ಆರಂಭಿಕರಾಗಿ ಕಣಕ್ಕಿಳಿಯಲಿದ್ದಾರೆ ವಿರಾಟ್​ ಕೊಹ್ಲಿ-ಫಿಲ್​ ಸಾಲ್ಟ್​: ಇದೇ ನೋಡಿ RCBಯ ಪ್ಲೇಯಿಂಗ್​ ಇಲೆವೆನ್​!

RCB : ಕ್ರಿಕೆಟ್ ಅಭಿಮಾನಿಗಳು ಕಾತರದಿಂದ ಕಾಯುತ್ತಿರುವ ಐಪಿಎಲ್ 18ನೇ ಸೀಸನ್​ ಕೇವಲ 5 ದಿನಗಳಲ್ಲಿ (ಮಾರ್ಚ್ 22) ಪ್ರಾರಂಭವಾಗಲಿದೆ. ಲೀಗ್‌ನ ಉದ್ಘಾಟನಾ ಪಂದ್ಯದಲ್ಲಿ, ಹಾಲಿ ಚಾಂಪಿಯನ್ ಕೋಲ್ಕತ ನೈಟ್​ ರೈಡರ್ಸ್​ (ಕೆಕೆಆರ್​) ತಂಡವು ಇಲ್ಲಿಯವರೆಗೆ ಒಮ್ಮೆಯು ಪ್ರಶಸ್ತಿ ಗೆಲ್ಲದ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು (ಆರ್‌ಸಿಬಿ) ತಂಡವನ್ನು ಎದುರಿಸಲಿದೆ. ಈ ಪಂದ್ಯವು ಕೆಕೆಆರ್‌ನ ತವರು ಮೈದಾನವಾದ ಈಡನ್ ಗಾರ್ಡನ್ಸ್‌ನಲ್ಲಿ ನಡೆಯಲಿದೆ.

ಹಿಂದಿನ ಪ್ರತಿ ಸೀಸನ್‌ನಂತೆ ಈ ಬಾರಿಯೂ ಆರ್‌ಸಿಬಿ ಈ ಬಾರಿ ಕಪ್​ ನಮ್ದೆ ಎಂಬ ಘೋಷಣೆಯೊಂದಿಗೆ ಕಣಕ್ಕೆ ಇಳಿಯಲಿದೆ. ಕಳೆದ 17 ಸೀಸನ್‌ಗಳಲ್ಲಿ ಒಂದೇ ಒಂದು ಪ್ರಶಸ್ತಿಯನ್ನು ಗೆಲ್ಲದ ಆರ್‌ಸಿಬಿ, ಈ ಬಾರಿ ತಮ್ಮ ಕನಸನ್ನು ನನಸಾಗಿಸುವ ಆಶಯವನ್ನು ಹೊಂದಿದೆ. ಈ ಬಾರಿ, ಆರ್‌ಸಿಬಿಯ ಪ್ರಶಸ್ತಿ ಕನಸು ನನಸಾಗಲಿದೆ ಎಂದು ಒಂದು ಅಂಶ ಸೂಚಿಸುತ್ತದೆ. ಅದೇನೆಂದರೆ, ತಂಡದ ಸ್ಟಾರ್ ಆಟಗಾರ ವಿರಾಟ್ ಕೊಹ್ಲಿ ಅವರ ಜೆರ್ಸಿ ಸಂಖ್ಯೆಗೆ ಈ ಬಾರಿ ಐಪಿಎಲ್ ಸೀಸನ್​ ಸಂಖ್ಯೆ ಹೊಂದಿಕೆಯಾಗುತ್ತಿದೆ. ಅಂದರೆ, ವಿರಾಟ್ ಅವರ ಜೆರ್ಸಿ ಸಂಖ್ಯೆ 18. ಈ ಐಪಿಎಲ್ ಸೀಸನ್​ ಸಂಖ್ಯೆಯು ಕೂಡ ಹದಿನೆಂಟು. ವಿರಾಟ್​ಗೆ 18 ಲಕ್ಕಿ ನಂಬರ್​ ಆಗಿರುವುದರಿಂದ ಈ ಬಾರಿ ಅದೃಷ್ಟ ಕೈಹಿಡಿಯಲಿದೆ ಎಂದು ಹೇಳಲಾಗುತ್ತಿದೆ. ಅದೇನೇ ಇರಲಿ, ವಿರಾಟ್ ಅವರ ಅದೃಷ್ಟ ಸಂಖ್ಯೆ 18 ಆರ್‌ಸಿಬಿಗೆ ಪ್ರಶಸ್ತಿ ತಂದುಕೊಡುತ್ತದೆಯೇ ಎಂದು ಕಾದು ನೋಡಬೇಕಾಗಿದೆ.

