ಒಲಿಂಪಿಕ್ಸ್ ಆತಿಥ್ಯದ ಮಹತ್ವಾಕಾಂಕ್ಷೆಯೊಂದಿಗೆ ಅಹಮದಾಬಾದ್ನಲ್ಲಿ ಈಗಾಗಲೆ 6 ಸಾವಿರ ಕೋಟಿ ರೂ. ವೆಚ್ಚದ ಕ್ರೀಡಾ ಮೂಲಸೌಕರ್ಯ ಅಭಿವೃದ್ಧಿಯ ಯೋಜನೆ ಜಾರಿಯಲ್ಲಿದೆ. ಇದರ ಮೊದಲ ಭಾಗವಾಗಿ ನರನ್ಪುರ ಕ್ರೀಡಾ ಸಂಕೀರ್ಣವನ್ನು ನಿರ್ಮಿಸಲಾಗುತ್ತಿದ್ದು, ಇದರಲ್ಲಿ ಈಜು, ಕುಸ್ತಿ, ಟೇಬಲ್ ಟೆನಿಸ್, ಜಿಮ್ನಾಸ್ಟಿಕ್ಸ್, ವಾಲಿಬಾಲ್ ಮತ್ತು ಬ್ಯಾಡ್ಮಿಂಟನ್ನಂಥ 6 ಪ್ರಮುಖ ಒಲಿಂಪಿಕ್ಸ್ ಕ್ರೀಡಾಸ್ಪರ್ಧೆಗಳನ್ನು ಆಯೋಜಿಸಬಹುದಾಗಿದೆ. ಇದು ಮಾರ್ಚ್ನಲ್ಲಿ ಉದ್ಘಾಟನೆಯಾಗುವ ನಿರೀಕ್ಷೆ ಇದೆ. "ಭಾರತಕ್ಕೆ ಒಲಿಂಪಿಕ್ಸ್ ಬಿಡ್ ಯಶಸ್ವಿಯಾದರೂ, ಆಗದಿದ್ದರೂ ಈ ಯೋಜನೆ ಪೂರ್ಣಗೊಳ್ಳಲಿದೆ' ಎಂದು ಅಧಿಕಾರಿ ತಿಳಿಸಿದ್ದಾರೆ. ನರನ್ಪುರ ಕ್ರೀಡಾ ಸಂಕೀರ್ಣ ಒಟ್ಟು 20.39 ಎಕರೆ ಪ್ರದೇಶದಲ್ಲಿ 631.77 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಿಸಲಾಗಿದೆ. ಇದರಲ್ಲಿ ಬಾಸ್ಕೆಟ್ಬಾಲ್, ಕಬಡ್ಡಿ, ಟೇಕ್ವಾಂಡೊ ಸ್ಪರ್ಧೆಗಳನ್ನೂ ನಡೆಸಬಹುದಾಗಿದೆ. ಕ್ರೀಡಾ ಶ್ರೇಷ್ಠತಾ ಕೇಂದ್ರವನ್ನೂ ಇದು ಒಳಗೊಂಡಿರಲಿದೆ.
