ನವದೆಹಲಿ: ಮುಂಬರುವ ಸಾರ್ವತ್ರಿಕ ಚುನಾವಣೆಯ ನಡುವೆಯೂ, ಐಪಿಎಲ್ 17ನೇ ಆವೃತ್ತಿಯನ್ನು ಸಂಪೂರ್ಣವಾಗಿ ಭಾರತದಲ್ಲೇ ಆಯೋಜಿಸಲಾಗುವುದು ಎಂದು ಬಿಸಿಸಿಐ ಮೂಲಗಳು ತಿಳಿಸಿವೆ.
ಚುನಾವಣೆಯ ದಿನಾಂಕ ಇನ್ನೂ ನಿಗದಿಯಾಗಿರದಿದ್ದರೂ, ಏಪ್ರಿಲ್&ಮೇನಲ್ಲೇ ನಡೆಯುವುದು ಖಚಿತ. ಈ ನಡುವೆ ಐಪಿಎಲ್ ಟೂರ್ನಿಯನ್ನು ಮಾರ್ಚ್ 22ರಂದೇ ಆರಂಭಿಸಲು ಬಿಸಿಸಿಐ ಚಿಂತಿಸಿದೆ. ಟೂರ್ನಿಯನ್ನು ಸ್ಥಳಾಂತರಿಸುವ ಯಾವ ಯೋಚನೆಯೂ ಬಿಸಿಸಿಐಗೆ ಇಲ್ಲ. ಆದರೆ ಕೆಲ ರಾಜ್ಯ ಸರ್ಕಾರಗಳು, ಭದ್ರತಾ ಕಾರಣ ನೀಡಿ ಪಂದ್ಯಗಳ ಆತಿಥ್ಯಕ್ಕೆ ನಿರಾಕರಿಸಿದರೆ ಆಗ ಬೇರೆ ತಾಣ ಅಥವಾ ರಾಜ್ಯಗಳಿಗೆ ಆ ಪಂದ್ಯಗಳನ್ನು ಸ್ಥಳಾಂತರಿಸಲು ಬಿಸಿಸಿಐ ಯೋಜನೆ ಹಾಕಿಕೊಂಡಿದೆ.
ಇತ್ತೀಚೆಗೆ ಆಟಗಾರರ ಹರಾಜಿನಲ್ಲಿ ಹೆಚ್ಚಿನ ಫ್ರಾಂಚೈಸಿಗಳು, ಕೆಲ ಸ್ಟಾರ್ ವೇಗಿಗಳನ್ನು ದುಬಾರಿ ಮೊತ್ತಕ್ಕೆ ಖರೀದಿಸಿದಾಗ ಈ ಸಲದ ಐಪಿಎಲ್ ಟೂರ್ನಿಯು ವೇಗದ ಬೌಲಿಂಗ್ ಸ್ನೇಹಿ ವಿದೇಶಿ ಪಿಚ್ಗಳಲ್ಲಿ ನಡೆಯಲಿದೆಯೇ ಎಂಬ ಅನುಮಾನ ಮೂಡಿತ್ತು.
ಈ ಹಿಂದೆ 2009ರಲ್ಲಿ ಲೋಕಸಭಾ ಚುನಾವಣೆಯ ಕಾರಣದಿಂದಾಗಿ ಸಂಪೂರ್ಣ ಐಪಿಎಲ್ ಟೂರ್ನಿ ದಕ್ಷಿಣ ಆಫ್ರಿಕಾಕ್ಕೆ ಸ್ಥಳಾಂತರಗೊಂಡಿದ್ದರೆ, 2014ರಲ್ಲಿ ಭಾಗಶಃ ಟೂರ್ನಿ ಯುಎಇಯಲ್ಲಿ ನಡೆದಿತ್ತು. ಆದರೆ 2019ರಲ್ಲಿ ಮಾತ್ರ ಚುನಾವಣೆಯ ನಡುವೆಯೂ ಸಂಪೂರ್ಣ ಟೂರ್ನಿ ಭಾರತದಲ್ಲೇ ನಡೆದಿತ್ತು.
