ಪ್ರೊ ಕಬಡ್ಡಿ ಲೀಗ್​ನಲ್ಲಿ ಸತತ 7 ಗೆಲುವು ಸಾಧಿಸಿದ ಪುಣೇರಿ ಪಲ್ಟಾನ್​

ಮುಂಬೈ: ಕನ್ನಡಿಗ ಬಿಸಿ ರಮೇಶ್​ ಮಾರ್ಗದರ್ಶನದ ಪುಣೇರಿ ಪಲ್ಟಾನ್​ ತಂಡ ಪ್ರೊ ಕಬಡ್ಡಿ ಲೀಗ್​ 10ನೇ ಆವೃತ್ತಿಯಲ್ಲಿ ಸತತ 7ನೇ ಗೆಲುವು ದಾಖಲಿಸುವ ಮೂಲಕ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನವನ್ನು ಭದ್ರಪಡಿಸಿಕೊಂಡಿದೆ. ಪುಣೇರಿ ತಂಡ ಭಾನುವಾರದ ಮೊದಲ ಪಂದ್ಯದಲ್ಲಿ ತಮಿಳ್​ ತಲೈವಾಸ್​ ತಂಡವನ್ನು 29-26 ಅಂತರದಿಂದ ಪರಾಭವಗೊಳಿಸಿತು.

ಮುಂಬೈ ಚರಣದ 3ನೇ ದಿನದ ಮೊದಲ ಪಂದ್ಯದ ಮೊದಲಾರ್ಧದಲ್ಲಿ ಜಿದ್ದಾಜಿದ್ದಿನ ಹೋರಾಟ ನಡೆಯಿತು. ಅಂತಿಮವಾಗಿ ಪುಣೇರಿ 12-11ರಿಂದ ಅಲ್ಪ ಮುನ್ನಡೆ ಸಾಧಿಸಿತು. ದ್ವೀತಿಯಾರ್ಧದಲ್ಲಿ ತಲೈವಾಸ್​ ತಂಡವನ್ನು ಆಲೌಟ್​ ಬಲೆಗೆ ಬೀಳಿಸುವ ಮೂಲಕ ಪುಣೇರಿ ತಂಡ ಮುನ್ನಡೆಯನ್ನು ಹಿಗ್ಗಿಸಿಕೊಂಡಿತು. ಟ್ಯಾಕಲಿಂಗ್​ನಲ್ಲಿ ತಲೈವಾಸ್​ ತಂಡ ದಿಟ್ಟ ಪ್ರತಿರೋಧ ತೋರಿದರೂ, ಪುಣೇರಿ ತಂಡ ಕೊನೆಯವರೆಗೂ ಮುನ್ನಡೆ ಕಾಯ್ದುಕೊಳ್ಳುವಲ್ಲಿ ಯಶಸ್ವಿಯಾಯಿತು.

ಪುಣೇರಿ ತಂಡಕ್ಕೆ ಇದು ಆಡಿದ 10 ಪಂದ್ಯಗಳಲ್ಲಿ 9ನೇ ಗೆಲುವಾಗಿದೆ. ತಲೈವಾಸ್​ ತಂಡಕ್ಕೆ ಇದು 10 ಪಂದ್ಯಗಳಲ್ಲಿ 8ನೇ ಸೋಲಾಗಿದ್ದು, ಅಂಕಪಟ್ಟಿಯಲ್ಲಿ 11ನೇ ಸ್ಥಾನದಲ್ಲೇ ಉಳಿದುಕೊಂಡಿದೆ.

ಹರಿಯಾಣಕ್ಕೆ ಮಣಿದ ಬೆಂಗಾಲ್​: ದಿನದ 2ನೇ ಪಂದ್ಯದಲ್ಲಿ ಹರಿಯಾಣ ಸ್ಟೀಲರ್ಸ್​ ತಂಡ 41-35ರಿಂದ ಬೆಂಗಾಲ್​ ವಾರಿಯರ್ಸ್​ ತಂಡವನ್ನು ಮಣಿಸಿತು. ಹರಿಯಾಣ ಸ್ಟೀಲರ್ಸ್​ ತಂಡಕ್ಕೆ ಇದು ಆಡಿದ 10 ಪಂದ್ಯಗಳಲ್ಲಿ 6ನೇ ಗೆಲುವಾಗಿದೆ.

https://www.vijayavani.net/deeptis-all-round-show-in-vain-as-australia-level-t20-series-against-india