IPL-2025: ಬಿಗ್​ ಚೇಂಜ್​! ಐಪಿಎಲ್​ನಲ್ಲಿ ದೀರ್ಘಕಾಲದ ಬಳಿಕ ನಿಷ್ಠೆ ಬದಲಾಯಿಸಿಕೊಂಡ ಆಟಗಾರರು ಇವರು...

ಬೆಂಗಳೂರು: ಐಪಿಎಲ್​ನಲ್ಲಿ ಇದುವರೆಗಿನ ಎಲ್ಲ 18 ಆವೃತ್ತಿಗಳಲ್ಲೂ ಒಂದೇ ತಂಡದ ಪರ ಆಡುವ ಅದೃಷ್ಟ ದೊರೆತಿದ್ದು ಒಬ್ಬ ಆಟಗಾರನಿಗೆ ಮಾತ್ರ. ಅದು ವಿರಾಟ್​ ಕೊಹ್ಲಿ. ಅವರು ಮೊದಲ ಆವೃತ್ತಿಯಿಂದಲೂ ಆರ್​ಸಿಬಿ ಪರವೇ ಆಡುತ್ತ ಬಂದಿದ್ದಾರೆ. ಉಳಿದಂತೆ ಎಂಎಸ್​ ಧೋನಿ, ರೋಹಿತ್​ ಶರ್ಮ, ಮನೀಷ್​ ಪಾಂಡೆ ಕೂಡ ಎಲ್ಲ 18 ಆವೃತ್ತಿಗಳಲ್ಲೂ ಕಾಣಿಸಿಕೊಂಡಿರುವ ಆಟಗಾರರಾಗಿದ್ದರೂ ಅವರು, ಆರಂಭದಲ್ಲಿ ಅಥವಾ ನಡುವೆ ಬೇರೆ ತಂಡದ ಪರವೂ ಆಡಿದವರಾಗಿದ್ದಾರೆ. ಐಪಿಎಲ್​ನಲ್ಲಿ ಇನ್ನು ಕೆಲ ಆಟಗಾರರು ಒಂದೇ ತಂಡದ ಪರ ಹೆಚ್ಚಿನ ಪಂದ್ಯಗಳನ್ನು ಆಡಿದ್ದು, ಆ ಆಟಗಾರರ ಹೆಸರು ಎತ್ತಿದರೆ ಅವರ ಆ ತಂಡವೇ ನೆನಪಾಗುತ್ತದೆ. ಆ ತಂಡದ ಪರ ಆಡಿ ಹಲವಾರು ಗೆಲುವುಗಳ ರೂವಾರಿಗಳೆನಿಸಿದ್ದ ಅವರು ಅದೇ ತಂಡದ ಬ್ರ್ಯಾಂಡ್​ ಆಗಿದ್ದವರು. ಹೀಗಿದ್ದರೂ ಈ ಬಾರಿ ಕೆಲ ಕಾರಣಗಳಿಂದಾಗಿ ಅವರ ತಂಡಗಳು ಬದಲಾಗಿವೆ. ರಿಟೇನ್​ ಆಗದ ಈ ಆಟಗಾರರು ಬಳಿಕ ಮೆಗಾ ಹರಾಜಿನಲ್ಲಿ ಬೇರೆ ತಂಡದ ಪಾಲಾಗಿದ್ದಾರೆ. ಈ ಸಲ ನಿಷ್ಠೆ ಬದಲಾಯಿಸಿರುವ ಅಂಥ ಆಟಗಾರರ ಮತ್ತು ಅವರು ಈ ಬಾರಿ ತಮ್ಮ ಹಳೆಯ ತಂಡದ ಆಪ್ತರನ್ನೇ ಮೈದಾನದಲ್ಲಿ ಎದುರಿಸುವ ಸವಾಲಿನ ಬಗ್ಗೆ ಸಂಪ್ತವಾದ ವಿವರ ಇಲ್ಲಿದೆ...

