ಇಂದಿನಿಂದ ಆಸೀಸ್​-ಪಾಕ್​ ಟೆಸ್ಟ್​; 500 ವಿಕೆಟ್​ ಸಾಧನೆಯ ಸನಿಹದಲ್ಲಿ ನಾಥನ್​ ಲ್ಯಾನ್​

ಪರ್ತ್​: ವಿಶ್ವ ಟೆಸ್ಟ್​ ಚಾಂಪಿಯನ್​ ಆಸ್ಟ್ರೆಲಿಯಾ ಹಾಗೂ ಪ್ರವಾಸಿ ಪಾಕಿಸ್ತಾನ ನಡುವಿನ 3 ಪಂದ್ಯಗಳ ಟೆಸ್ಟ್​ ಸರಣಿಯ ಮೊದಲ ಪಂದ್ಯ ಗುರುವಾರ ಆರಂಭವಾಗಲಿದ್ದು, ಏಕದಿನ ವಿಶ್ವಕಪ್​ ವೈಫಲ್ಯದ ಬಳಿಕ ಮೇಜರ್​ ಸರ್ಜರಿಗೆ ಒಳಗಾಗಿರುವ ಪಾಕ್​ ತಂಡ ಹೊಸ ಟೆಸ್ಟ್​ ನಾಯಕ ಶಾನ್​ ಮಸೂದ್​ ಸಾರಥ್ಯದಲ್ಲಿ ಮೊದಲ ಬಾರಿಗೆ ಕಣಕ್ಕಿಳಿಯಲಿದೆ.

ಅನುಭವಿ ಸ್ಪಿನ್ನರ್​ ನಾಥನ್​ ಲ್ಯಾನ್​ ಟೆಸ್ಟ್​ ಕ್ರಿಕೆಟ್​ನಲ್ಲಿ 500 ವಿಕೆಟ್​ ಪಡೆದ 3ನೇ ಆಸೀಸ್​ ಆಟಗಾರ ಎನಿಸುವ ಮೂಲಕ ಶೇನ್​ ವಾರ್ನ್​ (708) ಹಾಗೂ ಗ್ಲೆನ್​ ಮೆಕ್​ಗ್ರಾತ್​ (563) ಸಾಲಿಗೆ ಸೇರಲು ಸಜ್ಜಾಗಿದ್ದಾರೆ. ಈ ಸಾಧನೆಗೆ ಲ್ಯಾನ್​ ಇನ್ನೂ 4 ವಿಕೆಟ್​ ಕಬಳಿಸಬೇಕಿದೆ. ಟೆಸ್ಟ್​ ಕ್ರಿಕೆಟ್​ನಲ್ಲಿ 500 ವಿಕೆಟ್​ ಕಬಳಿಸಿದ 7 ಬೌಲರ್​ಗಳಲ್ಲಿ ಶೇನ್​ ವಾರ್ನ್​, ಶ್ರೀಲಂಕಾದ ಮುತ್ತಯ್ಯ ಮುರಳೀಧರನ್​, ಭಾರತದ ಅನಿಲ್​ ಕುಂಭ್ಳೆ ಮಾತ್ರ ಸ್ಪಿನ್ನರ್​ಗಳಾಗಿದ್ದಾರೆ.

ಆಶಸ್​ ಸರಣಿಯಲ್ಲಿ ಗಾಯದ ಸಮಸ್ಯೆಗೆ ತುತ್ತಾಗಿದ್ದ 36 ವರ್ಷದ ಲ್ಯಾನ್​ ಪಾಕ್​ ವಿರುದ್ಧ ಕಣಕ್ಕಿಳಿಯಲಿದ್ದಾರೆ. ನನ್ನ ಕ್ರಿಕೆಟ್​ ಜೀವನದ ಆರಂಭ ದಿನಗಳಿಂದ ಆರ್​.ಅಶ್ವಿನ್​ ಅವರನ್ನು ಹತ್ತಿರದಿಂದ ಗಮನಿಸಿದ್ದೇನೆ. ಅವರೊಬ್ಬ ವಿಶ್ವ ಶ್ರೇಷ್ಠ ಬೌಲರ್​ ಹಾಗೂ ನನಗೆ ಸದಾ ಸ್ಫೂರ್ತಿ ಎಂದು ನಾಥನ್​ ಲ್ಯಾನ್​ ಸಂದರ್ಶನದಲ್ಲಿ ತಿಳಿಸಿದ್ದಾರೆ. ಅವರು ಪರ್ತ್​ ಕ್ರೀಡಾಂಗಣದಲ್ಲಿ ಉತ್ತಮ ದಾಖಲೆ ಹೊಂದಿದ್ದು, ಆಡಿರುವ 3 ಪಂದ್ಯಗಳಲ್ಲಿ 22 ವಿಕೆಟ್​ ಕಬಳಿಸಿದ್ದಾರೆ.

ಆರಂಭ: ಬೆಳಗ್ಗೆ 7.50

ನೇರಪ್ರಸಾರ: ಸ್ಟಾರ್​ ಸ್ಪೋರ್ಟ್ಸ್​1

https://www.vijayavani.net/india-retain-asia-cup-squad-as-uday-saharan-set-to-lead-in-u-19-world-cup