ಸಂಪೂರ್ಣ ಪಾಕಿಸ್ತಾನ ಕ್ರಿಕೆಟ್​ ತಂಡದ ವೇತನ ವಿರಾಟ್​ ಕೊಹ್ಲಿ, ರೋಹಿತ್​ ಶರ್ಮ ಸಂಭಾವನೆಗೆ ಸಮನಲ್ಲ!

ನವದೆಹಲಿ: ಭಾರತೀಯ ಕ್ರಿಕೆಟ್​ನ ಶ್ರೀಮಂತಿಕೆಗಿಂತ ಪಾಕಿಸ್ತಾನ ಕ್ರಿಕೆಟ್​ ಎಷ್ಟೊಂದು ಬಡವಾಗಿದೆ ಎಂದು ನಿರೂಪಿಸುವ ಅಂಕಿ-ಅಂಶಗಳು ಹೊರಬಿದ್ದಿವೆ. ಪಾಕಿಸ್ತಾನ ಕ್ರಿಕೆಟ್​ ಮಂಡಳಿ (ಪಿಸಿಬಿ) ಇತ್ತೀಚೆಗೆ 18 ಕ್ರಿಕೆಟಿಗರಿಗೆ ಕೇಂದ್ರೀಯ ಗುತ್ತಿಗೆಯನ್ನು ನೀಡಿತ್ತು. ಇದರ ಒಟ್ಟು ಮೊತ್ತವು, ಬಿಸಿಸಿಐ ಭಾರತದ ಇಬ್ಬರು ಅಗ್ರ ಕ್ರಿಕೆಟಿಗರಾದ ವಿರಾಟ್​ ಕೊಹ್ಲಿ ಮತ್ತು ರೋಹಿತ್​ ಶರ್ಮ ಅವರಿಬ್ಬರಿಗೆ ನೀಡಿರುವ ಕೇಂದ್ರಿಯ ಗುತ್ತಿಗೆ ಮೊತ್ತಕ್ಕೆ ಸಮನಲ್ಲ! ಅದರಲ್ಲೂ ಈ ಇಬ್ಬರು ಕ್ರಿಕೆಟಿಗರ ವೈಯಕ್ತಿಕ ಗುತ್ತಿಗೆ ಮೊತ್ತಕ್ಕಿಂತ ಕೇವಲ 40 ಲಕ್ಷ ರೂ. ನಷ್ಟು ಮಾತ್ರ ಅಧಿಕವಾಗಿದೆ!

ಪಿಸಿಬಿ ಕಳೆದ ಮೇನಲ್ಲಿ 2020-21ರ ಸಾಲಿನ ಕೇಂದ್ರಿಯ ಗುತ್ತಿಗೆಯನ್ನು ಪ್ರಕಟಿಸಿತ್ತು. ಇದರ ಒಟ್ಟು ಮೊತ್ತ 7.4 ಕೋಟಿ ರೂ. ಆಗಿದೆ. ಬಿಸಿಸಿಐ ಕಳೆದ ವರ್ಷ 2020ರ ಸಾಲಿನ ಕೇಂದ್ರ ಗುತ್ತಿಗೆಯನ್ನು ಭಾರತೀಯ ಕ್ರಿಕೆಟಿಗರಿಗೆ ಪ್ರಕಟಿಸಿತ್ತು. ಈ ಪೈಕಿ ವಿರಾಟ್​ ಕೊಹ್ಲಿ, ರೋಹಿತ್​ ಶರ್ಮ ಮತ್ತು ಜಸ್​ಪ್ರೀತ್​ ಬುಮ್ರಾಗೆ ಎ ಪ್ಲಸ್​ ಗುತ್ತಿಗೆ ನೀಡಿತ್ತು. ಇದರ ಮೌಲ್ಯ 7 ಕೋಟಿ ರೂ. ಹೀಗಾಗಿ ಕೊಹ್ಲಿ-ರೋಹಿತ್​ ಅವರ ಒಟ್ಟು ಸಂಭಾವನೆ 14 ಕೋಟಿ ರೂ. ಆಗುತ್ತದೆ. ಪಾಕಿಸ್ತಾನ ಕ್ರಿಕೆಟಿಗರಿಗೆ ನೀಡಿರುವ ಒಟ್ಟು ಮೊತ್ತದ ಸರಿಸುಮಾರು ದುಪ್ಪಟ್ಟು ಮೊತ್ತ ಇದಾಗಿದೆ.

