ಬಿಸಿಸಿಐನಿಂದ ಕೇಂದ್ರಿಯ ಗುತ್ತಿಗೆ ಪಡೆದುಕೊಂಡಿರುವ ಆಟಗಾರರು ಮತ್ತು ರಾಷ್ಟ್ರೀಯ ಆಯ್ಕೆ ಸಮಿತಿಯಿಂದ ಶಾರ್ಟ್ಲಿಸ್ಟ್ ಆಗಿರುವ ಯುವ ಆಟಗಾರರು ದೇಶೀಯ ಕ್ರಿಕೆಟ್ನಲ್ಲಿ, ಅದರಲ್ಲೂ ಪ್ರಮುಖವಾಗಿ ರೆಡ್ಬಾಲ್ ಟೂರ್ನಿಗಳಲ್ಲಿ ಆಡುವುದು ಕಡ್ಡಾಯವಾಗಿದೆ ಎಂದೂ ಜಯ್ ಷಾ ತಿಳಿಸಿದ್ದಾರೆ. ಜತೆಗೆ ಈ ಸಂಬಂಧ ಸೂಕ್ತ ನಿರ್ಧಾರ ಕೈಗೊಳ್ಳಲು ಆಯ್ಕೆ ಸಮಿತಿ ಅಧ್ಯಕ್ಷ ಅಜಿತ್ ಅಗರ್ಕರ್ಗೆ ಮುಕ್ತ ಸ್ವಾತಂತ್ರ$್ಯ ನೀಡಿರುವುದಾಗಿ ಹೇಳಿದ್ದಾರೆ. ಈ ಮೂಲಕ ದೇಶೀಯ ಕ್ರಿಕೆಟ್ ಆಡದೆ ಐಪಿಎಲ್ ಸಿದ್ಧತೆಯಲ್ಲಿ ತೊಡಗಿಕೊಂಡಿರುವ ವಿಕೆಟ್ ಕೀಪರ್-ಬ್ಯಾಟರ್ ಇಶಾನ್ ಕಿಶನ್ಗೆ ಪರೋಕ್ಷ ಎಚ್ಚರಿಕೆ ರವಾನಿಸಿದ್ದಾರೆ. "ಆಯ್ಕೆ ಸಮಿತಿ ಅಧ್ಯಕ್ಷ, ಭಾರತ ತಂಡದ ಕೋಚ್ ಅಥವಾ ನಾಯಕ ಸೂಚಿಸಿದರೆ ರೆಡ್ ಬಾಲ್ ಕ್ರಿಕೆಟ್ನಲ್ಲಿ ಆಡಲೇಬೇಕು. ಫಿಟ್ನೆಸ್ ಬಗ್ಗೆ ಎನ್ಸಿಎಯಿಂದಲೂ ಹಸಿರು ನಿಶಾನೆ ಇದ್ದರೆ ಆಗ ಆಡದಿರುವುದಕ್ಕೆ ಯಾವುದೇ ನೆಪ ನೀಡಿದರೂ ಪರಿಗಣಿಸುವುದಿಲ್ಲ' ಎಂದು ಜಯ್ ಷಾ ವಿವರಿಸಿದ್ದಾರೆ.
