ರಣಜಿ ಟ್ರೋಫಿಯಲ್ಲಿ ಕರ್ನಾಟಕಕ್ಕೆ ಪಡಿಕ್ಕಲ್​ ಶತಕದಾಸರೆ; ತಮಿಳುನಾಡು ಎದುರು ಗೌರವಯುತ ಮೊತ್ತದತ್ತ ಹೆಜ್ಜೆ

ಚೆನ್ನೈ: ಎಡಗೈ ಬ್ಯಾಟರ್​ ದೇವದತ್​ ಪಡಿಕಲ್​ (151*ರನ್​, 216 ಎಸೆತ, 12 ಬೌಂಡರಿ, 6 ಸಿಕ್ಸರ್​) ಭರ್ಜರಿ ಬ್ಯಾಟಿಂಗ್​ ನಿರ್ವಹಣೆಯ ಬಲದಿಂದ ಕರ್ನಾಟಕ ತಂಡ ಪ್ರತಿಷ್ಠಿತ ದೇಶೀಯ ಕ್ರಿಕೆಟ್​ ಟೂರ್ನಿ ರಣಜಿ ಟ್ರೋಫಿಯಲ್ಲಿ ತನ್ನ 6ನೇ ಲೀಗ್​ ಪಂದ್ಯದಲ್ಲಿ ಆತಿಥೇಯ ತಮಿಳುನಾಡು ಎದುರು ಗೌರವಯುತ ಮೊತ್ತದತ್ತ ಮುನ್ನಡೆದಿದೆ.

ಎಂಎ ಚಿದಂಬರಂ ಕ್ರೀಡಾಂಗಣದಲ್ಲಿ ಶುಕ್ರವಾರ ಆರಂಭಗೊಂಡ ಪಂದ್ಯದಲ್ಲಿ ಟಾಸ್​ ಗೆದ್ದು ಬ್ಯಾಟಿಂಗ್​ ಆಯ್ದ ಕರ್ನಾಟಕ ತಂಡ ಮೊದಲ ದಿನದಂತ್ಯಕ್ಕೆ 90 ಓವರ್​ಗಳಲ್ಲಿ 5 ವಿಕಟ್​ಗೆ 288 ರನ್​ ಪೇರಿಸಿದೆ. ಶತಕವೀರ ಪಡಿಕ್ಕಲ್​ ಜತೆಗೆ ಹಾರ್ದಿಕ್​ ರಾಜ್​ (35*) ಕ್ರೀಸ್​ನಲ್ಲಿದ್ದಾರೆ. ದೇವದತ್​ ಪಡಿಕ್ಕಲ್​ ಪ್ರಥಮ ದರ್ಜೆ ಕ್ರಿಕೆಟ್​ನಲ್ಲಿ 6ನೇ ಮತ್ತು ಹಾಲಿ ರಣಜಿ ಟ್ರೋಫಿಯಲ್ಲಿ 3ನೇ ಶತಕ ಸಿಡಿಸಿದರು.

ಪಡಿಕ್ಕಲ್​ ಏಕಾಂಗಿ ಆರ್ಭಟ

ರಾಜ್ಯ ತಂಡದ ಇತರ ಪ್ರಮುಖ ಬ್ಯಾಟರ್​ಗಳ ವೈಲ್ಯ ಮುಂದುವರಿದ ನಡುವೆ ದೇವದತ್​ ಪಡಿಕ್ಕಲ್​, ಮೊದಲ ದಿನದಾಟದಲ್ಲಿ ರಾಜ್ಯ ತಂಡ ಗಳಿಸಿದ ಮೊತ್ತದಲ್ಲಿ ಅರ್ಧಕ್ಕಿಂತಲೂ ಹೆಚ್ಚಿನ ಕೊಡುಗೆ ನೀಡಿ ಏಕಾಂಗಿ ಹೋರಾಟ ತೋರಿದರು. ಇಂಗ್ಲೆಂಡ್​ ಲಯನ್ಸ್​ ವಿರುದ್ಧದ ಚತುರ್ದಿನ ಪಂದ್ಯಕ್ಕೆ ಭಾರತ ಎ ತಂಡದಲ್ಲಿ ಸ್ಥಾನ ಪಡೆದಿದ್ದ ಕಾರಣ ಪಡಿಕ್ಕಲ್​ ಕಳೆದೆರಡು ರಣಜಿ ಪಂದ್ಯ ತಪ್ಪಿಸಿಕೊಂಡಿದ್ದರು. 2ನೇ ವಿಕೆಟ್​ಗೆ ಆರ್​. ಸಮರ್ಥ್​ (57) ಜತೆಗೆ 132 ರನ್​ ಜತೆಯಾಟವಾಡುವ ಮೂಲಕ ರಾಜ್ಯ ತಂಡಕ್ಕೆ ಆರಂಭಿಕ ಆಘಾತದಿಂದ ಚೇತರಿಕೆ ಒದಗಿಸಿದ ಪಡಿಕ್ಕಲ್​ ದಿನದಂತ್ಯದಲ್ಲಿ ಹಾರ್ದಿಕ್​ ರಾಜ್​ ಜತೆಗೆ ಮುರಿಯದ 6ನೇ ವಿಕೆಟ್​ಗೆ 54 ರನ್​ ಸೇರಿಸಿ ತಂಡ ಸಾಧಾರಣ ಮೊತ್ತಕ್ಕೆ ಕುಸಿಯದಂತೆ ನೋಡಿಕೊಂಡರು.

