ಮಗಳ ಮುಂದೆ ಶೋಕಿ ಅಷ್ಟೇ! ಆಕೆ ಕೇಳಿದ್ದನ್ನು… ಪುತ್ರಿ ಭೇಟಿಯಾದ ಮೊಹಮ್ಮದ್​ ಶಮಿ ವಿರುದ್ಧ ಮಾಜಿ ಪತ್ನಿ ಕಿಡಿ

ನವದೆಹಲಿ: ವೃತ್ತಿಯಲ್ಲಿ ಅದ್ಭುತ ಯಶಸ್ಸು ಕಂಡ ಟೀಮ್ ಇಂಡಿಯಾದ (Team India) ಹೆಸರಾಂತ ವೇಗಿ ಮೊಹಮ್ಮದ್ ಶಮಿ (Mohammed Shami), ತಮ್ಮ ದಾಂಪತ್ಯ ಜೀವನದಲ್ಲಿ ತೀವ್ರ ಸಂಕಷ್ಟ ಎದುರಿಸಿದರು. ಮದುವೆ ಸಂಬಂಧದಲ್ಲಿ ಬಿರುಕು ಮೂಡಿದ ನಂತರ ಪರಸ್ಪರ ಒಪ್ಪಿಗೆಯ ಮೇರೆಗೆ ಹಸಿನ್ ಜಾಹನ್​ಗೆ ವಿಚ್ಛೇದನ ನೀಡಿದ ಶಮಿ, ಆಗಾಗ್ಗೆ ತಮ್ಮ ಮಗಳನ್ನು ಭೇಟಿಯಾಗುತ್ತಿರುತ್ತಾರೆ. ಇದೇ ರೀತಿ ಇತ್ತೀಚೆಗಷ್ಟೇ ಬಹುದಿನಗಳ ಬಳಿಕ ಪುತ್ರಿಯನ್ನು ಮುಖಾಮುಖಿ ಭೇಟಿಯಾದ ಮೊಹಮ್ಮದ್​, ಮಗಳ ಜತೆ ಕೆಲವು ಸ್ಥಳಗಳಿಗೆ ತೆರಳಿ, ಆಕೆಗೆ ಒಂದಷ್ಟು ವಸ್ತುಗಳನ್ನು ಕೊಡಿಸಿದರು. ಈ ವಿಡಿಯೋಗಳು ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹರಿದಾಡಿತ್ತು. ಅಪ್ಪ-ಮಗಳ ಬಾಂಧವ್ಯಕ್ಕೆ ಶಮಿ ಅಭಿಮಾನಿಗಳು ಹಾಗೂ ನೆಟ್ಟಿಗರು ಪ್ರೀತಿಯ ಸಂದೇಶ ರವಾನಿಸಿದ್ದರು. ಆದ್ರೆ, ಮಾಜಿ ಪತ್ನಿ ಮಾತ್ರ ಶಮಿ ನಡೆಗೆ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ: Tirupati Laddu Row| ಸ್ವತಂತ್ರ ತನಿಖೆಗೆ ಆದೇಶಿಸಿದ Supreme Court