ಇದನ್ನೂ ಓದಿ: ಗಂಭೀರ್​ ಮೆಚ್ಚಿದ ವಿರಾಟ್​ ಕೊಹ್ಲಿಯ ಬೆಸ್ಟ್​ ಇನಿಂಗ್ಸ್​ ಯಾವುದು ಗೊತ್ತೇ?

ಪಿಸಿಬಿ ತನ್ನ ಗುತ್ತಿಗೆ ಪಟ್ಟಿಯಲ್ಲಿ ನಾಯಕ ಬಾಬರ್​ ಅಜಮ್​, ಅಜರ್​ ಅಲಿ ಮತ್ತು ಶಹೀನ್​ ಷಾ ಅಫ್ರಿದಿಗೆ ಎ ಶ್ರೇಣಿ ನೀಡಿತ್ತು. ಇದರ ಮೌಲ್ಯ 60 ಲಕ್ಷ ರೂಪಾಯಿ. ಬಿ ಶ್ರೇಣಿಯಲ್ಲಿರುವ ಅಸದ್​ ಶಫಿಕ್​, ಹ್ಯಾರಿಸ್​ ಸೋಹೈಲ್​, ಮೊಹಮದ್​ ಅಬ್ಬಾಸ್​ ಮತ್ತು ಇತರ 6 ಆಟಗಾರರ ವಾರ್ಷಿಕ ಸಂಭಾವನೆ 41 ಲಕ್ಷ ರೂಪಾಯಿ. ಇನ್ನು ಸಿ ಶ್ರೇಣಿಯಲ್ಲಿರುವ 6 ಆಟಗಾರರ ವಾರ್ಷಿಕ ಸಂಭಾವನೆ 30 ಲಕ್ಷ ರೂಪಾಯಿ.

ಅತ್ತ ಪಾಕಿಸ್ತಾನ ಗರಿಷ್ಠ ಗುತ್ತಿಗೆಯೇ ಲಕ್ಷ ರೂ. ಲೆಕ್ಕಾಚಾರದಲ್ಲಿದ್ದರೆ, ಭಾರತೀಯ ಕ್ರಿಕೆಟಿಗರ ಸಿ ಶ್ರೇಣಿಯ ಗುತ್ತಿಗೆಯೂ ಕೋಟಿ ರೂಪಾಯಿ ಲೆಕ್ಕಕ್ಕಿಂತ ಕಡಿಮೆ ಇಲ್ಲ. ಭಾರತದ ಎ ಶ್ರೇಣಿಯ ಗುತ್ತಿಗೆ ಆಟಗಾರರು ವಾರ್ಷಿಕ 5 ಕೋಟಿ ರೂ. ಸಂಭಾವನೆ ಪಡೆಯುತ್ತಿದ್ದರೆ, ಬಿ ಮತ್ತು ಸಿ ಶ್ರೇಣಿ ಕ್ರಿಕೆಟಿಗರು ಕ್ರಮವಾಗಿ 3 ಮತ್ತು 1 ಕೋಟಿ ರೂ. ಸಂಭಾವನೆ ಪಡೆಯುತ್ತಿದ್ದಾರೆ. ಇನ್ನು ಭಾರತದ ಕೆಲ ಕ್ರಿಕೆಟಿಗರು ಐಪಿಎಲ್​ನಲ್ಲಿ ಪಡೆಯುತ್ತಿರುವ ಸಂಭಾವನೆಗೆ ಹೋಲಿಸಿದರೂ, ಸಂಪೂರ್ಣ ಪಾಕಿಸ್ತಾನ ತಂಡ ವಾರ್ಷಿಕ ಸಂಭಾವನೆ ಸಾಟಿ ಎನಿಸುವುದಿಲ್ಲ.

https://www.vijayavani.net/womens-sportstars-in-black-and-white-challenge/