ಕೀನ್ಯಾ ವಿರುದ್ಧ ಬೇಕಿದ್ದರೂ ಸೋಲಿರಿ, ಪಾಕ್​ ವಿರುದ್ಧ ಸೋಲಬೇಡಿ ಎನ್ನುತ್ತಿದ್ದರು ಎಂದ ಕುಂಬ್ಳೆ

ಬೆಂಗಳೂರು: ಮುಂಬರುವ ದಿನಗಳಲ್ಲಿ ಏಷ್ಯಾಕಪ್​-ವಿಶ್ವಕಪ್​ಗಳಲ್ಲಿ ಭಾರತ-ಪಾಕಿಸ್ತಾನ ತಂಡಗಳು ಸತತ ಕೆಲ ಪಂದ್ಯಗಳಲ್ಲಿ ಮುಖಾಮುಖಿ ಆಗಲಿವೆ. ಈ ಹಿನ್ನೆಲೆಯಲ್ಲಿ ಇಂಡೋ-ಪಾಕ್​ ನಡುವಿನ ಹೈ-ವೋಲ್ಟೇಜ್​ ಪಂದ್ಯಗಳ ಒತ್ತಡ ಯಾವ ರೀತಿ ಇರುತ್ತದೆ ಎಂಬುದರ ಕುರಿತು ಮಾತನಾಡಿರುವ ಮಾಜಿ ನಾಯಕ ಹಾಗೂ ಸ್ಪಿನ್​ ದಿಗ್ಗಜ ಅನಿಲ್​ ಕುಂಬ್ಳೆ, "ಆಗಿನ ದಿನಗಳಲ್ಲಿ ಅಭಿಮಾನಿಗಳು, ಕೀನ್ಯಾ ವಿರುದ್ಧದ ಪಂದ್ಯದಲ್ಲಿ ಬೇಕಿದ್ದರೂ ಸೋಲು ಕಾಣಿರಿ, ಆದರೆ ಪಾಕಿಸ್ತಾನ ವಿರುದ್ಧದ ಪಂದ್ಯದಲ್ಲಿ ಮಾತ್ರ ಸೋಲಲೇಬೇಡಿ ಎನ್ನುತ್ತಿದ್ದರು' ಎಂದು ಹೇಳಿದ್ದಾರೆ.

ಏಷ್ಯಾಕಪ್​ನಲ್ಲಿ ಸೆಪ್ಟೆಂಬರ್​ 2ರಂದು ಮೊದಲ ಬಾರಿ ಪಾಕಿಸ್ತಾನವನ್ನು ಎದುರಿಸಲಿರುವ ಭಾರತ ತಂಡ ನಂತರ ಸೆಪ್ಟೆಂಬರ್​ 10ರಂದು ಸೂಪರ್​-4 ಹಂತದಲ್ಲಿ ಮತ್ತೊಮ್ಮೆ ಮುಖಾಮುಖಿ ಆಗಲಿದೆ. ಉಭಯ ತಂಡಗಳು ಫೈನಲ್​ಗೇರಿದರೆ ಸೆಪ್ಟೆಂಬರ್​ 17ರಂದು ಮತ್ತೊಮ್ಮೆ ಮುಖಾಮುಖಿ ಆಗಲಿವೆ. ಇನ್ನು ವಿಶ್ವಕಪ್​ನಲ್ಲಿ ಅಕ್ಟೋಬರ್​ 14ರಂದು ಅಹಮದಾಬಾದ್​ನಲ್ಲಿ ಮುಖಾಮುಖಿ ಆಗಲಿರುವ ಭಾರತ-ಪಾಕ್​ ತಂಡಗಳು ನಂತರ ಸೆಮಿಫೈನಲ್​ ಅಥವಾ ಫೈನಲ್​ನಲ್ಲಿ ಮತ್ತೆ ಮುಖಾಮುಖಿ ಆಗುವ ಸಾಧ್ಯತೆ ಇದ್ದೇ ಇರುತ್ತದೆ.

ಪಾಕಿಸ್ತಾನ ವಿರುದ್ಧದ ಪಂದ್ಯವನ್ನು ಮತ್ತೊಂದು ಪಂದ್ಯದಂತೆ ಆಡುವುದು ಯಶಸ್ಸಿನಲ್ಲಿ ಪ್ರಮುಖ ಪಾತ್ರವಹಿಸುತ್ತದೆ. ಅಭಿಮಾನಿಗಳ ಮಾತಿನಿಂದ ಒತ್ತಡಕ್ಕೆ ಒಳಗಾಗದೆ ಆಡಬೇಕು ಎಂದು ಕನ್ನಡಿಗ ಅನಿಲ್​ ಕುಂಬ್ಳೆ ಹೇಳಿದ್ದಾರೆ.

1999ರಲ್ಲಿ ಪಾಕಿಸ್ತಾನ ವಿರುದ್ಧದ ಫಿರೋಜ್​ ಷಾ ಕೋಟ್ಲಾ ಟೆಸ್ಟ್​ ಪಂದ್ಯದ ಇನಿಂಗ್ಸ್​ ಒಂದರಲ್ಲಿ ಎಲ್ಲ 10 ವಿಕೆಟ್​ ಕಬಳಿಸಿ ವಿಶ್ವದಾಖಲೆ ಬರೆದಿದ್ದ ಅನಿಲ್​ ಕುಂಬ್ಳೆ, "ಆ ಪಂದ್ಯದಲ್ಲಿ ನಾನು 10 ವಿಕೆಟ್​ ಗೊಂಚಲು ಪಡೆಯುವ ಯೋಚನೆಯೊಂದಿಗೆ ಕಣಕ್ಕಿಳಿದಿರಲಿಲ್ಲ. ಅದು ಖಂಡಿತವಾಗಿಯೂ ಬೌಲರ್​ ಒಬ್ಬನ ಕನಸು ಆಗಿರುತ್ತದೆ. ಆದರೇನು ಮಾಡೋಣ, ಆ ಸಾಧನೆ ನಂತರ ಕೋಲ್ಕತದಲ್ಲಿ ಆಡಿದ ಪಾಕಿಸ್ತಾನ ವಿರುದ್ಧದ ಏಷ್ಯನ್​ ಟೆಸ್ಟ್​ ಚಾಂಪಿಯನ್​ಷಿಪ್​ ಪಂದ್ಯದಲ್ಲಿ ನನಗೆ ಒಂದೇ ಒಂದು ವಿಕೆಟ್​ ಪಡೆಯುವುದು ಕೂಡ ಕಠಿಣವಾಗಿತ್ತು. ಇದೇ ಕ್ರಿಕೆಟ್​ ಆಟದ ವಿಶಿಷ್ಟತೆ' ಎಂದು ವಿವರಿಸಿದ್ದಾರೆ.

https://www.vijayavani.net/uniformed-police-officer-showcases-fiery-bowling-skills-mumbai-indians-share-viral-video

https://www.vijayavani.net/karun-nair-captain-and-rx-murli-coach-for-mysore-warriors