ದುಬೈ: ಯುಎಇ ತಲುಪಿರುವ ಚೆನ್ನೈ ಸೂಪರ್ ಕಿಂಗ್ಸ್ ಹಾಗೂ ಹಾಲಿ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ತಂಡಗಳು ಕ್ವಾರಂಟೈನ್ ಅವಧಿ ಮುಕ್ತಾಯಗೊಳಿಸಿ ಅಭ್ಯಾಸ ಆರಂಭಿಸಿವೆ. ಸಿಎಸ್ಕೆ ನಾಯಕ ಧೋನಿ, ಸುರೇಶ್ ರೈನಾ, ರಾಬಿನ್ ಉತ್ತಪ್ಪ, ಕರ್ಣ್ ಶರ್ಮ ಫುಟ್ಬಾಲ್ ಆಡುತ್ತಿರುವ ಫೋಟೋಗಳನ್ನು ತಂಡ ಟ್ವೀಟ್ ಮಾಡಿದೆ. ಸಂಜೆ ಆಟಗಾರರು ನೆಟ್ಸ್ ಅಭ್ಯಾಸ ಮಾಡಿದರು. ಸಿಎಸ್ಕೆ ತಂಡ ದುಬೈನಲ್ಲಿರುವ ಐಸಿಸಿ ಅಕಾಡೆಮಿಯಲ್ಲಿ ಅಭ್ಯಾಸ ಆರಂಭಿಸಿದೆ. ಮತ್ತೊಂದೆಡೆ, ಮುಂಬೈ ಇಂಡಿಯನ್ಸ್ ತಂಡ ಅಬುಧಾಬಿಯಲ್ಲಿ ಶುಕ್ರವಾರದಿಂದಲೇ ಅಭ್ಯಾಸ ಆರಂಭಿಸಿದೆ. ಉಭಯ ತಂಡಗಳು ಆಗಸ್ಟ್ 13 ರಂದೇ ಯುಎಇ ತಲುಪಿದ್ದವು. ಸೆ.19 ರಂದು ನಡೆಯಲಿರುವ ಲೀಗ್ನ ಮೊದಲ ಮುಖಾಮುಖಿಯಲ್ಲಿ ಉಭಯ ತಂಡಗಳು ಎದುರಾಗಲಿವೆ.
