Cricket: ಶಬ್ದ ಮಾಲಿನ್ಯದ ಭೀತಿಯಿಂದಾಗಿ ಪಾಕ್​-ಬಾಂಗ್ಲಾ ಟೆಸ್ಟ್​ ಪಂದ್ಯ ಸ್ಥಳಾಂತರ!

ಲಾಹೋರ್​: ಮಳೆ, ಭದ್ರತಾ ಭೀತಿ, ರಾಜತಾಂತ್ರಿಕ ಬಿಕ್ಕಟ್ಟು, ವಾಯು ಮಾಲಿನ್ಯ ಮುಂತಾದ ಕಾರಣಗಳಿಂದಾಗಿ ಕ್ರಿಕೆಟ್​ ಪಂದ್ಯಗಳು ಸ್ಥಳಾಂತರಗೊಂಡಿರುವುದನ್ನು ಕೇಳಿರುತ್ತೀರಿ. ಆದರೆ ಪಾಕಿಸ್ತಾನ ಮತ್ತು ಬಾಂಗ್ಲಾದೇಶ ನಡುವಿನ ಟೆಸ್ಟ್​ ಪಂದ್ಯವೊಂದು ಇದೆಲ್ಲಕಿಂತಲೂ ಮುಗಿಲಾದ ಕಾರಣಗಳಿಂದಾಗಿ ಸ್ಥಳಾಂತರಗೊಂಡಿರುವುದು ಕ್ರಿಕೆಟ್​ ಪ್ರೇಮಿಗಳ ಗಮನಸೆಳೆದಿದೆ.

ಕರಾಚಿಯಲ್ಲಿ ನಡೆಯಬೇಕಿದ್ದ ಬಾಂಗ್ಲಾದೇಶ ವಿರುದ್ಧದ 2ನೇ ಟೆಸ್ಟ್​ ಪಂದ್ಯವನ್ನು ಶಬ್ದ ಮಾಲಿನ್ಯದ ಭೀತಿಯಿಂದಾಗಿ ರಾವಲ್ಪಿಂಡಿಗೆ ಸ್ಥಳಾಂತರಿಸಲು ಪಾಕಿಸ್ತಾನ ಕ್ರಿಕೆಟ್​ ಮಂಡಳಿ (ಪಿಸಿಬಿ) ಭಾನುವಾರ ನಿರ್ಧರಿಸಿದೆ. ಸರಣಿಯ ಮೊದಲ ಪಂದ್ಯ ಈಗಾಗಲೆ ಆಗಸ್ಟ್​ 21ರಿಂದ ರಾವಲ್ಪಿಂಡಿಯಲ್ಲೇ ನಿಗದಿಯಾಗಿದೆ.

ಮುಂದಿನ ವರ್ಷದ ಐಸಿಸಿ ಚಾಂಪಿಯನ್ಸ್​ ಟ್ರೋಫಿಗೆ ಪೂರ್ವಭಾವಿಯಾಗಿ ಕರಾಚಿ ಸ್ಟೇಡಿಯಂನಲ್ಲಿ ನವೀಕರಣ ಕೆಲಸಗಳು ನಡೆಯುತ್ತಿವೆ. ಹೀಗಾಗಿ ಕಾಮಗಾರಿಯ ವೇಳೆ ಭಾರಿ ಗಾತ್ರದ ಪರಿಕರಗಳಿಂದ ದೊಡ್ಡ ಶಬ್ದಗಳು ಉಂಟಾಗುವ ಸಾಧ್ಯತೆಗಳಿವೆ. ಇದು ಟೆಸ್ಟ್​ ಪಂದ್ಯದ ವೇಳೆ ಆಟಗಾರರಿಗೆ ಕಿರಿಕಿರಿ ತರಬಹುದು ಎಂಬ ಭೀತಿಯಿಂದ ಪಂದ್ಯ ಸ್ಥಳಾಂತರಿಸಲು ಪಿಸಿಬಿ ನಿರ್ಧರಿಸಿದೆ. 2025ರ ಫೆಬ್ರವರಿಯಲ್ಲೇ ನಡೆಯಲಿರುವ ಚಾಂಪಿಯನ್ಸ್ ಟ್ರೋಫಿ ಸಿದ್ಧತೆಯಲ್ಲಿ ಪಾಕ್​ ಈಗಾಗಲೆ ಸಾಕಷ್ಟು ಹಿಂದುಳಿದಿದೆ. ಹೀಗಾಗಿ ಕರಾಚಿಯಲ್ಲಿ ಟೆಸ್ಟ್​ ಪಂದ್ಯದ ವೇಳೆ ಕಾಮಗಾರಿ ಕೆಲಸವನ್ನು ಸ್ಥಗಿತಗೊಳಿಸುವಷ್ಟು ಸಮಯಾವಕಾಶ ಪಿಸಿಬಿ ಬಳಿ ಇಲ್ಲ. ಹೀಗಾಗಿ ಟೆಸ್ಟ್​ ಪಂದ್ಯಕ್ಕೆ ಶಬ್ದದಿಂದ ಕಿರಿಕಿರಿಯಾಗುವುದನ್ನು ತಪ್ಪಿಸಲು ಪಿಸಿಬಿ ಸ್ಥಳಾಂತರದ ನಿರ್ಧಾರ ತೆಗೆದುಕೊಂಡಿದೆ.

https://www.vijayavani.net/smaran-rs-sensational-century-leads-gulbarga-mystics-to-thrilling-last-ball-victory-over-mysore-warriors