ಮುಂಬೈ ಇಂಡಿಯನ್ಸ್​ vs ಪಂಜಾಬ್​ ಕಿಂಗ್ಸ್​: ಫೈನಲ್​ ಪ್ರವೇಶಿಸುವವರು ಯಾರು? ಬಲಾಬಲ ಹೇಗಿದೆ? ಇಲ್ಲಿದೆ ಮಾಹಿತಿ... IPL 2025

IPL 2025: ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ತಂಡ ಈಗಾಗಲೇ 18 ನೇ ಸೀಸನ್ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಟಿ20 ಟೂರ್ನಮೆಂಟ್‌ನ ಫೈನಲ್ ತಲುಪಿದೆ. ಇದೀಗ ಎರಡನೇ ಫೈನಲಿಸ್ಟ್ ಯಾರೆಂಬುದನ್ನು ನಿರ್ಧರಿಸುವ ಹೋರಾಟದ ಸಮಯ. ಇಂದು ನಡೆಯಲಿರುವ ಕ್ವಾಲಿಫೈಯರ್ -2 ರಲ್ಲಿ ಪಂಜಾಬ್ ಕಿಂಗ್ಸ್ ತಂಡ ಮುಂಬೈ ಇಂಡಿಯನ್ಸ್ ಅನ್ನು ಎದುರಿಸಲಿದೆ. ಕ್ವಾಲಿಫೈಯರ್ -1 ರಲ್ಲಿ ಆರ್​​ಸಿಬಿ ಕೈಯಲ್ಲಿ ಹೀನಾಯ ಸೋಲು ಅನುಭವಿಸಿದ ಪಂಜಾಬ್, ಇಂದಿನ ಪಂದ್ಯದಲ್ಲಿ ತಮ್ಮ ಶಕ್ತಿಯನ್ನು ಪ್ರದರ್ಶಿಸಲು ಮತ್ತು ಫೈನಲ್‌ನಲ್ಲಿ ಮತ್ತೊಮ್ಮೆ ಬೆಂಗಳೂರನ್ನು ಎದುರಿಸಲು ಆಶಿಸುತ್ತಿದೆ.

ಮತ್ತೊಂದೆಡೆ, ಮುಂಬೈ ತಂಡ ಎಲಿಮಿನೇಟರ್‌ನಲ್ಲಿ ಗುಜರಾತ್ ಟೈಟಾನ್ಸ್ ತಂಡವನ್ನು ಸೋಲಿಸಿದ ನಂತರ ಪಂಜಾಬ್ ವಿರುದ್ಧ ಗೆದ್ದು ಫೈನಲ್ ತಲುಪಲು ದೃಢನಿಶ್ಚಯ ಹೊಂದಿದೆ. ಕ್ವಾಲಿಫೈಯರ್-1 ರಲ್ಲಿ ಅಗ್ರ ಕ್ರಮಾಂಕದ ವೈಫಲ್ಯದ ನಂತರ ಪಂಜಾಬ್ 101 ರನ್‌ಗಳಿಗೆ ಸೀಮಿತಗೊಂಡಿದ್ದರೆ, ಎಲಿಮಿನೇಟರ್‌ನಲ್ಲಿ ಗುಜರಾತ್‌ನ ಬೌಲಿಂಗ್ ಅನ್ನು ಮೀರಿಸಿ ಮುಂಬೈ ಬೃಹತ್ ಸ್ಕೋರ್ ಗಳಿಸಿತು. ಈ ಋತುವಿನಲ್ಲಿ ಉಭಯ ತಂಡಗಳ ನಡುವಿನ ಹಣಾಹಣಿಯಲ್ಲಿ ಪಂಜಾಬ್ ಜಯಭೇರಿ ಬಾರಿಸಿತು. ಒಮ್ಮೆಯೂ ಪ್ರಶಸ್ತಿ ಗೆಲ್ಲದ ಪಂಜಾಬ್ ಕಿಂಗ್ಸ್, ಐದು ಬಾರಿಯ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ವಿರುದ್ಧ ಹೇಗೆ ಸೆಣಸಾಡುತ್ತದೆ ಎಂಬುದನ್ನು ಕಾದು ನೋಡಬೇಕಾಗಿದೆ!

