ರಾಷ್ಟ್ರೀಯ ಸೀನಿಯರ್​ ಬಾಲ್​ ಬ್ಯಾಡ್ಮಿಂಟನ್​ನಲ್ಲಿ ಕರ್ನಾಟಕ ಮಹಿಳಾ ತಂಡ ಚಾಂಪಿಯನ್​

ಬೆಂಗಳೂರು: ಮಹಾರಾಷ್ಟ್ರದ ಗಡ್ಚಿರೋಲಿಯಲ್ಲಿ ಬುಧವಾರ ಮುಕ್ತಾಯಗೊಂಡ 69ನೇ ರಾಷ್ಟ್ರೀಯ ಸೀನಿಯರ್​ ಬಾಲ್​ ಬ್ಯಾಡ್ಮಿಂಟನ್​ ಚಾಂಪಿಯನ್​ಷಿಪ್​ನಲ್ಲಿ ಕರ್ನಾಟಕ ಮಹಿಳೆಯರ ತಂಡ ಚಾಂಪಿಯನ್​ ಆಗಿ ಹೊರಹೊಮ್ಮಿದೆ.

ಭಾರತೀಯ ಬಾಲ್​ ಬ್ಯಾಡ್ಮಿಂಟನ್​ ಫೆಡರೇಷನ್​ ಹಾಗೂ ಮಹಾರಾಷ್ಟ್ರ ಬಾಲ್​ ಬ್ಯಾಡ್ಮಿಂಟನ್​ ಅಸೋಸಿಯೇಷನ್​ ಜಂಟಿ ಆಶ್ರಯದಲ್ಲಿ ನಡೆದ ಕೂಟದ ಫೈನಲ್​ನಲ್ಲಿ ಕರ್ನಾಟಕ ತಂಡ ಕಳೆದ ಬಾರಿಯ ಚಾಂಪಿಯನ್​ ತಮಿಳುನಾಡು ತಂಡವನ್ನು 35-29, 35-26 ನೇರ ಸೆಟ್​ಗಳಿಂದ ಸೋಲಿಸಿ ಪ್ರಶಸ್ತಿಯನ್ನು ತನ್ನದಾಗಿಸಿಕೊಂಡಿತು. ಸೆಮಿಫೈನಲ್​ ಪಂದ್ಯದಲ್ಲಿ ರಾಜ್ಯ ತಂಡ ಕೇರಳ ತಂಡವನ್ನು 35-11, 35-16 ನೇರ ಸೆಟ್​ಗಳಿಂದ ಹಾಗೂ ತಮಿಳುನಾಡು ತಂಡ ಆಂಧ್ರ ಪ್ರದೇಶ ತಂಡವನ್ನು 35-28, 35-20 ನೇರ ಸೆಟ್​ಗಳಿಂದ ಸೋಲಿಸಿತು.

ದಿವ್ಯ ಎಂ.ಎಸ್​. ನೇತೃತ್ವದ ರಾಜ್ಯ ಮಹಿಳಾ ತಂಡ ಲೀಗ್​ ಹಂತದ ಪಂದ್ಯಗಳಲ್ಲಿ ಬಿ ಬಣದ ಅಗ್ರಸ್ಥಾನಿಯಾಗಿ ಕ್ವಾರ್ಟರ್​ಫೈನಲ್​ನಲ್ಲಿ ರಾಜಸ್ಥಾನವನ್ನು ನೇರ ಸೆಟ್​ಗಳಿಂದ ಸೋಲಿಸಿತ್ತು. ಟೂರ್ನಿಯುದ್ದಕ್ಕೂ ಅತ್ಯುತ್ತಮ ಪ್ರದರ್ಶನವನ್ನು ನೀಡಿದ ಕರ್ನಾಟಕ ರಾಜ್ಯ ತಂಡದ ಪಲ್ಲವಿ.ಬಿ.ಎಸ್​. ಹಾಗೂ ಸಹನ ಎಚ್​.ವೈ.ಗೆ ಸ್ಟಾರ್​ ಆಫ್​ ಇಂಡಿಯಾ ಪ್ರಶಸ್ತಿ ನೀಡಿ ಗೌರವಿಸಲಾಯಿತು.

ಪಲ್ಲವಿ ಬಿ.ಎಸ್​. ಟೂರ್ನಿಯ ಅತ್ಯುತ್ತಮ ಆಟಗಾರ್ತಿ ಪ್ರಶಸ್ತಿಯನ್ನು ತನ್ನದಾಗಿಸಿಕೊಂಡರು. ರಾಜ್ಯ ಮಹಿಳಾ ತಂಡ ಡಬಲ್ಸ್​ ಪಂದ್ಯದಲ್ಲೂ ಚಾಂಪಿಯನ್​ ಆಗಿ ಹೊರಹೊಮ್ಮಿದ್ದು, ಪುರುಷರ ಡಬಲ್ಸ್​ ತಂಡ ತೃತೀಯ ಸ್ಥಾನವನ್ನು ಪಡೆದುಕೊಂಡಿತು.

https://www.vijayavani.net/indian-premier-league-likely-to-be-held-in-india-despite-elections