕೆ ಲಖನೌ ಎದುರು ಇನ್ನೆರಡು ಪಂದ್ಯಗಳನ್ನು ಆಡಲಿದೆ.

*861: ವಿರಾಟ್​ ಕೊಹ್ಲಿ ಪಂಜಾಬ್​ ಕಿಂಗ್ಸ್​ ವಿರುದ್ಧ ಇದುವರೆಗೆ 30 ಪಂದ್ಯ ಆಡಿದ್ದು, ಒಟ್ಟು 861 ರನ್​ ಬಾರಿಸಿದ್ದಾರೆ. ಇದರಲ್ಲಿ ಒಂದು ಶತಕ ಮತ್ತು 3 ಅರ್ಧಶತಕಗಳು ಸೇರಿವೆ.

*39: ಕೊಹ್ಲಿ ಇನ್ನು 39 ರನ್​ ಗಳಿಸಿದರೆ ಪಂಜಾಬ್​ ಕಿಂಗ್ಸ್​ ವಿರುದ್ಧ 900 ರನ್​ ಪೂರೈಸಿದ 2ನೇ ಬ್ಯಾಟರ್​ ಎನಿಸಲಿದ್ದಾರೆ. ಡೇವಿಡ್​ ವಾರ್ನರ್​ ಮೊದಲ ಸಾಧಕ.

ರನ್​ಮಳೆ ನಿರೀಕ್ಷೆ

ಚಿನ್ನಸ್ವಾಮಿ ಸ್ಟೇಡಿಯಂನ ಪಿಚ್​ ಸಾಂಪ್ರದಾಯಿಕವಾಗಿ ಫ್ಲ್ಯಾಟ್​ ಎನಿಸಿದ್ದು, ಎಂದಿನಂತೆ ಈ ಸಲವೂ ರನ್​ಮಳೆ ಹರಿಯುವ ನಿರೀಕ್ಷೆ ಇದೆ. ಇತ್ತೀಚೆಗೆ ಡಬ್ಲ್ಯುಪಿಎಲ್​ನಲ್ಲೂ ಇಲ್ಲಿ ನಡೆದ ಪಂದ್ಯಗಳಲ್ಲಿ ರನ್​ ಸುರಿಮಳೆಯಾಗಿತ್ತು. ಚಿನ್ನಸ್ವಾಮಿಯಲ್ಲಿ ಇದುವರೆಗೆ ನಡೆದಿರುವ 88 ಪಂದ್ಯಗಳಲ್ಲಿ 47ರಲ್ಲಿ ಚೇಸಿಂಗ್​ ಮಾಡಿದ ತಂಡವೇ ಜಯಿಸಿದ್ದರೆ, ಮೊದಲು ಬ್ಯಾಟಿಂಗ್​ ಮಾಡಿದ 37 ತಂಡಗಳು ಗೆದ್ದಿವೆ. 4 ಪಂದ್ಯಗಳು ರದ್ದುಗೊಂಡಿವೆ. 47ರಲ್ಲಿ ಟಾಸ್​ ಗೆದ್ದ ತಂಡವೇ ಜಯಿಸಿದೆ. ಮೊದಲ ಇನಿಂಗ್ಸ್​ನ ಸರಾಸರಿ ಮೊತ್ತ 166 ರನ್​. ಇಲ್ಲಿ ಯಶಸ್ವಿಯಾಗಿ ಚೇಸಿಂಗ್​ ಮಾಡಲಾಗಿರುವ ಗರಿಷ್ಠ ಮೊತ್ತ 213. ಆರ್​ಸಿಬಿ ಪೇರಿಸಿದ 263 ರನ್​ ಇಲ್ಲಿ ನಡೆದ ಐಪಿಎಲ್​ ಪಂದ್ಯದಲ್ಲಿ ಗರಿಷ್ಠ ಮೊತ್ತವಾಗಿದೆ.

*9: ಚಿನ್ನಸ್ವಾಮಿಯಲ್ಲಿ 2018ರಿಂದ ನಡೆದಿರುವ ಪ್ರತಿ ಐಪಿಎಲ್​ ಪಂದ್ಯದಲ್ಲಿ ಓವರ್​ಗೆ 9.42ರ ಸರಾಸರಿಯಲ್ಲಿ ರನ್​ ಹರಿದಿದೆ. ಇದು ಕನಿಷ್ಠ 5 ಐಪಿಎಲ್​ ಪಂದ್ಯ ನಡೆದಿರುವ ತಾಣಗಳ ಪೈಕಿ ಗರಿಷ್ಠ ಸ್ಕೋರಿಂಗ್​ ರೇಟ್​ ಆಗಿದೆ.

https://www.vijayavani.net/rajasthan-royals-wins-against-luknow-super-gaints