ಮೊಹಮದ್​ ಶಮಿ ಸ್ಪರ್ಧಾತ್ಮಕ ಕ್ರಿಕೆಟ್​ಗೆ ಮರಳಲು ವೇದಿಕೆ ಸಜ್ಜು...

ನವದೆಹಲಿ: ಅನುಭವಿ ವೇಗಿ ಮೊಹಮದ್​ ಶಮಿ ಕಾಲಿನ ಶಸ್ತ್ರಚಿಕಿತ್ಸೆಯಿಂದ ಚೇತರಿಸಿಕೊಂಡು ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ ಮರಳುವುದಕ್ಕೆ ಮುನ್ನ ರಣಜಿ ಟ್ರೋಫಿಯಲ್ಲಿ ಬಂಗಾಳ ತಂಡದ ಪರ ಒಂದು ಪಂದ್ಯವನ್ನು ಆಡುವ ಸಾಧ್ಯತೆ ಇದೆ. ಬಂಗಾಳ ತಂಡ ಅಕ್ಟೋಬರ್​ 11ರಿಂದ 14ರವರೆಗೆ ಉತ್ತರ ಪ್ರದೇಶ ಮತ್ತು ಅಕ್ಟೋಬರ್​ 18ರಿಂದ 21ರವರೆಗೆ ಬಿಹಾರ ವಿರುದ್ಧ ಮೊದಲ 2 ಪಂದ್ಯಗಳನ್ನು ಆಡಲಿದೆ. ಈ ಪೈಕಿ ಒಂದು ಪಂದ್ಯದಲ್ಲಿ ಶಮಿ ಆಡುವ ನಿರೀಕ್ಷೆ ಇದೆ. ಇವೆರಡು ಪಂದ್ಯಗಳ ನಡುವೆ ಕೇವಲ 2 ದಿನಗಳ ಅಂತರವಿರುವುದರಿಂದ ಶಮಿ ಎರಡರಲ್ಲೂ ಆಡುವ ಸಾಧ್ಯತೆ ಇಲ್ಲ.

ನ್ಯೂಜಿಲೆಂಡ್​ ವಿರುದ್ಧ ಅಕ್ಟೋಬರ್​ 19ರಿಂದ ಬೆಂಗಳೂರಿನಲ್ಲಿ ಮೊದಲ ಟೆಸ್ಟ್​ ನಡೆಯಲಿದೆ. ಪುಣೆ (ಅಕ್ಟೋಬರ್​ 24-28) ಮತ್ತು ಮುಂಬೈ (ನವೆಂಬರ್​ 1-5) ನಂತರದ 2 ಟೆಸ್ಟ್​ ನಡೆಯಲಿದ್ದು, 34 ವರ್ಷದ ಶಮಿ ಈ ಪೈಕಿ ಒಂದರಲ್ಲಿ ಆಡುವ ಸಾಧ್ಯತೆ ಇದೆ. ವರ್ಷಾಂತ್ಯದ ಸವಾಲಿನ ಆಸ್ಟ್ರೆಲಿಯಾ ಪ್ರವಾಸವನ್ನು ಗಮನದಲ್ಲಿಟ್ಟುಕೊಂಡು ಶಮಿ ತವರಿನಲ್ಲಿ ಒಂದು ಟೆಸ್ಟ್​ ಮಾತ್ರ ಆಡಲಿದ್ದಾರೆ ಎನ್ನಲಾಗಿದೆ.

ಕಳೆದ ವರ್ಷದ ಅಕ್ಟೋಬರ್​ 19ರಂದು ನಡೆದ ಏಕದಿನ ವಿಶ್ವಕಪ್ ಫೈನಲ್​ ಬಳಿಕ ಶಮಿ ಒಂದೂ ಸ್ಪರ್ಧಾತ್ಮಕ ಪಂದ್ಯ ಆಡಿಲ್ಲ. ಕಳೆದ ಫೆಬ್ರವರಿಯಲ್ಲಿ ಬ್ರಿಟನ್​ನಲ್ಲಿ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದ ಅವರು, ಸದ್ಯ ಬೆಂಗಳೂರಿನ ಎನ್​ಸಿಎಯಲ್ಲಿ ಪುನಶ್ಚೇತನ ಪ್ರಕ್ರಿಯೆಯಲ್ಲಿದ್ದಾರೆ. ಮಹತ್ವದ ಆಸ್ಟ್ರೆಲಿಯಾ ಪ್ರವಾಸಕ್ಕೆ ಪ್ರಮುಖ ವೇಗಿಗಳಾದ ಶಮಿ, ಜಸ್​ಪ್ರೀತ್​ ಬುಮ್ರಾ ಮತ್ತು ಮೊಹಮದ್​ ಸಿರಾಜ್​ರನ್ನು ಫಿಟ್​ ಆಗಿಡುವುದು ಭಾರತದ ಯೋಜನೆಯಾಗಿದೆ.

https://www.vijayavani.net/smaran-rs-sensational-century-leads-gulbarga-mystics-to-thrilling-last-ball-victory-over-mysore-warriors