ಭರ್ಜರಿ ಫಾರ್ಮ್​ನಲ್ಲಿರುವ ಕನ್ನಡಿಗ ಕರುಣ್​ ನಾಯರ್​ಗೆ ಮತ್ತೆ ಭಾರತ ಪರ ಆಡುವ ಕನಸು! ದಿಗ್ಗಜ ಸಚಿನ್​ ಮೆಚ್ಚುಗೆ...

ವಡೋದರ: ಭಾರತ ತಂಡದಿಂದ ಹೊರಬಿದ್ದ ಬಳಿಕ ತೀವ್ರ ರನ್​ಬರದಿಂದಾಗಿ 2022ರಲ್ಲಿ ಕರ್ನಾಟಕ ತಂಡದಿಂದಲೂ ಕೊಕ್​ ಪಡೆದಿದ್ದ ಕರುಣ್​ ನಾಯರ್​, "ಡಿಯರ್​ ಕ್ರಿಕೆಟ್​, ದಯವಿಟ್ಟು ನನಗೆ ಇನ್ನೊಂದು ಅವಕಾಶ ನೀಡು' ಎಂದು ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್​ ಹಾಕಿದ್ದರು. ನಂತರದಲ್ಲಿ ಅವರು ವಿದರ್ಭಕ್ಕೆ ವಲಸೆ ಹೋಗಿದ್ದರು. ಇದೀಗ ವಿಜಯ್​ ಹಜಾರೆ ಟ್ರೋಫಿಯಲ್ಲಿ ರನ್​ಪ್ರವಾಹ ಹರಿಸುವ ಮೂಲಕ ಅವರ ವೃತ್ತೀಜಿವನ ಮರುಹುಟ್ಟು ಪಡೆದುಕೊಂಡಿದ್ದು, ಮತ್ತೊಮ್ಮೆ ರಾಷ್ಟ್ರೀಯ ಆಯ್ಕೆಗಾರರ ಗಮನಸೆಳೆದಿದ್ದಾರೆ.

ಐಸಿಸಿ ಚಾಂಪಿಯನ್ಸ್​ ಟ್ರೋಫಿ ತಂಡ ಆಯ್ಕೆಗೆ ಮುನ್ನ ಮತ್ತೆ ಟೀಮ್​ ಇಂಡಿಯಾದ ಕದ ತಟ್ಟಿದ್ದಾರೆ. ಮತ್ತೆ ಭಾರತ ಪರ ಆಡುವ ಕನಸು ತನಗಿದೆ ಎಂದಿರುವ 33 ವರ್ಷದ ಕರುಣ್​, ಅದೇ ಕಾರಣದಿಂದ ನಾನೀಗಲು ಕ್ರಿಕೆಟ್​ ಆಡುತ್ತಿರುವೆ. ಮತ್ತೆ ದೇಶದ ಪರ ಆಡುವುದೇ ನನ್ನ ಏಕಮಾತ್ರ ಗುರಿಯಾಗಿದೆ' ಎಂದಿದ್ದಾರೆ. ಭಾರತ ಪರ ಟೆಸ್ಟ್​ ಕ್ರಿಕೆಟ್​ನಲ್ಲಿ ತ್ರಿಶತಕ ಸಿಡಿಸಿರುವ 2ನೇ ಭಾರತೀಯರೆನಿಸಿರುವ ಕರುಣ್​, "ಕ್ರಿಕೆಟ್​ನಿಂದ ಹೊರಗಿದ್ದ ಕಠಿಣ ದಿನಗಳಿಂದ ಪಾಠ ಕಲಿತಿರುವೆ ಮತ್ತು ಬಲಿಷ್ಠವಾಗಿರುವೆ. ಕ್ರಿಕೆಟಿಗನಾಗಿಯೂ ಸುಧಾರಣೆ ಕಂಡಿರುವೆ' ಎಂದಿದ್ದಾರೆ.

ಐಸಿಸಿ ಚಾಂಪಿಯನ್ಸ್​ ಟ್ರೋಫಿಗೆ ಪ್ರಧಾನ ತಂಡದಲ್ಲಿ ಅಲ್ಲದಿದ್ದರೂ, ಮೀಸಲು ಬಳಗದಲ್ಲಿ ಕರುಣ್​ಗೆ ಸ್ಥಾನ ನಿರೀಕ್ಷಿಸಲಾಗಿದೆ. ನಂತರ ಜೂನ್​-ಜುಲೈನಲ್ಲಿ ಇಂಗ್ಲೆಂಡ್​ ಪ್ರವಾಸದ ಟೆಸ್ಟ್​ ಸರಣಿಗೆ ಕರುಣ್​ ನಾಯರ್ ಭಾರತ ತಂಡಕ್ಕೆ ಮರಳುವ ಸಾಧ್ಯತೆ ಇದೆ.

ವಿಜಯ್​ ಹಜಾರೆ ಟ್ರೋಫಿಯಲ್ಲಿ ಕರುಣ್​ ನಾಯರ್​ ಪ್ರದರ್ಶಿಸಿರುವ ಭರ್ಜರಿ ಆಟವನ್ನು ದಿಗ್ಗಜ ಸಚಿನ್​ ತೆಂಡುಲ್ಕರ್​ ಕೂಡ ಶುಕ್ರವಾರ ಸಾಮಾಜಿಕ ಜಾಲತಾಣದಲ್ಲಿ ಹೊಗಳಿದ್ದು, ಇದೊಂದು ಅಸಾಧಾರಣ ಬ್ಯಾಟಿಂಗ್​. ಇಂಥ ಆಟ ಸುಮ್ಮನೆ ಬರುವುದಿಲ್ಲ. ಅಪಾರ ಏಕಾಗ್ರತೆ ಮತ್ತು ಕಠಿಣ ಪರಿಶ್ರಮ ಅಗತ್ಯವಾಗಿರುತ್ತದೆ. ಇದೇ ರೀತಿ ಆಡುತ್ತಿರುವ ಕರುಣ್​, ಪ್ರತಿ ಅವಕಾಶವನ್ನೂ ಬಳಸಿಕೋ ಎಂದು ಬರೆದಿದ್ದಾರೆ.

https://www.vijayavani.net/the-future-of-virat-kohlis-career-is-in-the-hands-of-shubman-gill-do-you-know-why