ಮಗಳನ್ನು ಅಪ್ಪಿ-ಮುದ್ದಾಡಿದ ಶಮಿ

ಬಹಳ ದಿನಗಳ ನಂತರ ಮಗಳು ಐರಾರನ್ನು ಮುಖಾಮುಖಿ ಭೇಟಿಯಾದ ಶಮಿ, ಆಕೆಯನ್ನು ಮಾಲ್​ನಲ್ಲಿ ತಿರುಗಾಡಿಸಿ, ಒಂದಷ್ಟು ಕಾಲ ಪುತ್ರಿಯೊಂದಿಗೆ ಸಮಯ ಕಳೆದರು. ಇದೇ ವೇಳೆ ಮಗಳನ್ನು ಅಂಗಡಿಗಳಿಗೆ ತೆರಳಿದ ಅವರು, ಆಕೆ ಇಷ್ಟಪಟ್ಟಿದ್ದನ್ನು ಖರೀದಿ ಮಾಡಿ, ಮಾಲ್​ನ ಸುತ್ತಮುತ್ತ ಓಡಾಡಿದರು. ಇದಕ್ಕೆ ಸಂಬಂಧಿಸಿದ ವಿಡಿಯೋ ಮತ್ತು ಫೋಟೋಗಳನ್ನು ತಮ್ಮ ಖಾಸಗಿ ಜಾಲತಾಣದ ಖಾತೆಯಲ್ಲಿ ಹಂಚಿಕೊಂಡ ಮೊಹಮ್ಮದ್ ಶಮಿ, ತುಂಬ ದಿನದ ಬಳಿಕ ನಿನ್ನನ್ನು ನೋಡಿದ್ದು, ಐ ಲವ್​ ಯೂ ಮಗಳೇ ಎಂದು ಪ್ರೀತಿ ವ್ಯಕ್ತಪಡಿಸಿದರು.

ಮಾಜಿ ಪತ್ನಿ ಕಿಡಿ

"ಮಗಳನ್ನು ಆತ ಭೇಟಿಯಾಗಿದ್ದೇನೋ ನಿಜ. ಆದ್ರೆ, ಅವರ ಉದ್ದೇಶ ಪುತ್ರಿ ಕೇಳಿದ್ದನ್ನು ಕೊಡಿಸಬೇಕು, ಮಾಡಬೇಕು ಎಂಬುದಾಗಿರಲಿಲ್ಲ. ಅಷ್ಟಕ್ಕೂ ಐರಾಗೆ ಗಿಟಾರ್​ ಮತ್ತು ಕ್ಯಾಮರಾ ಅಗತ್ಯವಿತ್ತು. ಅವಳು ಇವೆರಡನ್ನು ಖರೀದಿಸುವ ಬಯಕೆ ಹೊಂದಿದ್ದಳು. ಆದರೆ, ಶಮಿ ಮಾತ್ರ ಪುತ್ರಿ ಬಯಸಿದ್ದನ್ನು ಕೊಡಿಸುವಲ್ಲಿ ವಿಫಲರಾಗಿದ್ದಾರೆ. ಮಗಳು ಆಸೆ ಪಟ್ಟಿದ್ದನ್ನು ಖರೀದಿಸುವ ಬದಲಿಗೆ ಅದ್ಯಾವುದೋ ಬ್ರ್ಯಾಂಡ್​ ಶೋರೂಮ್​ಗೆ ಕರೆದೊಯ್ದಿದ್ದಾರೆ. ಇದೆಲ್ಲಾ ಶೋಕಿ ಅಷ್ಟೇ. ನನ್ನ ಮಗಳ ಪಾಸ್​ಪಾರ್ಟ್​ ಅವಧಿ ಮುಕ್ತಾಯಗೊಂಡಿದೆ. ಈಗ ಅದರ ನವೀಕರಣದ ಅಗತ್ಯವಿದೆ. ಹೀಗಾಗಿ ಆಕೆ ತನ್ನ ತಂದೆಯ ಸಹಿಗಾಗಿ ಶಮಿಯನ್ನು ಭೇಟಿಯಾದಳು. ಒಂದು ಸಹಿ ಹಾಕುವುದನ್ನು ಬಿಟ್ಟು ಶಮಿ ಇನ್ನೆಲ್ಲಾ ಮಾಡಿದ್ದಾರೆ" ಎಂದು ಮಾಜಿ ಪತಿ ವಿರುದ್ಧ ಹಸಿನ್​ ಕಿಡಿಕಾರಿದ್ದಾರೆ,(ಏಜೆನ್ಸೀಸ್).

https://www.vijayavani.net/radio-man-musuem-joined-to-guinness-record