ಪ್ಯಾರಿಸ್​ ಪ್ಯಾರಾಲಿಂಪಿಕ್ಸ್: ಬ್ಯಾಡ್ಮಿಂಟನ್​ನಲ್ಲಿ ಸೆಮಿಫೈನಲ್​ಗೇರಿದ ಕನ್ನಡಿಗ ಸುಹಾಸ್​ ಯತಿರಾಜ್​

ಪ್ಯಾರಿಸ್: ಟೋಕಿಯೊ ಪ್ಯಾರಾಲಿಂಪಿಕ್ಸ್​ ರಜತ ಪದಕ ವಿಜೇತ ಕನ್ನಡಿಗ ಸುಹಾಸ್​ ಯತಿರಾಜ್​, ನಿತೇಶ್​ ಕುಮಾರ್​ ಪ್ಯಾರಾ ಬ್ಯಾಡ್ಮಿಂಟನ್​ ಸ್ಪರ್ಧೆಯ ಪುರುಷರ ಸಿಂಗಲ್ಸ್​ ವಿಭಾಗದಲ್ಲಿ ಸೆಮಿಫೈನಲ್​ ಪ್ರವೇಶಿಸಿದ್ದಾರೆ. ಮಹಿಳಾ ಸಿಂಗಲ್ಸ್​ ವಿಭಾಗದಲ್ಲಿ ಮಾನ್ಸಿ ಜೋಷಿ ಸತತ 2ನೇ ಸೋಲಿನೊಂದಿಗೆ ಲೀಗ್​ ಹಂತದಲ್ಲೇ ಹೊರಬಿದ್ದರು.

ಉತ್ತರ ಪ್ರದೇಶದಲ್ಲಿ ಐಎಎಸ್​ ಅಧಿಕಾರಿಯಾಗಿರುವ ಸುಹಾಸ್​ ಎಸ್​ಎಲ್​4 ವಿಭಾಗದ ಎ ಗುಂಪಿನ 2ನೇ ಪಂದ್ಯದಲ್ಲಿ ಕೊರಿಯಾದ ಶಿನ್​ ಕ್ಯೂಂಗ್​ ಹ್ವಾನ್​ ವಿರುದ್ಧ 26-24, 21-14 ನೇರಗೇಮ್​ಗಳಿಂದ ಗೆಲುವು ಸಾಧಿಸಿದರು. ಈ ಮೂಲಕ ಗುಂಪಿನಲ್ಲಿ ಅಗ್ರಸ್ಥಾನ ಪಡೆದು ಉಪಾಂತ್ಯಕ್ಕೇರಿದರು.

ಐಐಟಿ ಪದವೀಧರನಾಗಿರುವ 29 ವರ್ಷದ ನಿತೀಶ್​ ಎಸ್​ಎಲ್​3 ವಿಭಾಗದ ಎ ಗುಂಪಿನಲ್ಲಿ ಚೀನಾದ ಯಂಗ್​ ಜಿಯಾನ್ಯುಯಾನ್​ ವಿರುದ್ಧ 21-5, 21-11ರಿಂದ ಗೆದ್ದರು. 4 ಷಟ್ಲರ್​ಗಳ ಗುಂಪಿನಲ್ಲಿ ನಿತೀಶ್​ ಸತತ 2ನೇ ಜಯದೊಂದಿಗೆ ಟಾಪ್​2 ಸ್ಥಾನ ಖಾತ್ರಿಪಡಿಸಿಕೊಳ್ಳುವ ಮೂಲಕ ಸೆಮೀಸ್​ ಪ್ರವೇಶಿಸಿದ್ದಾರೆ. ನಿತೀಶ್​ 2009ರಲ್ಲಿ ಸಂಭವಿಸಿದ ಅಪಘಾತದಲ್ಲಿ ಕಾಲು ಕಳೆದುಕೊಂಡಿದ್ದರು. ಇದೇ ವಿಭಾಗದಲ್ಲಿ ಮನೋಜ್​ ಸರ್ಕಾರ್​ ಸತತ 2ನೇ ಸೋಲಿನೊಂದಿಗೆ ಸೆಮಿೈನಲ್​ ರೇಸ್​ನಿಂದ ಹೊರಬಿದ್ದರು.

ಮಹಿಳೆಯರ ಎಸ್​ಎಲ್​3 ವಿಭಾಗದಲ್ಲಿ 2019ರ ವಿಶ್ವ ಚಾಂಪಿಯನ್​ ಮಾನ್ಸಿ ಜೋಷಿ ಯೂಕ್ರೇನ್​ನ ಒಕ್ಸಾನಾ ಕೊಝಿನಾ ವಿರುದ್ಧ 21-10, 15-21, 21-23ರಿಂದ ಪರಾಭವಗೊಂಡರು. ಮೊದಲ ಪಂದ್ಯದಂತೆ ಈ ಸಲವೂ ಮೊದಲ ಗೇಮ್​ ಗೆದ್ದರೂ, ನಂತರದ 2 ಗೇಮ್​ ಸೋತು ಮಾನ್ಸಿ ನಿರಾಸೆ ಅನುಭವಿಸಿದರು. ಸುಹಾಸ್​ ಮತ್ತು ಪಾಲಕ್​ ಕೊಹ್ಲಿ ಜೋಡಿ ಮಿಶ್ರ ಡಬಲ್ಸ್​ ಎಸ್​ಎಲ್​3-ಎಸ್​ಯು5 ವಿಭಾಗದಲ್ಲಿ ಸತತ 2ನೇ ಸೋಲು ಅನುಭವಿಸಿದ್ದು, ಕೊನೇ ಪಂದ್ಯಕ್ಕೆ ಮುನ್ನವೇ ಸೆಮೀಸ್​ ಆಸೆ ಕೈಚೆಲ್ಲಿದೆ.

ಕನ್ನಡಿಗ ಶ್ರೀಹರ್ಷಗೆ ನಿರಾಸೆ

ಕರ್ನಾಟಕದ ಶೂಟರ್​ ಶ್ರೀಹರ್ಷ ರಾಮಕೃಷ್ಣ ದೇವರೆಡ್ಡಿ ಮಿಶ್ರ 10 ಮೀ. ಏರ್​ ರೈಫಲ್​ (ಎಸ್​ಎಚ್​2) ಸ್ಟಾ$ಂಡಿಂಗ್​ ವಿಭಾಗದಲ್ಲಿ ಕೇವಲ 0.1 ಅಂಕದಿಂದ ಫೈನಲ್​ಗೇರುವ ಅವಕಾಶ ತಪ್ಪಿಸಿಕೊಂಡು ನಿರಾಸೆ ಅನುಭವಿಸಿದರು. 630.7 ಅಂಕ ಗಳಿಸಿದ ಶ್ರೀಹರ್ಷ ಅರ್ಹತಾ ಸುತ್ತಿನಲ್ಲಿ 9ನೇ ಸ್ಥಾನಕ್ಕೆ ತೃಪ್ತಿಪಟ್ಟರು. ಅಗ್ರ 8 ಶೂಟರ್​ಗಳ ಫೈನಲ್​ಗೆ ನ್ಯೂಜಿಲೆಂಡ್​ನ ಮೈಕೆಲ್​ ಜಾನ್ಸನ್​ 630.8 ಅಂಕದೊಂದಿಗೆ ಕೊನೆಯವರಾಗಿ ಅರ್ಹತೆ ಗಳಿಸಿದರು.

https://www.vijayavani.net/cricket-legend-sachin-tendulkar-childhood-coach-ramakant-achrekar-statue-installed-in-shivaji-park