ಪ್ಯಾರಿಸ್​ ಒಲಿಂಪಿಕ್ಸ್​ನಲ್ಲಿ ಚಿನ್ನದ ಪದಕ ಗೆಲ್ಲುವ ಅಥ್ಲೀಟ್​ಗೆ ಸಿಗಲಿದೆ ಭರ್ಜರಿ ನಗದು ಬಹುಮಾನ!

ಮೊನಾಕೊ: ಒಲಿಂಪಿಕ್ಸ್​ನಲ್ಲಿ ಪದಕ ಗೆಲ್ಲುವ ಕ್ರೀಡಾಪಟುಗಳಿಗೆ ಸಾಮಾನ್ಯವಾಗಿ ಪದಕಗಳಷ್ಟೇ ಲಭಿಸುತ್ತವೆ. ಯಾವುದೇ ನಗದು ಬಹುಮಾನವನ್ನು ನೀಡಲಾಗುವುದಿಲ್ಲ. ಪದಕ ವಿಜೇತ ಕ್ರೀಡಾಪಟುಗಳ ತವರು ದೇಶದಲ್ಲಷ್ಟೇ ಸರ್ಕಾರ, ಕಂಪನಿಗಳಿಂದ ವಿಶೇಷ ನಗದು ಮತ್ತು ಇತರ ಬಹುಮಾನಗಳು ಲಭಿಸುತ್ತವೆ. ಆದರೆ ಈ ಬಾರಿ ಪ್ಯಾರಿಸ್​ ಒಲಿಂಪಿಕ್ಸ್​ನ ಟ್ರಾ$್ಯಕ್​ ಆಂಡ್​ ಫೀಲ್ಡ್​ ಸ್ಪರ್ಧೆಯಲ್ಲಿ ಚಿನ್ನದ ಪದಕ ಗೆಲ್ಲುವ ಅಥ್ಲೀಟ್​ಗಳಿಗೆ 41.60 ಲಕ್ಷ ರೂ. ನಗದು ಬಹುಮಾನವೂ ಲಭಿಸಲಿದೆ.

ಟ್ರಾ$್ಯಕ್​ ಆಂಡ್​ ಫೀಲ್ಡ್​ ಕ್ರೀಡೆಯ ಜಾಗತಿಕ ಆಡಳಿತ ಸಂಸ್ಥೆಯಾದ "ವರ್ಲ್ಡ್​ ಅಥ್ಲೆಟಿಕ್ಸ್​' (ಡಬ್ಲ್ಯುಎ) ಈ ವಿಶೇಷ ಬಹುಮಾನವನ್ನು ಪ್ರಕಟಿಸಿದ್ದು, ಪ್ಯಾರಿಸ್​ನಲ್ಲಿ ನಡೆಯುವ ಎಲ್ಲ 48 ಅಥ್ಲೆಟಿಕ್ಸ್​ ಸ್ಪರ್ಧೆಗಳಲ್ಲಿ ಚಿನ್ನದ ಪದಕ ಗೆಲ್ಲುವ ಅಥ್ಲೀಟ್​ಗಳಿಗೆ ನಗದು ಬಹುಮಾನ ನೀಡಲಿದೆ. ಜತೆಗೆ 2028ರ ಲಾಸ್​ ಏಂಜಲಿಸ್​ ಒಲಿಂಪಿಕ್ಸ್​ನಿಂದ ಬೆಳ್ಳಿ ಮತ್ತು ಕಂಚು ಗೆಲ್ಲುವ ಅಥ್ಲೀಟ್​ಗಳಿಗೂ ನಗದು ಬಹುಮಾನ ವಿತರಿಸಲು ನಿರ್ಧರಿಸಿದೆ. ಕಳೆದ ಟೋಕಿಯೊ ಒಲಿಂಪಿಕ್ಸ್​ನಲ್ಲಿ ಜಾವೆಲಿನ್​ ಎಸೆತದಲ್ಲಿ ಚಿನ್ನ ಗೆದ್ದಿದ್ದ ಭಾರತದ ನೀರಜ್​ ಚೋಪ್ರಾ ಈ ಬಾರಿ ಅದನ್ನು ಉಳಿಸಿಕೊಂಡರೆ 41.60 ಲಕ್ಷ ರೂ. ನಗದು ಬಹುಮಾನವನ್ನೂ ಪಡೆಯಲಿದ್ದಾರೆ.

"ಒಲಿಂಪಿಕ್ಸ್​ ಆಯೋಜನೆಯ ಆದಾಯದಿಂದ ಅಂತಾರಾಷ್ಟ್ರೀಯ ಒಲಿಂಪಿಕ್ಸ್​ ಸಮಿತಿಯು ವಿತರಿಸುವ ಪಾಲಿನಲ್ಲಿ 19.97 ಕೋಟಿ ರೂ.ಗಳನ್ನು ಸ್ವರ್ಣ ವಿಜೇತ ಅಥ್ಲೀಟ್​ಗಳಿಗೆ ವಿತರಿಸಲಾಗುವುದು. ಈ ಮೂಲಕ ವರ್ಲ್ಡ್​ ಅಥ್ಲೆಟಿಕ್ಸ್​, ಒಲಿಂಪಿಕ್ಸ್​ ಪದಕ ವಿಜೇತರಿಗೆ ನಗದು ಬಹುಮಾನ ವಿತರಿಸುವ ಮೊದಲ ಅಂತಾರಾಷ್ಟ್ರೀಯ ಕ್ರೀಡಾ ಒಕ್ಕೂಟವಾಗಿರಲಿದೆ. ಲಾಸ್​ ಏಂಜಲಿಸ್​ ಒಲಿಂಪಿಕ್ಸ್​ನ ಮೂರೂ ಪದಕ ವಿಜೇತರಿಗೆ ವಿತರಿಸಲಾಗುವ ಬಹುಮಾನ ಮೊತ್ತದ ಪಾಲನ್ನು ಮುಂದಿನ ದಿನಗಳಲ್ಲಿ ಘೋಷಿಸಲಾಗುತ್ತದೆ' ಎಂದು ವರ್ಲ್ಡ್​ ಅಥ್ಲೆಟಿಕ್ಸ್​ ಅಧ್ಯಕ್ಷ ಸೆಬಾಸ್ಟಿಯನ್​ ಕೋಯಿ ತಿಳಿಸಿದ್ದಾರೆ. ರಿಲೇ ತಂಡಗಳಿಗೂ ಇದೇ ಬಹುಮಾನ ವಿತರಿಸಲಾಗುವುದು ಮತ್ತು ಬಹುಮಾನ ಮೊತ್ತ ತಂಡದ ಸದಸ್ಯರಿಗೆ ಹಂಚಿಕೆಯಾಗಲಿದೆ.

https://www.vijayavani.net/abhishek-sharma-credits-yuvrajs-success-this-is-because