ಕೊನೇ ಘಳಿಗೆಯಲ್ಲಿ ಗುಜರಾತ್​ ಟೈಟನ್ಸ್​ ತಂಡಕ್ಕೆ ಬಿಗ್​ ಶಾಕ್​: ಹವಾಮಾನ ವೈಪರೀತ್ಯದಿಂದ ಆರ್​ಸಿಬಿಗೆ ವರದಾನ! IPL Final

IPL Final : ಐಪಿಎಲ್ ಫೈನಲ್ ಪಂದ್ಯಕ್ಕೆ ಕೆಲವೇ ಗಂಟೆಗಳು ಬಾಕಿ ಇರುವಾಗ ಗುಜರಾತ್ ಟೈಟನ್ಸ್ ತಂಡಕ್ಕೆ ಪ್ರತಿಕೂಲ ಹವಾಮಾನವು ಭಾರಿ ಹಿನ್ನಡೆ ಉಂಟುಮಾಡಿದೆ. ಪಂಜಾಬ್ ಸೇರಿದಂತೆ ವಾಯುವ್ಯ ಭಾರತದಲ್ಲಿ ಸುರಿಯುತ್ತಿರುವ ಭಾರಿ ಮಳೆಯಿಂದಾಗಿ ಶುಭಮಾನ್ ಗಿಲ್ ನೇತೃತ್ವದ ಗುಜರಾತ್ ತಂಡದ ಚಾರ್ಟರ್ಡ್ ವಿಮಾನ ವಿಳಂಬವಾಗಿದ್ದು, ಅವರು ನಿಗದಿತ ಸಮಯಕ್ಕೆ ಅಹಮದಾಬಾದ್ ತಲುಪಲು ಸಾಧ್ಯವಾಗಿಲ್ಲ. ಈ ಹಠಾತ್ ಹವಾಮಾನ ವೈಪರೀತ್ಯದಿಂದಾಗಿ, ಅಂತಿಮ ಮಹಾಸಮರಕ್ಕೂ ಮುನ್ನ ಗುಜರಾತ್ ತಂಡಕ್ಕೆ ಕನಿಷ್ಠ ಅಭ್ಯಾಸ ನಡೆಸಲು ಸಹ ಸಮಯ ಸಿಗದಂತಹ ಕಠಿಣ ಪರಿಸ್ಥಿತಿ ನಿರ್ಮಾಣವಾಗಿದೆ.

ನಿನ್ನೆ ಮಧ್ಯಾಹ್ನವೇ ಚಂಡೀಗಢದಿಂದ ಹೊರಡಬೇಕಿದ್ದ ಗುಜರಾತ್ ತಂಡಕ್ಕೆ ಪ್ರತಿಕೂಲ ಹವಾಮಾನದ ಕಾರಣದಿಂದಾಗಿ ವಿಮಾನ ನಿಲ್ದಾಣ ಪ್ರಾಧಿಕಾರವು ಟೇಕ್-ಆಫ್ ಮಾಡಲು ಅನುಮತಿ ನಿರಾಕರಿಸಿತು. ದೀರ್ಘ ಕಾಯುವಿಕೆಯ ನಂತರ, ಕೊನೆಗೂ ನಿನ್ನೆ ರಾತ್ರಿ 10 ಗಂಟೆಯ ಬಳಿಕ ತಂಡವು ಅಹಮದಾಬಾದ್‌ನಲ್ಲಿ ಇಳಿಯಲು ಯಶಸ್ವಿಯಾಯಿತು. ಅಲ್ಲಿಂದ ಸುಮಾರು 30 ನಿಮಿಷಗಳ ಪ್ರಯಾಣದ ನಂತರ, ಆಟಗಾರರು ಗಾಂಧಿನಗರದಲ್ಲಿರುವ ತಮ್ಮ ಹೋಟೆಲ್ ತಲುಪುವಷ್ಟರಲ್ಲಿ ಮಧ್ಯರಾತ್ರಿಯೇ ಆಗಿತ್ತು.

ಐಪಿಎಲ್ ಇತಿಹಾಸದಲ್ಲೇ ಫೈನಲ್ ಪಂದ್ಯದ ಹಿಂದಿನ ದಿನ ತಂಡವೊಂದು ಪ್ರಯಾಣ ಬೆಳೆಸಬೇಕಾಗಿ ಬಂದಿರುವುದು ಇದೇ ಮೊದಲು. ಈ ಬಾರಿ ಬಿಸಿಸಿಐ (BCCI) ಪ್ಲೇ-ಆಫ್ ಪಂದ್ಯಗಳನ್ನು ಮೂರು ಬೇರೆ ಬೇರೆ ಕ್ರೀಡಾಂಗಣಗಳಲ್ಲಿ ಆಯೋಜಿಸಲು ನಿರ್ಧರಿಸಿದ್ದೇ ಈ ಪ್ರಯಾಣದ ಬಿಕ್ಕಟ್ಟಿಗೆ ಮುಖ್ಯ ಕಾರಣವಾಗಿದೆ. ಮತ್ತೊಂದೆಡೆ, ಗುಜರಾತ್ ತಂಡದ ಎದುರಾಳಿಯಾದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ಈಗಾಗಲೇ ಅಹಮದಾಬಾದ್ ತಲುಪಿದೆ.

ಧರ್ಮಶಾಲಾದಲ್ಲಿ ನಡೆದ ಮೊದಲ ಕ್ವಾಲಿಫೈಯರ್ ಪಂದ್ಯವನ್ನು ಗೆದ್ದ ನಂತರ ಆರ್‌ಸಿಬಿ ತಂಡವು ಬುಧವಾರವೇ ಅಹಮದಾಬಾದ್‌ಗೆ ಬಂದಿಳಿದಿದ್ದು, ರಜತ್ ಪಾಟೀದಾರ್ ನೇತೃತ್ವದ ಈ ತಂಡ ಈಗಾಗಲೇ ಎರಡು ಅಭ್ಯಾಸ ಅವಧಿಗಳನ್ನು ಪೂರ್ಣಗೊಳಿಸಿದೆ. ಆರ್‌ಸಿಬಿ ಸತತ ಎರಡನೇ ಬಾರಿಗೆ ಐಪಿಎಲ್ ಫೈನಲ್ ಪ್ರವೇಶಿಸುತ್ತಿದ್ದು, ನಿನ್ನೆ ಮಾಧ್ಯಮಗಳೊಂದಿಗೆ ಮಾತನಾಡಿದ ನಾಯಕ ರಜತ್ ಪಾಟೀದಾರ್, ಪಂದ್ಯದ ಸ್ಥಳಕ್ಕೆ ಬೇಗನೆ ತಲುಪಿರುವುದು ತಂಡಕ್ಕೆ ಸಾಕಷ್ಟು ಅನುಕೂಲವಾಗಲಿದೆ ಎಂದು ತಿಳಿಸಿದ್ದಾರೆ.