ಲಾಹೋರ್: 2025ರಲ್ಲಿ ನಡೆಯುವ ಚಾಂಪಿಯನ್ಸ್ ಟ್ರೋಫಿ ಟೂರ್ನಿಗಾಗಿ ಸದ್ಯ ದೊಡ್ಡ ಮಟ್ಟದ ಚರ್ಚೆಗಳು ಹಾಗೂ ವಿವಾದಗಳೇ ಭುಗಿಲೆದಿದ್ದು, ಈ ಬಾರಿಯ ಅತಿಥ್ಯವನ್ನು ಪಾಕಿಸ್ತಾನ ಕ್ರಿಕೆಟ್ ಬೋರ್ಡ್ ವಹಿಸಿಕೊಂಡಿರುವುದು ಇಷ್ಟಕ್ಕೆಲ್ಲ ಕಾರಣ ಎನ್ನುವಂತಾಗಿದೆ. ತಂಡದಲ್ಲಿ ಯಾವ ಬೌಲರ್, ಬ್ಯಾಟರ್ ಹಾಗೂ ಆಲ್ರೌಂಡರ್ ಇದ್ದರೆ ನಮಗೆ ಗೆಲುವು ಬಹಳ ಸುಲಭವಾಗುತ್ತದೆ ಎಂಬುದನ್ನು ಯೋಚಿಸಬೇಕಿದ್ದ ಪಾಕ್, ಇಲ್ಲಿಯವರೆಗೂ ತಮ್ಮ ನೆಲಕ್ಕೆ ಪ್ರಯಾಣಿಸದ ಟೀಮ್ ಇಂಡಿಯಾವನ್ನು ಹೇಗಾದರೂ ಮಾಡಿ ಕರೆಸಿಕೊಳ್ಳಬೇಕು ಎಂಬ ಜಟಾಪಟಿಯಲ್ಲಿ ತೊಡಗಿದೆ. ಇದಕ್ಕಾಗಿ ನಾನಾ ರೀತಿಯ ಕಸರತ್ತು ಕೂಡ ನಡೆಸಿ, ಸದ್ಯ ಸೋತು ಸುಣ್ಣವಾಗಿದೆ. ಅಂತಿಮವಾಗಿ ಹೈಬ್ರಿಡ್ ಮಾದರಿಯಲ್ಲಿ ಆಡಿಸುವುದಾದರೆ ಮಾತ್ರ ಚಾಂಪಿಯನ್ಸ್ ಟ್ರೋಫಿ ಆಡುವುದಾಗಿ (Decision) ಭಾರತ ತಿಳಿಸಿದ್ದೇ ತಡ, ಇದೀಗ ಪಾಕ್ ಆಟಗಾರರಲ್ಲಿ ಕಿಡಿ ಚಿಮ್ಮುಲು ಶುರುವಾಗಿದೆ.