*ರಿಷಭ್​ ಪಂತ್​ (ಡೆಲ್ಲಿ ಟು ಲಖನೌ)

ಐಪಿಎಲ್​ನಲ್ಲಿ ಕಳೆದ 9 ವರ್ಷಗಳಿಂದಲೂ ತನ್ನ ತವರು ರಾಜ್ಯವಾದ ದೆಹಲಿಯ ಡೆಲ್ಲಿ ಕ್ಯಾಪಿಟಲ್ಸ್​ ತಂಡವನ್ನೇ ಪ್ರತಿನಿಧಿಸುತ್ತ ಬಂದಿದ್ದವರು ರಿಷಭ್​ ಪಂತ್​. 2016ರ ಕಿರಿಯರ ವಿಶ್ವಕಪ್​ನಲ್ಲಿ ಮಿಂಚಿದ ಬೆನ್ನಲ್ಲೇ ಡೆಲ್ಲಿ ತಂಡದಲ್ಲಿ ಅವಕಾಶ ಪಡೆದಿದ್ದ ಪಂತ್​, ತಂಡದಲ್ಲಿ ಕೇವಲ ಕೀಪರ್​&ಬ್ಯಾಟರ್​ ಆಗಿರದೆ, 3 ಆವೃತ್ತಿಗಳಲ್ಲಿ ನಾಯಕರೂ ಆಗಿದ್ದರು. ಡೆಲ್ಲಿ ಪರ 111 ಪಂದ್ಯ ಆಡಿರುವ ಅವರು, ಈ ಪೈಕಿ 43ರಲ್ಲಿ ನಾಯಕತ್ವವನ್ನೂ ವಹಿಸಿದ್ದರು. ಹೀಗಿದ್ದರೂ ಈ ಬಾರಿ ನಿಯತ್ತು ಬದಲಾಯಿಸಿ ದಾಖಲೆಯ 27 ಕೋಟಿ ರೂ.ಗೆ ಲಖನೌ ಸೂಪರ್​ಜೈಂಟ್ಸ್​ ಸೇರಿ ನಾಯಕರೂ ಆಗಿದ್ದಾರೆ. ಅತ್ತ ಅವರ ಮಾಜಿ ಸಹ&ಆಟಗಾರ ಅರ್​ ಪಟೇಲ್​ ಡೆಲ್ಲಿ ಚುಕ್ಕಾಣಿ ಹಿಡಿದಿದ್ದು, ಈ ಸಲದ ಐಪಿಎಲ್​ನಲ್ಲಿ ಇವರಿಬ್ಬರ ಮುಖಾಮುಖಿ ಕುತೂಹಲ ಕೆರಳಿಸಿದೆ.

*ಇಶಾನ್​ ಕಿಶನ್​ (ಮುಂಬೈ ಟು ಸನ್​ರೈಸರ್ಸ್​)

