ಏಷ್ಯಾಕಪ್​ ಟೂರ್ನಿಯ ಆರಂಭಿಕ ಪಂದ್ಯಗಳಿಗೆ ಕೆಎಲ್​ ರಾಹುಲ್​ ಅನುಮಾನ

ಬೆಂಗಳೂರು: ಸಣ್ಣ ಪುಟ್ಟ ಗಾಯದಿಂದ ಚೇತರಿಸಿಕೊಳ್ಳುತ್ತಿರುವ ನಡುವೆ ಟೀಮ್​ ಇಂಡಿಯಾಗೆ ಮರಳಿರುವ ಬ್ಯಾಟರ್​ ಹಾಗೂ ಕನ್ನಡಿಗ ಕೆಎಲ್​ ರಾಹುಲ್​, ಏಷ್ಯಾಕಪ್​ಗೆ ತಂಡದಲ್ಲಿ ಸ್ಥಾನ ಪಡೆದಿದ್ದರೂ, ಆರಂಭಿಕ ಕೆಲ ಪಂದ್ಯಗಳಿಗೆ ಲಭ್ಯರಾಗುವುದು ಅನುಮಾನವೆನಿಸಿದೆ.

ಸದ್ಯ ಬೆಂಗಳೂರಿನಲ್ಲಿ ಭಾರತ ತಂಡದ ಆಟಗಾರರೊಂದಿಗೆ ವಿವಿಧ ಫಿಟ್ನೆಸ್​ ಡ್ರಿಲ್​ಗಳಲ್ಲಿ ಭಾಗವಹಿಸಿದ್ದಾರೆ. ಆದರೆ ಯೋ&ಯೋ ಟೆಸ್ಟ್​ ಎದುರಿಸಲಿಲ್ಲ ಎನ್ನಲಾಗಿದೆ. ರಾಹುಲ್​ಗೆ ಕೆಲ ಸಣ್ಣಪುಟ್ಟ ಗಾಯಗಳಿವೆ ಎಂದು ಆಯ್ಕೆ ಸಮಿತಿ ಅಧ್ಯಕ್ಷ ಅಜಿತ್​ ಅಗರ್ಕರ್​, ಏಷ್ಯಾಕಪ್​ಗೆ ತಂಡ ಪ್ರಕಟಿಸಿದ ಸಮಯದಲ್ಲೇ ತಿಳಿಸಿದ್ದರು. ಹೀಗಾಗಿ ರಾಹುಲ್​ಗೆ ಮೀಸಲು ಆಟಗಾರರಾಗಿ ಸಂಜು ಸ್ಯಾಮ್ಸನ್​ರನ್ನು ತಂಡದಲ್ಲಿ ಹೆಸರಿಸಲಾಗಿದೆ.

ರಾಹುಲ್​ ಬ್ಯಾಟಿಂಗ್​ ಫಿಟ್ನೆಸ್​ ಬಗ್ಗೆ ಎನ್​ಸಿಎ ತರಬೇತಿ ಸಿಬ್ಬಂದಿಗೆ ತೃಪ್ತಿ ಇದೆ. ಆದರೆ ಅವರು ವಿಕೆಟ್​ ಕೀಪಿಂಗ್​ ಕೂಡ ನಿರ್ವಹಿಸಲು ಇನ್ನೂ ಸಿದ್ದರಾಗಿಲ್ಲ ಎನ್ನಲಾಗಿದೆ. ಇದರಿಂದಾಗಿ ಅವರು ಏಷ್ಯಾಕಪ್​ನಲ್ಲಿ ಸೆಪ್ಟೆಂಬರ್​ 2ರಂದು ಪಾಕಿಸ್ತಾನ ವಿರುದ್ಧ ನಡೆಯಲಿರುವ ಪಂದ್ಯಕ್ಕೆ ಅಲಭ್ಯರಾಗಬಹುದು ಎನ್ನಲಾಗಿದೆ.

https://www.vijayavani.net/wasim-jaffer-gives-moon-pitch-report-suggests-best-combination-after-chandrayan-3-successful-landing