ಏಷ್ಯಾಕಪ್ ಫೈನಲ್​ ಪ್ರಚಂಡ ದಾಳಿಯಿಂದ ಸಿರಾಜ್​ಗೆ ಒಲಿಯಿತು ವಿಶ್ವ ನಂ. 1 ಪಟ್ಟ!

ಬೆಂಗಳೂರು: ಏಷ್ಯಾಕಪ್​ ಫೈನಲ್​ ಪಂದ್ಯದಲ್ಲಿ ಅದ್ಭುತ ದಾಳಿ ಸಂಟಿಸುವ ಮೂಲಕ ಭಾರತ ತಂಡದ ಗೆಲುವಿನ ರೂವಾರಿಯಾಗಿ ಮಿಂಚಿದ ವೇಗಿ ಮೊಹಮದ್​ ಸಿರಾಜ್​ ಐಸಿಸಿ ಏಕದಿನ ಬೌಲಿಂಗ್​ ರ್ಯಾಂಕಿಂಗ್​ನಲ್ಲಿ ವಿಶ್ವ ನಂ. 1 ಪಟ್ಟಕ್ಕೆ ಮರಳಿದ್ದಾರೆ.

ಕಳೆದ ಜನವರಿಯಲ್ಲಿ ಮೊದಲ ಬಾರಿಗೆ ವಿಶ್ವ ನಂ. 1 ಪಟ್ಟಕ್ಕೇರಿದ್ದ ಸಿರಾಜ್​, ಮಾರ್ಚ್​ನಲ್ಲಿ ಆಸ್ಟ್ರೆಲಿಯಾದ ವೇಗಿ ಜೋಶ್​ ಹ್ಯಾಸಲ್​ವುಡ್​ಗೆ ಅಗ್ರಸ್ಥಾನ ಬಿಟ್ಟುಕೊಟ್ಟಿದ್ದರು. ಏಷ್ಯಾಕಪ್​ಗೆ ಮುನ್ನ ಸಿರಾಜ್​ ರ್ಯಾಂಕಿಂಗ್​ನಲ್ಲಿ 9ನೇ ಸ್ಥಾನಕ್ಕೆ ಕುಸಿತ ಕಂಡಿದ್ದರು. ಆದರೆ ೈನಲ್​ ಪಂದ್ಯದಲ್ಲಿ 6 ವಿಕೆಟ್​ ಗೊಂಚಲು ಪಡೆದು ಶ್ರೀಲಂಕಾವನ್ನು ಕೇವಲ 50 ರನ್​ಗೆ ಆಲೌಟ್​ ಮಾಡಿ ಕಂಗೆಡಿಸಿದ ಸಿರಾಜ್​ ಟೂರ್ನಿಯಲ್ಲಿ ಆಡಿದ 5 ಪಂದ್ಯಗಳಲ್ಲಿ 10 ವಿಕೆಟ್​ ಕಬಳಿಸಿದ ಸಾಧನೆಯಿಂದ ರ್ಯಾಂಕಿಂಗ್​ನಲ್ಲಿ ಬರೋಬ್ಬರಿ 8 ಸ್ಥಾನ ಪ್ರಗತಿ ಕಂಡಿದ್ದಾರೆ. ಹ್ಯಾಸಲ್​ವುಡ್​ 2ನೇ ಮತ್ತು ನ್ಯೂಜಿಲೆಂಡ್​ನ ಟ್ರೆಂಟ್​ ಬೌಲ್ಟ್​ 3ನೇ ಸ್ಥಾನಕ್ಕೆ ಕುಸಿದಿದ್ದಾರೆ.

ಭಾರತದ ಎಡಗೈ ಸ್ಪಿನ್ನರ್​ ಕುಲದೀಪ್​ ಯಾದವ್​ ಉತ್ತಮ ನಿರ್ವಹಣೆಯ ನಡುವೆಯೂ 3 ಸ್ಥಾನ ಕುಸಿದು 9ನೇ ಸ್ಥಾನದಲ್ಲಿದ್ದಾರೆ. ವೇಗಿ ಜಸ್​ಪ್ರೀತ್​ ಬುಮ್ರಾ 2 ಸ್ಥಾನ ಮೇಲೇರಿ 27ನೇ ಸ್ಥಾನದಲ್ಲಿದ್ದರೆ, ಹಾರ್ದಿಕ್​ ಪಾಂಡ್ಯ 8 ಸ್ಥಾನ ಮೇಲೇರಿ 50ನೇ ಸ್ಥಾನ ಪಡೆದಿದ್ದಾರೆ.

ಬ್ಯಾಟರ್​ಗಳಲ್ಲಿ ಶುಭಮಾನ್​ ಗಿಲ್​ ಮತ್ತು ರೋಹಿತ್​ ಶರ್ಮ ಕ್ರಮವಾಗಿ 2 ಮತ್ತು 10ನೇ ಸ್ಥಾನ ಕಾಯ್ದುಕೊಂಡಿದ್ದರೆ, ವಿರಾಟ್​ ಕೊಹ್ಲಿ 1 ಸ್ಥಾನ ಮೇಲೇರಿ 8ನೇ ಸ್ಥಾನ ಅಲಂಕರಿಸಿದ್ದಾರೆ. ಆಲ್ರೌಂಡರ್​ಗಳ ರ್ಯಾಂಕಿಂಗ್​ನಲ್ಲಿ ಹಾರ್ದಿಕ್​ ಪಾಂಡ್ಯ ಅಗ್ರ 10ರೊಳಗಿರುವ ಏಕೈಕ ಭಾರತೀಯರಾಗಿದ್ದು, 6ನೇ ಸ್ಥಾನದಲ್ಲಿದ್ದಾರೆ.

https://www.vijayavani.net/chahal-wife-dhanashree-verma-dazzles-along-with-ranveer-singh-in-the-world-cup-anthem