ಪ್ರೊ ಕಬಡ್ಡಿ ಲೀಗ್​ನಲ್ಲಿ ಯು ಮುಂಬಾ, ಹರಿಯಾಣ ತಂಡಗಳಿಗೆ ಜಯ

ಪುಣೆ: ಆಮಿರ್​ ಮೊಹಮದ್​ ಜರ್​ದನೇಶ್​ (13) ಆಲ್ರೌಂಡ್​ ನಿರ್ವಹಣೆಯ ಬಲದಿಂದ ಯು ಮುಂಬಾ ತಂಡ ಪ್ರೊ ಕಬಡ್ಡಿ ಲೀಗ್​ 10ನೇ ಆವೃತ್ತಿಯಲ್ಲಿ ಪಟನಾ ಪೈರೇಟ್ಸ್​ ಎದುರು 42-40 ಅಂಕಗಳಿಂದ ರೋಚಕ ಗೆಲುವು ದಾಖಲಿಸಿದೆ.

ಶುಕ್ರವಾರ ಆರಂಭಗೊಂಡ ಪುಣೆ ಚರಣದ ಮೊದಲ ಪಂದ್ಯದಲ್ಲಿ ಯು ಮುಂಬಾ ತಂಡ ಮೊದಲಾರ್ಧದಲ್ಲಿ 18-21ರಿಂದ ಹಿನ್ನಡೆ ಅನುಭವಿಸಿತು. ನಂತರ ದ್ವೀತಿಯಾರ್ಧದಲ್ಲಿ ಪಟನಾ ತಂಡವನ್ನು ಆಲೌಟ್​ ಬಲೆಗೆ ಬೀಳಿಸಿ ತಿರುಗೇಟು ನೀಡಿದ ಮುಂಬಾ, 2 ಅಂಕಗಳ ಅಂತರದಿಂದ ಗೆಲುವು ಒಲಿಸಿಕೊಂಡಿತು.

ಮುಂಬೈ ಪರ ಗುಮನ್​ ಸಿಂಗ್​ (8) ಮತ್ತು ವಿಶ್ವಂತ್​ ವಿ. (8) ರೈಡಿಂಗ್​ನಲ್ಲಿ ಮಿಂಚಿದರು. ಪಟನಾ ಪರ ಸಚಿನ್​ 12 ಯಶಸ್ವಿ ರೈಡಿಂಗ್​ಗಳೊಂದಿಗೆ ಮಿಂಚಿದರೂ ಅದು ಗೆಲುವಿಗೆ ಸಾಕಾಗಲಿಲ್ಲ. ಸುಧಾಕರ್​ (7) ಮತ್ತು ಮಂಜೀತ್​ (5) ಕೂಡ ಸಚಿನ್​ಗೆ ಉತ್ತಮ ಬೆಂಬಲ ಒದಗಿಸಿದರು. ಆದರೆ ಡಿಫೆಂಡರ್​ಗಳ ವೈಫಲ್ಯದಿಂದ ಪಟನಾಗೆ ಹಿನ್ನಡೆಯಾಯಿತು.

ಪುಣೇರಿಗೆ ತವರಿನಲ್ಲಿ ನಿರಾಸೆ: ಆತಿಥೇಯ ಪುಣೇರಿ ಪಲ್ಟಾನ್​ ತಂಡ ದಿನದ 2ನೇ ಪಂದ್ಯದಲ್ಲಿ ಹರಿಯಾಣ ಸ್ಟೀಲರ್ಸ್​ ಎದುರು 39-44ರಿಂದ ವೀರೋಚಿತ ಸೋಲು ಅನುಭವಿಸಿತು. ವಿನಯ್​ (15) ಹರಿಯಾಣ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು. ಮೊದಲಾರ್ಧದಲ್ಲಿ 24-21ರಿಂದ ಮುನ್ನಡೆ ಸಾಧಿಸಿದ್ದ ಪುಣೇರಿ, ದ್ವೀತಿಯಾರ್ಧದಲ್ಲಿ ಹರಿಯಾಣದ ಆಕ್ರಮಣದ ಎದುರು ಮಂಕಾಯಿತು. ಪುಣೇರಿ ಪರ ನಾಯಕ ಅಸ್ಲಾಂ ಮುಸ್ತಾ (9), ಮೋಹಿತ್​ ಗೋಯತ್​ (8), ಆಕಾಶ್​ ಶಿಂಧೆ (5) ಹೋರಾಟ ವ್ಯರ್ಥಗೊಂಡಿತು.

https://www.vijayavani.net/bab-indrajit-plays-with-injury-and-win-hearts