ಮಯಾಂಕ್​, ನಿಕಿನ್​ಗೆ ನಿರಾಸೆ

ವಿಮಾನದಲ್ಲಿ ಅಸ್ವಸ್ಥಗೊಂಡ ಪ್ರಕರಣದ ಬಳಿಕ ಚೇತರಿಸಿಕೊಂಡು ಮರಳಿ ಕಣಕ್ಕಿಳಿದ ನಾಯಕ ಮಯಾಂಕ್​ ಅಗರ್ವಾಲ್​ (20) ಹೆಚ್ಚುಕಾಲ ಕ್ರೀಸ್​ನಲ್ಲಿ ನಿಲ್ಲದೆ, ಎದುರಾಳಿ ನಾಯಕ ಹಾಗೂ ಸ್ಪಿನ್ನರ್​ ಸಾಯಿ ಕಿಶೋರ್​ಗೆ (94ಕ್ಕೆ 3) ವಿಕೆಟ್​ ಒಪ್ಪಿಸಿದರು. ಹಂಗಾಮಿ ನಾಯಕನಾಗಿ ಆಡಿದ ಕಳೆದ ಪಂದ್ಯದಲ್ಲಿ ಅವಳಿ ಸೊನ್ನೆ ಸುತ್ತಿದ್ದ ನಿಕಿನ್​ ಜೋಸ್​ (13) ಈ ಸಲವೂ ವೈಲ್ಯ ಮುಂದುವರಿಸಿದರು. ಕಳೆದ ಪಂದ್ಯದ ಗೆಲುವಿನ ಹೀರೋ ಮನೀಷ್​ ಪಾಂಡೆ (1) ಈ ಬಾರಿ ಖಾತೆ ತೆರೆದಿದ್ದಷ್ಟೇ ಸಾಧನೆ. ಕಿಶನ್​ ಬಿದರೆ (3) ಕಿಶೋರ್​ ಸ್ಪಿನ್​ ಜಾಲಕ್ಕೆ ಬಿದ್ದರು. 8 ರನ್​ ಅಂತರದಲ್ಲಿ 3 ವಿಕೆಟ್​ ಕಳೆದುಕೊಂಡ ರಾಜ್ಯ ತಂಡಕ್ಕೆ ಪಡಿಕ್ಕಲ್​-ಹಾರ್ದಿಕ್​ ಜೋಡಿ ಆಧಾರವಾಯಿತು.

ಕೌಶಿಕ್​ ಬದಲಿಗೆ ಶಶಿಕುಮಾರ್​

ಮಯಾಂಕ್​ ಅಗರ್ವಾಲ್​ ಮತ್ತು ದೇವದತ್​ ಪಡಿಕ್ಕಲ್​ ಮರಳಿ ತಂಡ ಕೂಡಿಕೊಂಡ ಕಾರಣ ನಿರೀಕ್ಷೆಯಂತೆಯೇ ಡಿ. ನಿಶ್ಚಲ್​ ಮತ್ತು ಕೆವಿ ಅನೀಶ್​ ಹೊರಗುಳಿದರು. ಇನ್ನು ಪಿಚ್​ ಗಮನದಲ್ಲಿಟ್ಟುಕೊಂಡು 3ನೇ ವೇಗಿ ಬದಲಿಗೆ 2ನೇ ಸ್ಪಿನ್ನರ್​ಗೆ ರಾಜ್ಯ ತಂಡ ಆದ್ಯತೆ ನೀಡಿದ ಕಾರಣ, ವಾಸುಕಿ ಕೌಶಿಕ್​ ಹೊರಗುಳಿದರು ಮತ್ತು ಯುವ ಆ್​ ಸ್ಪಿನ್ನರ್​ ಶಶಿಕುಮಾರ್​ ಸ್ಥಾನ ಪಡೆದರು.

ಕರ್ನಾಟಕ: 90 ಓವರ್​ಗಳಲ್ಲಿ 5 ವಿಕೆಟ್​ಗೆ 288 (ಸಮರ್ಥ್​ 57, ಮಯಾಂಕ್​ 20, ಪಡಿಕ್ಕಲ್​ 151*, ನಿಕಿನ್​ ಜೋಸ್​ 13, ಮನೀಷ್​ ಪಾಂಡೆ 1, ಕಿಶನ್​ ಬಿದರೆ 3, ಹಾರ್ದಿಕ್​ ರಾಜ್​ 35*, ಸಾಯಿ ಕಿಶೋರ್​ 94ಕ್ಕೆ 3, ಅಜಿತ್​ ರಾಮ್​ 53ಕ್ಕೆ 2).

https://www.vijayavani.net/paris-olympics-medals-are-monumental-theyre-made-with-metal-chunks-from-the-eiffel-tower