ಅಗ್ರ ಕ್ರಮಾಂಕವು ಉತ್ತಮ ಪ್ರದರ್ಶನ ನೀಡಿದರೆ ಮಾತ್ರ

ಈ ಋತುವಿನಲ್ಲಿ ಆಡಿದ 15 ಪಂದ್ಯಗಳಲ್ಲಿ ಏಳರಲ್ಲಿ ಇನ್ನೂರುಕ್ಕೂ ಹೆಚ್ಚು ರನ್​ ಗಳಿಸಿರುವ ಪಂಜಾಬ್, ಅಗ್ರ ಕ್ರಮಾಂಕದ ಪ್ರದರ್ಶನದ ಮೇಲೆ ಹೆಚ್ಚು ಅವಲಂಬಿತವಾಗಿದೆ. ಆರಂಭಿಕ ಆಟಗಾರರಾದ ಪ್ರಭ್ಸಿಮ್ರನ್ ಸಿಂಗ್ ಮತ್ತು ಪ್ರಿಯಾಂಶ್ ಆರ್ಯ, ಇಂಗ್ಲಿಸ್ ಮತ್ತು ಶ್ರೇಯಸ್ ಅವರ ಪ್ರತಿಭೆಯೊಂದಿಗೆ, ಪಂಜಾಬ್ ಸತತ ಗೆಲುವು ಸಾಧಿಸಿದೆ. ಆದಾಗ್ಯೂ, ತವರು ನೆಲದಲ್ಲಿ ನಡೆದ ಕ್ವಾಲಿಫೈಯರ್-1 ರಲ್ಲಿ, ಈ ನಾಲ್ವರು ವಿಫರಾದರು. ಇದರ ಪರಿಣಾಮ ತಂಡವು ಬೆಲೆ ತೆರಬೇಕಾಯಿತು.

ಐಪಿಎಲ್‌ನಲ್ಲಿ ಮೂರು ವಿಭಿನ್ನ ತಂಡಗಳನ್ನು 'ಪ್ಲೇ-ಆಫ್'ಗೆ ಕರೆದೊಯ್ದ ಶ್ರೇಯಸ್ ಅಯ್ಯರ್ ನಾಯಕತ್ವದಲ್ಲಿ ಮತ್ತು ರಿಕಿ ಪಾಂಟಿಂಗ್ ಅವರ ತಂತ್ರಗಳ ಸಹಾಯದಿಂದ, ಪಂಜಾಬ್ ಈ ಋತುವಿನಲ್ಲಿ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿ ಉಳಿಯುವಲ್ಲಿ ಯಶಸ್ವಿಯಾಯಿತು. ಇದರೊಂದಿಗೆ, ಕ್ವಾಲಿಫೈಯರ್-1 ರಲ್ಲಿ ಸೋತರೂ ಫೈನಲ್ ತಲುಪಲು ಅವರಿಗೆ ಮತ್ತೊಂದು ಅವಕಾಶ ಸಿಕ್ಕಿತು. ಈ ಋತುವಿನಲ್ಲಿ ಪಂಜಾಬ್ ಪರ ಪ್ರಭ್ಸಿಮ್ರನ್ 517 ರನ್ ಗಳಿಸುವ ಮೂಲಕ ಅತಿ ಹೆಚ್ಚು ರನ್​ ಗಳಿಸಿದ್ದಾರೆ. ಶ್ರೇಯಸ್ 516 ರನ್ ಗಳಿಸಿದ್ದು, ಪ್ರಿಯಾಂಶ್ 431 ರನ್ ಗಳಿಸಿದ್ದಾರೆ. ಈ ಮೂವರ ಜೊತೆಗೆ, ಇಂಗ್ಲಿಸ್, ನೆಹಾಲ್, ಶಶಾಂಕ್ ಮತ್ತು ಸ್ಟೊಯಿನಿಸ್ ಉತ್ತಮ ಪ್ರದರ್ಶನ ನೀಡುತ್ತಾರೆ ಎಂದು ತಂಡದ ಆಡಳಿತ ಮಂಡಳಿ ಆಶಿಸುತ್ತಿದೆ.

ಗಾಯದಿಂದಾಗಿ ಕಳೆದ ಮೂರು ಪಂದ್ಯಗಳನ್ನು ತಪ್ಪಿಸಿಕೊಂಡಿದ್ದ ಸ್ಪಿನ್ನರ್ ಯುಜುವೇಂದ್ರ ಚಾಹಲ್ ಈ ಪಂದ್ಯವನ್ನು ಆಡುವ ಸಾಧ್ಯತೆಯಿದೆ. ಅರ್ಷದೀಪ್​ ಸಿಂಗ್, ಅಜ್ಮತುಲ್ಲಾ, ಜೇಮಿಸನ್ ಮತ್ತು ಹರ್‌ಪ್ರೀತ್ ಬ್ರಾರ್ ಬೌಲಿಂಗ್ ವಿಭಾಗದಲ್ಲಿ ಪ್ರಮುಖ ಪಾತ್ರ ವಹಿಸಲಿದ್ದಾರೆ. ಕಳೆದ ಪಂದ್ಯದ ತಪ್ಪುಗಳನ್ನು ಅವರು ಸರಿಪಡಿಸದಿದ್ದರೆ 11 ವರ್ಷಗಳ ನಂತರ 'ಪ್ಲೇ-ಆಫ್' ತಲುಪಿರುವ ಪಂಜಾಬ್, ತನ್ನ ಪ್ರಯಾಣವನ್ನು ಇಲ್ಲಿಗೆ ಕೊನೆಗೊಳಿಸಬೇಕಾಗುತ್ತದೆ.