ಇದೇ ಸಂದರ್ಭದಲ್ಲಿ ಹಿಂದಿನ ಸೀಸನ್​ಗಳಿಗೆ ಹೋಲಿಸಿದರೆ ಸೀಸನ್​ನಲ್ಲಿ ಆರ್‌ಸಿಬಿ ಸ್ವಲ್ಪ ಹೊಸದಾಗಿ ಕಾಣುತ್ತದೆ. ಬೆಂಗಳೂರು ಫ್ರಾಂಚೈಸಿ, ಹೊಸ ನಾಯಕ (ರಜತ್ ಪಾಟಿದಾರ್) ಮತ್ತು ಹೊಸ ಆಟಗಾರರೊಂದಿಗೆ ಬಲಿಷ್ಠವಾಗಿ ಕಾಣುತ್ತಿದೆ. ಮೆಗಾ ಹರಾಜಿನ ಮೊದಲು, ಆರ್‌ಸಿಬಿ ವಿರಾಟ್ (21 ಕೋಟಿ), ರಜತ್ ಪಾಟಿದಾರ್ (11 ಕೋಟಿ) ಮತ್ತು ಯಶ್ ದಯಾಳ್ (5 ಕೋಟಿ) ಅವರನ್ನು ಮಾತ್ರ ಉಳಿಸಿಕೊಂಡಿತು, ಆದರೆ, ಮ್ಯಾಕ್ಸ್‌ವೆಲ್, ಡುಪ್ಲೆಸಿಸ್ ಮತ್ತು ಸಿರಾಜ್‌ರಂತಹ ಸ್ಟಾರ್​ ಆಟಗಾರರನ್ನು ಕೈಬಿಟ್ಟಿತು.

ಇದನ್ನೂ ಓದಿ: ಅಮೀರ್​​​​ ಖಾನ್​​ ಪ್ರೀತಿಯ ಬಲೆಗೆ ಬೀಳಲು ಕಾರಣವೇನು? ಗೌರಿ ಸ್ಪ್ರಾಟ್​ ಕೊಟ್ಟ ಉತ್ತರ ವೈರಲ್​​… Gauri Spratt

ಮೆಗಾ ಹರಾಜಿನಲ್ಲಿ 25 ಆಟಗಾರರನ್ನು ಖರೀದಿಸುವ ಅವಕಾಶವನ್ನು ಆರ್‌ಸಿಬಿ ಹೊಂದಿತ್ತು, ಆದರೆ ಕೇವಲ 22 ಆಟಗಾರರಿಗೆ ಮಾತ್ರ ತೃಪ್ತಿಪಟ್ಟಿತು. ಹರಾಜಿನಲ್ಲಿ, ಆರ್‌ಸಿಬಿ ಫಿಲ್ ಸಾಲ್ಟ್, ಜಾಕೋಬ್ ಬೆಥೆಲ್, ಲಿಯಾಮ್ ಲಿವಿಂಗ್‌ಸ್ಟೋನ್, ಟಿಮ್ ಡೇವಿಡ್ ಮತ್ತು ರೊಮಾರಿಯೊ ಶೆಫರ್ಡ್‌ರಂತಹ ವಿನಾಶಕಾರಿ ವಿದೇಶಿ ಬ್ಯಾಟ್ಸ್‌ಮನ್‌ಗಳನ್ನು ಹಾಗೂ ಹ್ಯಾಜಲ್‌ವುಡ್ ಮತ್ತು ಎಂಗಿಡಿಯಂತಹ ಸ್ಟಾರ್ ವಿದೇಶಿ ವೇಗಿಗಳನ್ನು ಖರೀದಿಸಿದೆ. ಆರ್‌ಸಿಬಿಯಲ್ಲಿ ದೇಶೀಯ ತಾರೆಗಳಾದ ಜಿತೇಶ್ ಶರ್ಮಾ, ಭುವನೇಶ್ವರ್ ಕುಮಾರ್, ದೇವದತ್ ಪಡಿಕ್ಕಲ್ ಮತ್ತು ಕೃನಾಲ್ ಪಾಂಡ್ಯ ಅವರ ಮೇಲೆ ನಂಬಿಕೆ ಇಟ್ಟಿದೆ.