2016ರಲ್ಲಿ ಗುಜರಾತ್​ ಲಯನ್ಸ್​ ಮೂಲಕ ಐಪಿಎಲ್​ಗೆ ಪದಾರ್ಪಣೆ ಮಾಡಿದ್ದರೂ ವಿಕೆಟ್​ ಕೀಪರ್​&ಬ್ಯಾಟರ್​ ಇಶಾನ್​ ಕಿಶನ್​ ಎಲ್ಲರ ಗಮನಸೆಳೆದಿದ್ದು ಮುಂಬೈ ಇಂಡಿಯನ್ಸ್​ ತಂಡದ ಮೂಲಕ. 3 ಬಾರಿ ಮುಂಬೈ ತಂಡದ ಟ್ರೋಫಿ ಗೆಲುವಿಗೂ ನೆರವಾಗಿದ್ದಾರೆ. 2022ರ ಮಿನಿ ಹರಾಜಿನಲ್ಲಿ ಆಗಿನ ದಾಖಲೆಯ 15.25 ಕೋಟಿ ರೂ.ಗೆ ಮುಂಬೈ ತಂಡಕ್ಕೆ ಮರಳಿದ್ದರು. ಆದರೆ ಈ ಬಾರಿಯ ಹರಾಜಿನಲ್ಲಿ ಅವರು 11.25 ಕೋಟಿ ರೂ.ಗೆ ಸನ್​ರೈಸರ್ಸ್​ ಪಾಲಾದರು. ಇದರಿಂದಾಗಿ, ಕಳೆದ 7 ವರ್ಷಗಳಲ್ಲಿ ಮುಂಬೈ ಪರ 89 ಪಂದ್ಯಗಳನ್ನು ಆಡಿರುವ ಕಿಶನ್​ ಈ ಬಾರಿ ನಿಷ್ಠೆ ಬದಲಾಯಿಸುವಂತಾಗಿದೆ. ಜತೆಗೆ ಕಿಶನ್​ ಮತ್ತು ಮುಂಬೈ ಸ್ಟಾರ್​ ವೇಗಿ ಜಸ್​ಪ್ರೀತ್​ ಬುಮ್ರಾ ಮುಖಾಮುಖಿಯೂ ರೋಚಕತೆ ಹೆಚ್ಚಿಸಲಿದೆ.

*ದೀಪಕ್​ ಚಹರ್​ (ಸಿಎಸ್​ಕೆ ಟು ಮುಂಬೈ)

ಕಳೆದ 7 ವರ್ಷಗಳಲ್ಲಿ ಸಿಎಸ್​ಕೆ ತಂಡದ 3 ಪ್ರಶಸ್ತಿ ಗೆಲುವಿನಲ್ಲಿ ಮಿಂಚಿದ್ದ ವೇಗಿ ದೀಪಕ್​ ಚಹರ್​, ಧೋನಿ ನಾಯಕತ್ವದ ಗರಡಿಯಲ್ಲಿ ಸಾಕಷ್ಟು ಪಳಗಿದ್ದರು ಮತ್ತು ಇದರಿಂದಾಗಿ ಟೀಮ್​ ಇಂಡಿಯಾ ಪರ ಆಡುವ ಅವಕಾಶವನ್ನೂ ಪಡೆದುಕೊಂಡಿದ್ದರು. 2022ರ ಮಿನಿ ಹರಾಜಿನಲ್ಲಿ 14 ಕೋಟಿ ರೂ.ಗೆ ಸಿಎಸ್​ಕೆ ತಂಡಕ್ಕೆ ಮರಳಿದ್ದರು. ಸಿಎಸ್​ಕೆ ಪರ 76 ಪಂದ್ಯಗಳಲ್ಲಿ ಅಷ್ಟೇ ವಿಕೆಟ್​ ಕಬಳಿಸಿರುವ ದೀಪಕ್​ ಚಹರ್​ ಈ ಸಲದ ಹರಾಜಿನಲ್ಲಿ 9.25 ಕೋಟಿ ರೂ.ಗೆ ಮುಂಬೈ ಇಂಡಿಯನ್ಸ್​ ಪಾಲಾಗಿದ್ದಾರೆ. ಅಲ್ಲಿ ಬುಮ್ರಾ, ಬೌಲ್ಟ್​ರಂಥ ವೇಗಿಗಳ ಜತೆಗೆ ಹೊಸ ಚೆಂಡು ಹಂಚಿಕೊಳ್ಳುವ ಅವಕಾಶವನ್ನೂ ಪಡೆಯಬಹುದು. ಈ ನಡುವೆ ಈ ಸಲದ ಐಪಿಎಲ್​ನಲ್ಲಿ ದೀಪಕ್​ ಚಹರ್​&ಧೋನಿ ಎದುರಾದರೆ ಅದರ ಮಜಾ ಕ್ರಿಕೆಟ್​ ಪ್ರೇಮಿಗಳದ್ದಾಗಲಿದೆ.

