ಆಸ್ಟ್ರೆಲಿಯನ್​ ಓಪನ್​ನಿಂದ ಹಿಂದೆ ಸರಿದ ರಾಫೆಲ್​ ನಡಾಲ್​; ಹೀಗಿದೆ ಕಾರಣ...

ಮೆಲ್ಬೋರ್ನ್​: ಇತ್ತೀಚೆಗಷ್ಟೇ ಪೂರ್ಣ ಫಿಟ್ನೆಸ್​ನೊಂದಿಗೆ ಸರಿಸುಮಾರು ಒಂದು ವರ್ಷದ ಬಳಿಕ ವೃತ್ತಿಪರ ಟೆನಿಸ್​ಗೆ ಮರಳಿದ್ದ 22 ಗ್ರಾಂಡ್​ ಸ್ಲಾಂ ಪ್ರಶಸ್ತಿ ವಿಜೇತ ಸ್ಪೇನ್​ ತಾರೆ ರಾಫೆಲ್​ ನಡಾಲ್​ ಮತ್ತೆ ಗಾಯಗೊಂಡಿದ್ದಾರೆ. ಇದರಿಂದಾಗಿ ಅವರು ಮುಂಬರುವ ವರ್ಷದ ಮೊದಲ ಗ್ರಾಂಡ್​ ಸ್ಲಾಂ ಟೆನಿಸ್​ ಟೂರ್ನಿ ಆಸ್ಟ್ರೆಲಿಯನ್​ ಓಪನ್​ನಿಂದ ಹಿಂದೆ ಸರಿದಿದ್ದಾರೆ.

ಗಾಯದಿಂದ ಚೇತರಿಸಿಕೊಂಡು ಮರಳಿ ಕಣಕ್ಕಿಳಿದ ಮೊದಲ ಟೂರ್ನಿ ಬ್ರಿಸ್ಬೇನ್​ ಓಪನ್​ನ ಕ್ವಾರ್ಟರ್​ಫೈನಲ್​ ವೇಳೆ ನಡಾಲ್​ ಮತ್ತೆ ಗಾಯದ ಸಮಸ್ಯೆ ಎದುರಿಸಿದ್ದರು. ಜೋರ್ಡನ್​ ಥಾಂಪ್ಸನ್​ ವಿರುದ್ಧದ ಪಂದ್ಯದ 3ನೇ ಸೆಟ್​ ವೇಳೆ ವೈದ್ಯಕಿಯ ಟೈಮ್​ಔಟ್​ ತೆಗೆದುಕೊಂಡಿದ್ದ 37 ವರ್ಷದ ನಡಾಲ್​ ಅಂತಿಮವಾಗಿ 7-5, 6-7, 3-6ರಿಂದ ಸೋತಿದ್ದರು. ಕಳೆದ ವರ್ಷ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದ ಅವರ ಸೊಂಟದ ಸ್ನಾಯುವಿನಲ್ಲೇ ಮತ್ತೆ ನೋವು ಕಾಣಿಸಿಕೊಂಡಿದೆ.

ಮೆಲ್ಬೋರ್ನ್​ಗೆ ತೆರಳಿದ ಬಳಿಕ ಸ್ಕ್ಯಾನ್​ಗೆ ಒಳಗಾಗಿದ್ದು ಈ ವೇಳೆ ಸ್ನಾಯುವಿನಲ್ಲಿ ಸಣ್ಣ ಬಿರುಕು ಕಾಣಿಸಿದ್ದು, ಹೆಚ್ಚಿನ ಚಿಕಿತ್ಸೆಗೆ ತವರೂರು ಸ್ಪೇನ್​ಗೆ ಮರಳುತ್ತಿರುವುದಾಗಿ ನಡಾಲ್​ ಸಾಮಾಜಿಕ ಜಾಲತಾಣದಲ್ಲಿ ಭಾನುವಾರ ಪ್ರಕಟಿಸಿದ್ದಾರೆ. ಆಸ್ಟ್ರೆಲಿಯನ್​ ಓಪನ್​ ಮುಂದಿನ ಭಾನುವಾರ ಮೆಲ್ಬೋರ್ನ್​ ಪಾರ್ಕ್​ನಲ್ಲಿ ಶುರುವಾಗಲಿದೆ.

https://www.vijayavani.net/deeptis-all-round-show-in-vain-as-australia-level-t20-series-against-india