ಸ್ಫೋಟಕ ಆಟಗಾರ ವೆಂಕಟೇಶ್​ ಅಯ್ಯರ್​ RCB ತೆಕ್ಕೆಗೆ: ರಜತ್ ಪಡೆಯ ಬ್ಯಾಟಿಂಗ್ ಬಳಗ​ ಮತ್ತಷ್ಟು ಬಲಿಷ್ಠ!​

ಅಬುಧಾಬಿ: ಕೋಲ್ಕತ್ತ ನೈಟ್​ ರೈಡರ್ಸ್​ ತಂಡದ ಮಾಜಿ ಸ್ಫೋಟಕ ಆಟಗಾರ ವೆಂಕಟೇಶ್​ ಅಯ್ಯರ್​ ಅವರು ಇಂದು ಅಬುಧಾಬಿಯಲ್ಲಿ ನಡೆದ ಐಪಿಎಲ್​ ಮಿನಿ ಹರಾಜಿನಲ್ಲಿ 7 ಕೋಟಿ ರೂ.ಗೆ ಹಾಲಿ ಚಾಂಪಿಯನ್​ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ( RCB ) ತಂಡದ ಪಾಲಾಗಿದ್ದಾರೆ.

ಟೀಮ್ ಇಂಡಿಯಾದ ಸ್ಟಾರ್ ಆಟಗಾರ ವೆಂಕಟೇಶ್ ಅಯ್ಯರ್ ಅವರು 2 ಕೋಟಿ ರೂ. ಮೂಲ ಬೆಲೆಯೊಂದಿಗೆ ಹರಾಜಿಗೆ ಹೋದರು. ಅವರನ್ನು ಖರೀದಿಸಲು ಫ್ರಾಂಚೈಸಿಗಳು ತುಂಬಾ ಪೈಪೋಟಿ ನಡೆಸಿದವು. ಆರಂಭದಲ್ಲಿ, ಲಖನೌ ಮತ್ತು ಆರ್‌ಸಿಬಿ ತಂಡ ಅವರಿಗಾಗಿ ತುಂಬಾ ಪೈಪೋಟಿ ನಡೆಸಿದವು. ಆದರೆ, ಲಖನೌ ಮಧ್ಯದಲ್ಲಿ ಬಿಡ್ಡಿಂಗ್​ನಿಂದ ಹಿಂದೆ ಸರಿಯಿತು. ಬಳಿಕ ಕೆಕೆಆರ್ ಮತ್ತು ಆರ್​ಸಿಬಿ ನಡುವೆ ಪೈಪೋಟಿ ನಡೆಯಿತು. ಎರಡು ತಂಡಗಳು ತುಂಬಾ ಹೊತ್ತು ಪೈಪೋಟಿ ನಡೆಸಿದವು. ಆದರೆ, ಕೊನೆಯಲ್ಲಿ ಕೆಕೆಆರ್ ಹಿಂದೆ ಸರಿಯಿತು. ಅಂತಿಮವಾಗಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ವೆಂಕಟೇಶ್​ ಅಯ್ಯರ್​ ಅವರನ್ನು 7 ಕೋಟಿ ರೂ.ಗೆ ಖರೀದಿಸಿತು.

ಅಬುಧಾಬಿಯಲ್ಲಿ ಮಧ್ಯಾಹ್ನ 2.30 ಕ್ಕೆ ಪ್ರಾರಂಭವಾದ ಮಿನಿ ಹರಾಜು ಪ್ರಮುಖ ಆಟಗಾರರಿಗೆ ಅನಿರೀಕ್ಷಿತ ಹೊಡೆತ ನೀಡಿತು. ಬಹುತೇಕ ಆಟಗಾರರು ಮಾರಾಟವಾಗದೆ ಉಳಿದಿದ್ದಾರೆ. ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಪೃಥ್ವಿ ಶಾ, ಜ್ಯಾಕ್ ಪ್ರೆಸ್ಸರ್ ಮತ್ತು ಡೆವೊನ್ ಕಾನ್ವೇ ಮಾರಾಟವಾಗದೆ ಉಳಿದರು. ಈ ಮೂವರು ಆಟಗಾರರು ಹರಾಜಿನಲ್ಲಿ ಮೊದಲು ಬಂದರು ಆದರೆ, ಯಾವುದೇ ಫ್ರಾಂಚೈಸಿ ಅವರನ್ನು ಖರೀದಿಸಲು ಮುಂದೆ ಬರಲಿಲ್ಲ. ಇದು ಪೃಥ್ವಿ ಶಾ ಸೇರಿದಂತೆ ಮೂವರು ಆಟಗಾರರನ್ನು ಆಘಾತಗೊಳಿಸಿತು. ನಂತರ ಡೇವಿಡ್ ಮಿಲ್ಲರ್ ಎರಡು ಕೋಟಿ ಬಿಡ್​ನೊಂದಿಗೆ ಡೆಲ್ಲಿ ಕ್ಯಾಪಿಟಲ್ಸ್ ಸೇರಿದರು. ಮಿಲ್ಲರ್​ ಈ ಹಿಂದೆ ಗುಜರಾತ್ ಟೈಟಾನ್ಸ್ ಪರ ಆಡಿದ್ದರು, (ಏಜೆನ್ಸೀಸ್​).