ಇಶಾನ್​ ಕಿಶನ್​ ಟೀಮ್​ ಇಂಡಿಯಾದಿಂದ ಹೊರಗುಳಿಯಲು ಅಹಂ ಕಾರಣ?

ನವದೆಹಲಿ: ದಕ್ಷಿಣ ಆಫ್ರಿಕಾದಲ್ಲಿ ಟೆಸ್ಟ್​ ಸರಣಿ ಆರಂಭಕ್ಕೆ ಮುನ್ನ ದಿಢೀರನೆ, ಮಾನಸಿಕ ಆರೋಗ್ಯದ ನೆಪನೀಡಿ ತವರಿಗೆ ಮರಳಿದ್ದ ಟೀಮ್​ ಇಂಡಿಯಾದ ವಿಕೆಟ್​ ಕೀಪರ್​-ಬ್ಯಾಟರ್​ ಇಶಾನ್​ ಕಿಶನ್​ ನಂತರ ತವರಿನಲ್ಲಿ ನಡೆದ ಅಫ್ಘಾನಿಸ್ತಾನ ವಿರುದ್ಧದ ಟಿ20 ಸರಣಿಗೂ ಮರಳಲಿಲ್ಲ. ಪ್ರವಾಸಿ ಇಂಗ್ಲೆಂಡ್​ ವಿರುದ್ಧದ ಟೆಸ್ಟ್​ ಸರಣಿಯಿಂದಲೂ ದೂರ ಉಳಿದಿದ್ದಾರೆ. ರಾಷ್ಟ್ರೀಯ ತಂಡಕ್ಕೆ ಮರಳುವ ಮುನ್ನ ರಣಜಿ ಟ್ರೋಫಿಯಲ್ಲಿ ಆಡಬೇಕೆಂಬ ಕೋಚ್​ ರಾಹುಲ್​ ದ್ರಾವಿಡ್​ ಸೂಚನೆಯನ್ನೂ ಪಾಲಿಸಿಲ್ಲ. ಇದರ ನಡುವೆ, ಇಶಾನ್​ ಕಿಶನ್​ ದ. ಆಫ್ರಿಕಾ ಪ್ರವಾಸದಿಂದ ಅರ್ಧದಲ್ಲೇ ಹಿಂದಿರುಗಲು, ಅಹಂ ಸಂಘರ್ಷವೇ ಕಾರಣ ಎಂದು ವರದಿಯಾಗಿದೆ.

ದ. ಆಫ್ರಿಕಾದಲ್ಲಿ ಟೆಸ್ಟ್​ ಸರಣಿಗೆ ಮುನ್ನ ನಡೆದ ಟಿ20 ಸರಣಿಯಲ್ಲಿ ಇಶಾನ್​ ಕಿಶನ್​ ತಂಡದಲ್ಲಿದ್ದರೂ, ಅವರನ್ನು ಕೈಬಿಟ್ಟು ಜಿತೇಶ್​ ಶರ್ಮ ಅವರನ್ನು ವಿಕೆಟ್​ ಕೀಪರ್​-ಬ್ಯಾಟರ್​ ಆಗಿ ಆಡಿಸಲಾಗಿತ್ತು. ಇದು ಇಶಾನ್​ ಕಿಶನ್​ ಅಹಂಗೆ ಪೆಟ್ಟು ನೀಡಿತ್ತು. ಏಕದಿನ ವಿಶ್ವಕಪ್​ನಲ್ಲಿ 2 ಪಂದ್ಯಗಳನ್ನಷ್ಟೇ ಆಡಿದ್ದ ಕಿಶನ್​, ನಂತರ ಆಸೀಸ್​ ವಿರುದ್ಧದ ಟಿ20 ಸರಣಿಯಲ್ಲಿ 2 ಅರ್ಧಶತಕ ಬಾರಿಸಿ ಮಿಂಚಿದ್ದರು. ಹೀಗಾಗಿ ದ. ಆಫ್ರಿಕಾದಲ್ಲೂ ಅವರು ಆರಂಭಿಕ 11ರ ಬಳಗದಲ್ಲೇ ಸ್ಥಾನ ನಿರೀಕ್ಷಿಸಿದ್ದರು. ಇದೇ ಬೇಸರದಲ್ಲಿ ಕಿಶನ್​ ಮಾನಸಿಕ ಆರೋಗ್ಯದ ನೆಪ ನೀಡಿ ತಂಡದಿಂದ ಹೊರನಡೆದರು ಎನ್ನಲಾಗಿದೆ.

ಪಾಂಡ್ಯ ಬ್ರದರ್ಸ್​ ಜತೆ ಅಭ್ಯಾಸ ಆರಂಭ

ದ್ರಾವಿಡ್​ ಸೂಚನೆಯ ನಡುವೆಯೂ ರಣಜಿ ಟ್ರೋಫಿ ಪಂದ್ಯಗಳಿಂದ ಹೊರಗುಳಿಯುತ್ತಲೇ ಬಂದಿರುವ ಇಶಾನ್​ ಕಿಶನ್​ ಸದ್ಯ ಬರೋಡದ ಕಿರಣ್​ ಮೋರೆ ಅಕಾಡೆಮಿಯಲ್ಲಿ ಅಭ್ಯಾಸ ಆರಂಭಿಸಿದ್ದಾರೆ. ಆಲ್ರೌಂಡರ್​ಗಳಾದ ಹಾರ್ದಿಕ್​ ಪಾಂಡ್ಯ ಮತ್ತು ಕೃನಾಲ್​ ಪಾಂಡ್ಯ ಸಹೋದರರು ಕಿಶನ್​ ಅಭ್ಯಾಸಕ್ಕೆ ಸಾಥ್​ ನೀಡುತ್ತಿದ್ದಾರೆ ಎನ್ನಲಾಗಿದೆ. ಶುಕ್ರವಾರದಿಂದ ರಣಜಿ ಟ್ರೋಫಿಯ 6ನೇ ಸುತ್ತಿನ ಲೀಗ್​ ಪಂದ್ಯಗಳು ನಡೆಯಲಿದ್ದು, ಜಾರ್ಖಂಡ್​ ತಂಡ ಜಮ್ಶೆಡ್​ಪುರದಲ್ಲಿ ಹರಿಯಾಣ ವಿರುದ್ಧ ಆಡಲಿದೆ. ಆದರೆ ಕಿಶನ್​ ಈ ಪಂದ್ಯದಿಂದಲೂ ದೂರ ಉಳಿದಿದ್ದಾರೆ.

https://www.vijayavani.net/we-drop-the-shoulder-and-go-hard-brendon-mccullum-fires-warning-ahead-of-rajkot-test