ಇದನ್ನೂ ಓದಿ: ವಾರ ಭವಿಷ್ಯ: ಈ ರಾಶಿಯವರಿಗೆ ನಿಮ್ಮ ಇಷ್ಟಗಳು ಸಿದ್ಧಿಯಾಗುತ್ತವೆ

ಬುಮ್ರಾ ಪ್ರಮುಖ ವ್ಯತ್ಯಾಸ!

ಐಪಿಎಲ್ ನಾಕೌಟ್‌ಗಳಲ್ಲಿ ಅಪಾರ ಅನುಭವ ಹೊಂದಿರುವ ಮುಂಬೈ ಇಂಡಿಯನ್ಸ್ ತಂಡವು ಮತ್ತೊಮ್ಮೆ ಆರನೇ ಪ್ರಶಸ್ತಿಗೆ ಎದುರು ನೋಡುತ್ತಿದೆ. ಅನೇಕ ಆಟಗಾರರು ಐಪಿಎಲ್​ನಿಂದ ಹೊರಹೋದರೂ ಮುಂಬೈ ತಂಡವು ಉತ್ತಮ ಬದಲಿ ಆಟಗಾರರನ್ನು ಹೊಂದಿದೆ. ಲೀಗ್ ಹಂತ ಮುಗಿದ ನಂತರ ರಯಾನ್ ರಿಕಲ್ಟನ್ ಮತ್ತು ವಿಲ್ ಜ್ಯಾಕ್ಸ್ ತಂಡವನ್ನು ತೊರೆದಿದ್ದರೂ ಕಳೆದ ಪಂದ್ಯದಲ್ಲಿ ಮೊದಲ ಬಾರಿಗೆ ಮುಂಬೈ ತಂಡವನ್ನು ಪ್ರತಿನಿಧಿಸಿದ ಜಾನಿ ಬೈರ್‌ಸ್ಟೋವ್ ಎಂಟ್ರಿ ನೀಡಿದ್ದಾರೆ.

ಹೈದರಾಬಾದ್ ಆಟಗಾರ ತಿಲಕ್ ವರ್ಮಾ ಕೂಡ ತಂಡಕ್ಕೆ ಸೇರ್ಪಡೆಯಾಗಿದ್ದು, ಇದು ಮುಂಬೈನ ಬ್ಯಾಟಿಂಗ್ ಬಲವನ್ನು ಮತ್ತಷ್ಟು ಹೆಚ್ಚಿಸಿದೆ. ರೋಹಿತ್ ಮತ್ತು ಬೈರ್‌ಸ್ಟೋವ್ ತಂಡಕ್ಕೆ ಉತ್ತಮ ಆರಂಭ ನೀಡುತ್ತಿದ್ದರೆ ಸೂರ್ಯಕುಮಾರ್ ಯಾದವ್ ಇನ್ನಿಂಗ್ಸ್‌ನ ಬೆನ್ನೆಲುಬಾಗಿ ನಿಂತಿದ್ದಾರೆ. ಅವರು ಈ ಋತುವಿನಲ್ಲಿ 673 ರನ್ ಗಳಿಸಿದ್ದಾರೆ ಮತ್ತು ಆರೆಂಜ್ ಕ್ಯಾಪ್‌ಗಾಗಿ ರೇಸ್‌ನಲ್ಲಿದ್ದಾರೆ. ತಡವಾಗಿ ವೇಗವನ್ನು ಪಡೆದುಕೊಂಡಿರುವ ರೋಹಿತ್ 410 ರನ್ ಗಳಿಸಿದ್ದಾರೆ. ಹಾರ್ದಿಕ್ ಪಾಂಡ್ಯ ಮತ್ತು ನಮನ್ ಧೀರ್ ಫಿನಿಷರ್‌ಗಳ ಪಾತ್ರವನ್ನು ನಿರ್ವಹಿಸುತ್ತಿದ್ದಾರೆ.

