ವಿಜಯ್​ ಹಜಾರೆ ಟ್ರೋಫಿಯಲ್ಲಿ ಕ್ವಾರ್ಟರ್​ಫೈನಲ್​ಗೇರಿದ ಕರ್ನಾಟಕ

ಅಹಮದಾಬಾದ್​: ವೇಗಿ ವಾಸುಕಿ ಕೌಶಿಕ್​ (7ಕ್ಕೆ 4) ಮತ್ತು ಸ್ಪಿನ್ನರ್​ ಕೃಷ್ಣಪ್ಪ ಗೌತಮ್​ (49ಕ್ಕೆ 3) ಮಾರಕ ಬೌಲಿಂಗ್​ ದಾಳಿಯ ನೆರವಿನಿಂದ ಕರ್ನಾಟಕ ತಂಡ ವಿಜಯ್​ ಹಜಾರೆ ಟ್ರೋಫಿ ದೇಶೀಯ ಏಕದಿನ ಕ್ರಿಕೆಟ್​ ಟೂರ್ನಿಯಲ್ಲಿ 6ನೇ ಗೆಲುವು ದಾಖಲಿಸುವ ಮೂಲಕ ನೇರವಾಗಿ ಕ್ವಾರ್ಟರ್​ಫೈನಲ್​ ಪ್ರವೇಶಿಸಿದೆ. ಮಯಾಂಕ್​ ಅಗರ್ವಾಲ್​ ಬಳಗ ತನ್ನ 7ನೇ ಹಾಗೂ ಅಂತಿಮ ಲೀಗ್​ ಪಂದ್ಯದಲ್ಲಿ ಮಿಜೋರಾಂ ವಿರುದ್ಧ 6 ವಿಕೆಟ್​ಗಳಿಂದ ಸುಲಭ ಗೆಲುವು ದಾಖಲಿಸಿತು.

ಗುಜರಾತ್​ ಕಾಲೇಜು ಗ್ರೌಂಡ್​ನಲ್ಲಿ ಮಂಗಳವಾರ ನಡೆದ ಕಾದಾಟದಲ್ಲಿ ಟಾಸ್​ ಗೆದ್ದು ಮೊದಲು ಬ್ಯಾಟಿಂಗ್​ಗೆ ಇಳಿದ ಮಿಜೋರಾಂ, ರಾಜ್ಯದ ದಾಳಿಗೆ ತತ್ತರಿಸಿ 37.2 ಓವರ್​ಗಳಲ್ಲಿ 124 ರನ್​ಗಳಿಗೆ ಸರ್ವಪತನ ಕಂಡಿತು. ಪ್ರತಿಯಾಗಿ ನಾಯಕ ಮಯಾಂಕ್​ ಅಗರ್ವಾಲ್​ (48*) ಮತ್ತು ಮಾಜಿ ನಾಯಕ ಮನೀಷ್​ ಪಾಂಡೆ (38*) ಉಪಯುಕ್ತ ಬ್ಯಾಟಿಂಗ್​ ಬಲದಿಂದ ಕರ್ನಾಟಕ ತಂಡ 17.1 ಓವರ್​ಗಳಲ್ಲೇ 4 ವಿಕೆಟ್​ಗೆ 126 ರನ್​ ಪೇರಿಸಿ ಗೆಲುವಿನ ದಡ ಸೇರಿತು.

ಮಿಜೋರಾಂ: 37.2 ಓವರ್​ಗಳಲ್ಲಿ 124 (ಥಂಕುಮ 37, ಕೆಸಿ ಕಾರ್ಯಪ್ಪ 36, ವಿ. ಕೌಶಿಕ್​ 7ಕ್ಕೆ 4, ಭಾಂಡಗೆ 19ಕ್ಕೆ 2, ಕೆ. ಗೌತಮ್​ 49ಕ್ಕೆ 3). ಕರ್ನಾಟಕ: 17.1 ಓವರ್​ಗಳಲ್ಲಿ 4 ವಿಕೆಟ್​ಗೆ 126 (ಬಿಆರ್​ ಶರತ್​ 2, ಮಯಾಂಕ್​ ಅಗರ್ವಾಲ್​ 48*, ಅಭಿನವ್​ 14, ಮನೋಜ್​ ಭಾಂಡಗೆ 21, ಮನೀಷ್​ ಪಾಂಡೆ 38*, ಮೋಹಿತ್​ ಜಾಂಗ್ರ 37ಕ್ಕೆ 3).

ವಿದರ್ಭ ಎದುರಾಳಿ

ರಾಜ್ಯ ತಂಡ ಲೀಗ್​ ಹಂತದಲ್ಲಿ ಆಡಿದ 7 ಪಂದ್ಯಗಳಲ್ಲಿ 6 ಜಯ, 1 ಸೋಲಿನೊಂದಿಗೆ ಸಿ ಗುಂಪಿನ ಅಂಕಪಟ್ಟಿಯಲ್ಲಿ 2ನೇ ಸ್ಥಾನಕ್ಕೆ ತೃಪ್ತಿಪಟ್ಟರೂ, ನಾಕೌಟ್​ ಹಂತಕ್ಕೇರಿದ 10 ತಂಡಗಳ ಪೈಕಿ ಅಗ್ರ 6ರೊಳಗೆ ಸ್ಥಾನ ಸಂಪಾದಿಸುವಲ್ಲಿ ಯಶಸ್ವಿಯಾದ ಕಾರಣ ನೇರವಾಗಿ ಕ್ವಾರ್ಟರ್​ೈನಲ್​ ಪ್ರವೇಶ ಕಂಡಿತು. ರಾಜ್ಯ ತಂಡ ಡಿಸೆಂಬರ್​ 11ರಂದು ರಾಜ್​ಕೋಟ್​ನಲ್ಲಿ ನಡೆಯಲಿರುವ ಕ್ವಾರ್ಟರ್​ಫೈನಲ್​ ಪಂದ್ಯದಲ್ಲಿ ಬಿ ಗುಂಪಿನ ಅಗ್ರಸ್ಥಾನಿ ವಿದರ್ಭ ತಂಡವನ್ನು ಎದುರಿಸಲಿದೆ.

ನಾಕೌಟ್​ ಪಂದ್ಯಗಳ ವೇಳಾಪಟ್ಟಿ

ಡಿ.9: ಪ್ರಿ ಕ್ವಾರ್ಟರ್​ಫೈನಲ್ಸ್​

ಬಂಗಾಳ-ಗುಜರಾತ್​

ಕೇರಳ-ಮಹಾರಾಷ್ಟ್ರ

ಡಿಸೆಂಬರ್​ 11: ಕ್ವಾರ್ಟರ್​ಫೈನಲ್​

ಹರಿಯಾಣ-ಮೊದಲ ಪ್ರಿ ಕ್ವಾ. ವಿಜೇತ

ರಾಜಸ್ಥಾನ-2ನೇ ಪ್ರಿ. ಕ್ವಾ. ವಿಜೇತ

ವಿದರ್ಭ-ಕರ್ನಾಟಕ

ಮುಂಬೈ-ತಮಿಳುನಾಡು

ಡಿಸೆಂಬರ್​ 13-14: ಸೆಮಿಫೈನಲ್ಸ್​

ಡಿಸೆಂಬರ್​ 16: ಫೈನಲ್​

ಎಲ್ಲಿ: ರಾಜ್​ಕೋಟ್​

ಆರಂಭ: ಬೆಳಗ್ಗೆ 9.00

https://www.vijayavani.net/rahul-dravid-son-anvay-shining-at-vijay-marchent-trophy