ಐಪಿಎಲ್ ಶೀರ್ಷಿಕೆ ಪ್ರಾಯೋಜಕತ್ವಕ್ಕೆ ಗರಿಷ್ಠ ಮೊತ್ತದ ಬಿಡ್ ಸಲ್ಲಿಸಿದವರಿಗೇ ಹಕ್ಕು ಒಲಿಯುವುದು ಖಾತ್ರಿಯಲ್ಲ ಎಂದು ಬಿಸಿಸಿಐ ಈಗಾಗಲೆ ಸ್ಪಷ್ಟಪಡಿಸಿದೆ. ಬಿಡ್ ಸಲ್ಲಿಸಿದ ಕಂಪನಿಯ ಬಗ್ಗೆ ಬಿಸಿಸಿಐಗೆ ಸಮಾಧಾನವಾಗದಿದ್ದರೆ ಅದು ಹಕ್ಕು ನೀಡದಿರುವ ಅಧಿಕಾರವನ್ನೂ ಉಳಿಸಿಕೊಂಡಿದೆ. ಬಿಡ್ ಸಲ್ಲಿಸಿದ ಕಂಪನಿಯ ಹಿನ್ನೆಲೆಯನ್ನೂ ಬಿಸಿಸಿಐ ಪರಿಶೀಲಿಸಲಿದ್ದು, ಭಾರತದ ಕಂಪನಿಗೆ ಹೆಚ್ಚಿನ ಆದ್ಯತೆ ನೀಡಲಿದೆ. ಮತ್ತೆ ಚೀನಾ ಕಂಪನಿ ಜತೆಗೆ ಒಪ್ಪಂದ ಮಾಡಿಕೊಂಡರೆ, ವಿವೋ ಕಂಪನಿಯನ್ನು ಕೈಬಿಟ್ಟ ನಿರ್ಧಾರ ಅಸಂಬದ್ಧವೆನಿಸಲಿದೆ ಎಂಬುದು ಬಿಸಿಸಿಐ ವಾದವಾಗಿದೆ. ಮಧ್ಯವರ್ತಿಗಳಿಗೆ ಬಿಡ್ ಸಲ್ಲಿಸಲು ಅವಕಾಶವಿಲ್ಲ ಎಂದೂ ತಿಳಿಸಿದೆ. ಇದಲ್ಲದೆ ಬಿಡ್ ಸಲ್ಲಿಸುವ ಕಂಪನಿ, ವಾರ್ಷಿಕ 300 ಕೋಟಿ ರೂ. ವಹಿವಾಟು ಹೊಂದಿರಬೇಕು ಎಂಬ ಷರತ್ತನ್ನೂ ಬಿಸಿಸಿಐ ವಿಧಿಸಿದೆ.