ಈ ಸೀಸನ್​ಗಾಗಿ ಆರ್‌ಸಿಬಿ ಆಯ್ಕೆ ಮಾಡಿದ ತಂಡವನ್ನು ನೋಡಿದರೆ, ಫಿಲ್ ಸಾಲ್ಟ್ ಮತ್ತು ವಿರಾಟ್ ಕೊಹ್ಲಿ ಇನ್ನಿಂಗ್ಸ್ ಆರಂಭಿಸುವ ಸಾಧ್ಯತೆಯಿದೆ. ಇದನ್ನು ತಂಡದ ಮುಖ್ಯ ಕೋಚ್ ಆಂಡಿ ಫ್ಲವರ್ ಕೂಡ ದೃಢಪಡಿಸಿದ್ದಾರೆ. ಒನ್-ಡೌನ್‌ನಲ್ಲಿ ನಾಯಕ ರಜತ್ ಪಾಟಿದಾರ್. ನಾಲ್ಕನೇ ಸ್ಥಾನದಲ್ಲಿ ಲಿವಿಂಗ್‌ಸ್ಟೋನ್, ಐದನೇ ಸ್ಥಾನದಲ್ಲಿ ಜಿತೇಶ್ ಶರ್ಮಾ, ಆರನೇ ಸ್ಥಾನದಲ್ಲಿ ಟಿಮ್ ಡೇವಿಡ್, ಏಳನೇ ಸ್ಥಾನದಲ್ಲಿ ಕೃನಾಲ್ ಪಾಂಡ್ಯ ಮತ್ತು ಬೌಲರ್‌ಗಳಾದ ಭುವನೇಶ್ವರ್ ಕುಮಾರ್, ಯಶ್ ದಯಾಳ್, ಹ್ಯಾಸಲ್‌ವುಡ್ ಮತ್ತು ಸುಯಾಶ್ ಶರ್ಮಾ ಅಂತಿಮ ತಂಡದಲ್ಲಿ ಇರುವ ಸಾಧ್ಯತೆಯಿದೆ.

ಆರ್‌ಸಿಬಿ ಪೂರ್ಣ ತಂಡ: ರಜತ್ ಪಾಟಿದಾರ್ (ನಾಯಕ), ವಿರಾಟ್​ ಕೊಹ್ಲಿ, ಫಿಲ್​ ಸಾಲ್ಟ್, ಜಿತೇಶ್ ಶರ್ಮಾ, ದೇವದತ್ ಪಡಿಕ್ಕಲ್, ಸ್ವಸ್ತಿಕ್ ಚಿಕಾರಾ, ಲಿಯಾಮ್ ಲಿವಿಂಗ್‌ಸ್ಟೋನ್, ಕೃನಾಲ್ ಪಾಂಡ್ಯ, ಸ್ವಪ್ನಿಲ್ ಸಿಂಗ್, ಟಿಮ್ ಡೇವಿಡ್, ರೊಮಾರಿಯೊ ಶೆಫರ್ಡ್, ಮನೋಜ್ ಭಾಂಡಗೆ, ಜಾಕೋಬ್ ಬೆಥೆಲ್, ಜೋಶ್ ಹ್ಯಾಸಲ್​ವುಡ್, ಸುವಾನ್ ತುಷಾರ, ಭುವನೇಶ್ವರ್​ ಕುಮಾರ್, ಲುಂಗಿ ಇಂಗಿಡಿ, ಅಭಿನಂದನ್ ಸಿಂಗ್,  ಯಶ್ ದಯಾಳ್.

https://www.vijayavani.net/even-with-age-the-same-temper-remains-yuvraj-singh-got-into-a-fight-with-a-west-indies-player

https://www.vijayavani.net/sunita-williams-nasas-key-announcement-on-sunita-williams-arrival