ಕ್ರಿಕೆಟ್​ ದಿಗ್ಗಜ ಸಚಿನ್​ ತೆಂಡುಲ್ಕರ್​ ಬಾಲ್ಯದ ಕೋಚ್​ ರಮಾಕಾಂತ್​ ಆಚ್ರೆಕರ್​ ಪ್ರತಿಮೆ ಶಿವಾಜಿ ಪಾರ್ಕ್​ನಲ್ಲಿ ಸ್ಥಾಪನೆ

ಮುಂಬೈ: ಕ್ರಿಕೆಟ್​ ದಿಗ್ಗಜ ಸಚಿನ್​ ತೆಂಡುಲ್ಕರ್​ ಅವರ ಬಾಲ್ಯದ ಕೋಚ್​ ರಮಾಕಾಂತ್​ ಆಚ್ರೆಕರ್​ ಪ್ರತಿಮೆಯನ್ನು ಶಿವಾಜಿ ಪಾರ್ಕ್​ನಲ್ಲಿ ಸ್ಥಾಪಿಸಲು ಮಹಾರಾಷ್ಟ್ರ ಸರ್ಕಾರ ನಿರ್ಧರಿಸಿದೆ. ಇದನ್ನು ಸಚಿನ್​ ತೆಂಡುಲ್ಕರ್​ ಸಾಮಾಜಿಕ ಜಾಲತಾಣದಲ್ಲಿ ಸ್ವಾಗತಿಸಿದ್ದಾರೆ.

ಶಿವಾಜಿ ಪಾರ್ಕ್​ನ ಗೇಟ್​ ನಂ. 5ರ ಬಳಿ 6 ಅಡಿ ಎತ್ತರದ ರಮಾಕಾಂತ್​ ಆಚ್ರೆಕರ್​ ಪ್ರತಿಮೆ ಸ್ಥಾಪಿಸುವ ಪ್ರಸ್ತಾಪವನ್ನು ಮಹಾರಾಷ್ಟ್ರದ ನಗರಾಭಿವೃದ್ಧಿ ಸಚಿವಾಲಯ ಬುಧವಾರ ಅಂಗೀಕರಿಸಿದೆ. ಇದೇ ಶಿವಾಜಿ ಪಾರ್ಕ್​ನಲ್ಲಿ ಆಚ್ರೆಕರ್​, ಸಚಿನ್​ ತೆಂಡುಲ್ಕರ್​ಗೆ ಬಾಲ್ಯದಲ್ಲಿ ತರಬೇತಿ ನೀಡಿದ್ದರು.

"ಆಚ್ರೆಕರ್​ ಸರ್​ ನನ್ನ ಮತ್ತು ಇತರ ಹಲವರ ಜೀವನದಲ್ಲಿ ಅಪಾರ ಪ್ರಭಾವ ಬೀರಿದ್ದಾರೆ. ಅವರ ಎಲ್ಲ ಶಿಷ್ಯರ ಪರವಾಗಿ ನಾನು ಮಾತನಾಡುತ್ತಿದ್ದೇನೆ. ಶಿವಾಜಿ ಪಾರ್ಕ್​ ಸುತ್ತವೇ ಅವರ ಬಹುತೇಕ ಜೀವನ ಕಳೆದಿದೆ. ಅವರು ಸದಾ ಶಿವಾಜಿ ಪಾರ್ಕ್​ನಲ್ಲೇ ಇರಲು ಬಯಸುತ್ತಿದ್ದರು. ಅವರ ಕರ್ಮಭೂಮಿಯಲ್ಲಿ ಈಗ ಪ್ರತಿಮೆ ಸ್ಥಾಪಿಸಲು ಮುಂದಾಗಿರುವ ಸರ್ಕಾರದ ನಿರ್ಧಾರ ನನಗೆ ಅಪಾರ ಖುಷಿ ತಂದಿದೆ' ಎಂದು ಸಚಿನ್​ ಎಕ್ಸ್​ನಲ್ಲಿ ಬರೆದುಕೊಂಡಿದ್ದಾರೆ.

ಸಚಿನ್​ ಜತೆಗೆ ವಿನೋದ್​ ಕಾಂಬ್ಳಿ, ಪ್ರವಿಣ್​ ಆಮ್ರೆ, ಸಂಜಯ್​ ಬಂಗಾರ್​, ಅಜಿತ್​ ಅಗರ್ಕರ್​, ಚಂದ್ರಕಾಂತ್​ ಪಂಡಿತ್​ ಸಹಿತ ಆಚ್ರೆಕರ್​ರಿಂದ ತರಬೇತಿ ಪಡೆದ ಪಡೆದ ಒಟ್ಟು 12 ಆಟಗಾರರು ಭಾರತ ತಂಡದ ಪರ ಆಡಿದ್ದಾರೆ. 1990ರಲ್ಲಿ ಅವರಿಗೆ ದ್ರೋಣಾಚಾರ್ಯ ಪ್ರಶಸ್ತಿ ಲಭಿಸಿತ್ತು. ಆಚ್ರೆಕರ್​ 2019ರಲ್ಲಿ 87ನೇ ವಯಸ್ಸಿನಲ್ಲಿ ನಿಧನ ಹೊಂದಿದ್ದರು.

https://www.vijayavani.net/amit-shahs-son-is-no-longer-the-boss-of-icc-will-arun-jaitleys-son-join-bcci