*ಮೊಹಮದ್​ ಸಿರಾಜ್​ (ಆರ್​ಸಿಬಿ ಟು ಗುಜರಾತ್​)

ಕಳೆದ 7 ವರ್ಷಗಳಿಂದ ಆರ್​ಸಿಬಿ ತಂಡದ ಪ್ರಮುಖ ಭಾಗವಾಗಿದ್ದವರು ವೇಗಿ ಮೊಹಮದ್​ ಸಿರಾಜ್​. ಸ್ಟಾರ್​ ಬ್ಯಾಟರ್​ ವಿರಾಟ್​ ಕೊಹ್ಲಿ ಜತೆಗಿನ ಅವರ ಆಪ್ತತೆಯೂ ಗಮನಸೆಳೆದಿತ್ತು ಮತ್ತು ಆರ್​ಸಿಬಿ ಅಭಿಮಾನಿಗಳಿಂದಲೂ ಅಪಾರ ಪ್ರೀತಿ ಸಂಪಾದಿಸಿದ್ದರು. 2018ರಿಂದ ಆರ್​ಸಿಬಿ ತಂಡದ ಪರ 87 ಪಂದ್ಯ ಆಡಿದ್ದ ಸಿರಾಜ್​, 83 ವಿಕೆಟ್​ ಕಬಳಿಸಿದ್ದರು. ಈ ಮೂಲಕ ಆರ್​ಸಿಬಿ ಪರ 3ನೇ ಗರಿಷ್ಠ ವಿಕೆಟ್​ ಕಬಳಿಸಿದ ಬೌಲರ್​ ಎನಿಸಿದ್ದರು. ಆದರೂ ಈ ಸಲ ಆರ್​ಸಿಬಿ ತಂಡದಲ್ಲಿ ರಿಟೇನ್​ ಆಗದ ಸಿರಾಜ್​, 12.25 ಕೋಟಿ ರೂ.ಗೆ ಗುಜರಾತ್​ ಟೈಟಾನ್ಸ್​ ಪಾಲಾಗಿದ್ದಾರೆ. ಹೀಗಾಗಿ ಈ ಸಲ ಮೈದಾನದಲ್ಲಿ ಸಿರಾಜ್​-ಕೊಹ್ಲಿ ನಡುವಿನ ಹಣಾಹಣಿ ಅತ್ಯಂತ ಕೌತುಕ ಮೂಡಿಸಿದೆ.

*ನಿತೀಶ್​ ರಾಣಾ (ಕೆಕೆಆರ್​ ಟು ರಾಜಸ್ಥಾನ)