ಗಾಯದ ಕಾರಣದಿಂದಾಗಿ ದೀಪಕ್ ಚಹಾರ್ ಈ ಪಂದ್ಯಕ್ಕೆ ಲಭ್ಯತೆ ಕಷ್ಟಕರವಾಗಿರುತ್ತದೆ. ಕಳೆದ ಪಂದ್ಯದ ಕೊನೆಯಲ್ಲಿ ಸ್ನಾಯು ಸೆಳೆತಕ್ಕೊಳಗಾಗಿದ್ದ ಗ್ಲೀಸನ್ ಕಣಕ್ಕೆ ಇಳಿಯುತ್ತಾರೋ ಇಲ್ಲವೋ ಎಂಬುದನ್ನು ಕಾದು ನೋಡಬೇಕಾಗಿದೆ. ಎರಡೂ ತಂಡಗಳ ನಡುವಿನ ಪ್ರಮುಖ ವ್ಯತ್ಯಾಸವೆಂದರೆ ಬುಮ್ರಾ. ಹತಾಶ ಸಂದರ್ಭಗಳಲ್ಲಿಯೂ ತನ್ನ ಅದ್ಭುತ ಬೌಲಿಂಗ್ ಮೂಲಕ ಪಂದ್ಯವನ್ನು ತಿರುಗಿಸುವ ಸಾಮರ್ಥ್ಯವನ್ನು ಹೊಂದಿರುವ ಬುಮ್ರಾ ಅವರನ್ನು ಪಂಜಾಬ್ ಬ್ಯಾಟ್ಸ್‌ಮನ್‌ಗಳು ಹೇಗೆ ಎದುರಿಸುತ್ತಾರೆ ಎಂಬುದನ್ನು ನೋಡಲು ಆಸಕ್ತಿದಾಯಕವಾಗಿದೆ.

ಅಂತಿಮ ತಂಡಗಳು (ಊಹಿಸಲಾಗಿದೆ)

ಪಂಜಾಬ್ ಕಿಂಗ್ಸ್: ಶ್ರೇಯಸ್ ಅಯ್ಯರ್ (ನಾಯಕ), ಪ್ರಭ್​ಸಿಮ್ರಾನ್, ಪ್ರಿಯಾಂಶ್ ಆರ್ಯ, ಜೋಸ್ ಇಂಗ್ಲಿಸ್, ನೆಹಾಲ್ ವಧೇರ, ಶಶಾಂಕ್ ಸಿಂಗ್, ಸ್ಟೊಯಿನಿಸ್, ಅಜ್ಮತುಲ್ಲಾ, ಹರ್‌ಪ್ರೀತ್ ಬ್ರಾರ್, ಜೇಮಿಸನ್, ಚಾಹಲ್, ಅರ್ಷದೀಪ್.

ಮುಂಬೈ ಇಂಡಿಯನ್ಸ್: ಹಾರ್ದಿಕ್ ಪಾಂಡ್ಯ (ನಾಯಕ), ರೋಹಿತ್ ಶರ್ಮಾ, ಜಾನಿ ಬೈರ್ಸ್ಟೋವ್, ಸೂರ್ಯಕುಮಾರ್ ಯಾದವ್, ತಿಲಕ್ ವರ್ಮಾ, ನಮನ್ ಧೀರ್, ಮಿಚೆಲ್ ಸ್ಯಾಂಟ್ನರ್, ರಾಜ್ ಬಾವಾ, ಗ್ಲೀಸನ್, ಬುಮ್ರಾ, ಬೌಲ್ಟ್, ಅಶ್ವನಿ ಕುಮಾರ್.

ಪಿಚ್ ಮತ್ತು ಹವಾಮಾನ

ಈ ಋತುವಿನಲ್ಲಿ ಅಹಮದಾಬಾದ್‌ನಲ್ಲಿ ನಡೆದ ಏಳು ಪಂದ್ಯಗಳಲ್ಲಿ, ಮೊದಲು ಬ್ಯಾಟ್ ಮಾಡಿದ ತಂಡಗಳು ಆರರಲ್ಲಿ ಗೆದ್ದಿವೆ. ಈ ಸಂದರ್ಭದಲ್ಲಿ, ಟಾಸ್ ಪ್ರಮುಖ ಪಾತ್ರ ವಹಿಸಬಹುದು. ಪಂದ್ಯಕ್ಕೆ ಮಳೆಯ ಬೆದರಿಕೆ ಇಲ್ಲ.

ಐಪಿಎಲ್ ಇಂದು (ಕ್ವಾಲಿಫೈಯರ್-2) : ಪಂಜಾಬ್ vs ಮುಂಬೈ

ಸ್ಥಳ: ಅಹಮದಾಬಾದ್

ಸಮಯ: ಸಂಜೆ 7:30 ರಿಂದ ಸ್ಟಾರ್ ಸ್ಪೋರ್ಟ್ಸ್, ಜಿಯೋ ಹಾಟ್‌ಸ್ಟಾರ್‌ನಲ್ಲಿ

https://www.vijayavani.net/they-asked-for-sperm-i-gave-it-elon-musk-has-a-baby-with-a-japanese-pop-star-reveals-ex-girlfriend

https://www.vijayavani.net/white-revolution-in-the-state