ಕೋಲ್ಕತ ನೈಟ್​ರೈಡರ್ಸ್​ ತಂಡದ ಮಧ್ಯಮ ಕ್ರಮಾಂಕದ ಬ್ಯಾಟರ್​ ಆಗಿ ಗಮನಸೆಳೆದಿದ್ದ ನಿತೀಶ್​ ರಾಣಾ, 7 ಆವೃತ್ತಿಗಳಲ್ಲಿ ಕೆಕೆಆರ್​ ಪರ 90 ಪಂದ್ಯ ಆಡಿದ್ದಾರೆ ಮತ್ತು 2023ರ ಆವೃತ್ತಿಯಲ್ಲಿ ತಂಡದ ನಾಯಕರಾಗಿಯೂ ಕಾರ್ಯನಿರ್ವಹಿಸಿದ್ದರು. ಕಳೆದ ಆವೃತ್ತಿಯಲ್ಲಿ ತಂಡ ಪ್ರಶಸ್ತಿ ಗೆದ್ದಾಗ ಉಪನಾಯಕರೂ ಆಗಿದ್ದರು. ಇದರ ಹೊರತಾಗಿಯೂ ಈ ಸಲ ತಂಡದಲ್ಲಿ ರಿಟೇನ್​ ಆಗದ ನಿತೀಶ್​ ರಾಣಾ ಮೆಗಾ ಹರಾಜಿನಲ್ಲಿ 4.20 ಕೋಟಿ ರೂ.ಗೆ ರಾಜಸ್ಥಾನ ರಾಯಲ್ಸ್​ ಪಾಲಾಗಿದ್ದರು. ಹರಾಜಿನ ನಂತರ ನಿತೀಶ್​ ಪತ್ನಿ ಸಾಚಿ ಮರ್​ವ್ಹಾ 'ನಿಷ್ಠೆ ಅತ್ಯಂತ ದುಬಾರಿ' ಎಂಬ ಸಾಮಾಜಿಕ ಜಾಲತಾಣದ ಸಂದೇಶದ ಮೂಲಕ, ತನ್ನ ಪತಿಯನ್ನು ಉಳಿಸಿಕೊಳ್ಳಲು ಬಿಡ್​ ಮಾಡದ ಕೆಕೆಆರ್​ ವಿರುದ್ಧ ಆಕ್ರೋಶವನ್ನೂ ವ್ಯಕ್ತಪಡಿಸಿದ್ದರು. ಈ ಬಾರಿ ಐಪಿಎಲ್​ನಲ್ಲಿ ಕೆಕೆಆರ್​ ಪ್ರಮುಖ ಸ್ಪಿನ್ನರ್​ ಸುನೀಲ್​ ನಾರಾಯಣ್​ ಎಸೆತಗಳನ್ನು ನಿತೀಶ್​ ರಾಣಾ ಯಾವ ರೀತಿ ಎದುರಿಸುವರು ಎಂಬುದು ಕುತೂಹಲಕಾರಿ ಎನಿಸಿದೆ.

*ಭುವನೇಶ್ವರ್​ ಕುಮಾರ್​ (ಸನ್​ರೈಸರ್ಸ್​ ಟು ಆರ್​ಸಿಬಿ)

ಕಳೆದ 11 ವರ್ಷಗಳಿಂದ ಸನ್​ರೈಸರ್ಸ್​ ತಂಡದ ಭಾಗವಾಗಿದ್ದ ಅನುಭವಿ ವೇಗಿ ಭುವನೇಶ್ವರ್​ ಕುಮಾರ್​, ಅದರ ಪರ ಸರ್ವಾಧಿಕ 145 ಪಂದ್ಯಗಳನ್ನು ಆಡಿ ಗರಿಷ್ಠ 157 ವಿಕೆಟ್​ ಕಬಳಿಸಿದ ದಾಖಲೆಯನ್ನೂ ಹೊಂದಿದ್ದಾರೆ. 2016ರಲ್ಲಿ ಚಾಂಪಿಯನ್​ ಪಟ್ಟವೇರಿದ ತಂಡದ ಭಾಗವೂ ಆಗಿದ್ದರು. ಕಳೆದ ಆವೃತ್ತಿಯಲ್ಲಿ ಮತ್ತೊಮ್ಮೆ ಫೈನಲ್​ ಪ್ರವೇಶವನ್ನೂ ಕಂಡಿದ್ದರು. ಇದರ ಹೊರತಾಗಿಯೂ ಈ ಬಾರಿ ರಿಟೇನ್​ ಆಗದ ಭುವಿ, ಹರಾಜಿನಲ್ಲಿ 10.75 ಕೋಟಿ ರೂ.ಗೆ ಆರ್​ಸಿಬಿ ಪಾಲಾಗಿದ್ದಾರೆ. ಸ್ಫೋಟಕ ಬ್ಯಾಟರ್​ಗಳಿಂದ ಕೂಡಿರುವ ಸನ್​ರೈಸರ್ಸ್​ ಎದುರು ಈ ಬಾರಿ ಅವರ ಬೌಲಿಂಗ್​ ದಾಳಿ ಕುತೂಹಲ ಮೂಡಿಸಿದೆ.

https://www.vijayavani.net/https-www-vijayavani-net-another-honor-for-shubman-gill-on-the-heels-of-his-champions-trophy-win