ಏಷ್ಯನ್​ ಪ್ಯಾರಾ ಗೇಮ್ಸ್​ನಲ್ಲಿ ಸಾರ್ವಕಾಲಿಕ ಗರಿಷ್ಠ 82 ಪದಕ ಗೆದ್ದ ಭಾರತ

ಹಾಂಗ್​ರೆೌ: ಭಾರತದ ಪ್ಯಾರಾ ಕ್ರೀಡಾಪಟುಗಳು 4ನೇ ಆವೃತ್ತಿಯ ಏಷ್ಯನ್​ ಪ್ಯಾರಾ ಗೇಮ್ಸ್​ನಲ್ಲಿ ಸಾರ್ವಕಾಲಿಕ ಗರಿಷ್ಠ 82 ಪದಕ ಗೆಲುವಿನ ಹೊಸ ದಾಖಲೆ ಸೃಷ್ಟಿಸಿದ್ದಾರೆ. 2018ರ ಕಳೆದ ಆವೃತ್ತಿಯಲ್ಲಿ 72 ಪದಕ ಗೆದ್ದುಕೊಂಡಿದ್ದು ಭಾರತದ ಈ ಹಿಂದಿನ ಶ್ರೇಷ್ಠ ಸಾಧನೆಯಾಗಿತ್ತು. ಇನ್ನೂ 2 ದಿನಗಳ ಕ್ರೀಡಾಸ್ಪರ್ಧೆಗಳು ಬಾಕಿ ಉಳಿದಿರುವ ಕ್ರೀಡಾಕೂಟದಲ್ಲಿ ಭಾರತ ಈಗ ಪದಕಗಳ ಶತಕ ಸಾಧಿಸಿ ಏಷ್ಯನ್​ ಗೇಮ್ಸ್​ ಸಾಧನೆಯನ್ನು ಪುನರಾವರ್ತಿಸುವ ತವಕದಲ್ಲಿದೆ.

ಪದಕ ಸ್ಪರ್ಧೆಯ 4ನೇ ದಿನವಾದ ಗುರುವಾರ ಭಾರತದ ಅಂಗವಿಕಲ ಕ್ರೀಡಾಪಟುಗಳು ಒಟ್ಟು 18 ಪದಕಗಳನ್ನು ಗೆದ್ದುಕೊಂಡರು. ಈ ಪೈಕಿ 3 ಚಿನ್ನ, 3 ಬೆಳ್ಳಿ ಮತ್ತು 12 ಕಂಚಿನ ಪದಕಗಳು ಸೇರಿವೆ. ಭಾರತ ಇದುವರೆಗೆ ಗೆದ್ದಿರುವ ಒಟ್ಟು 82 ಪದಕಗಳಲ್ಲಿ 18 ಚಿನ್ನ, 23 ಬೆಳ್ಳಿ ಮತ್ತು 41 ಕಂಚಿನ ಪದಕಗಳಾಗಿವೆ. ಪದಕ ಪಟ್ಟಿಯಲ್ಲಿ ಭಾರತ ಸದ್ಯ 8ನೇ ಸ್ಥಾನದಲ್ಲಿದೆ.

ಪುರುಷರ ಶಾಟ್​ಪುಟ್​ ಎಫ್​​46 ವಿಭಾಗದಲ್ಲಿ ಸಚಿನ್​ ಸರ್ಜೆರಾವ್​ ಖಿಲಾರಿ 16.03 ಮೀ. ದೂರದ ಎಸೆತದೊಂದಿಗೆ ಕೂಟದಾಖಲೆ ನಿರ್ಮಿಸಿ ದಿನದ ಮೊದಲ ಚಿನ್ನ ಗೆದ್ದುಕೊಟ್ಟರು. ಪ್ಯಾರಾ ಶೂಟರ್​ ಸಿದ್ಧಾರ್ಥ ಬಾಬು ಆರ್​6 ಮಿಶ್ರ 50 ಮೀ. ರೈಫಲ್​ ಪ್ರೊನ್​ ಎಸ್​ಎಚ್​1 ವಿಭಾಗದಲ್ಲಿ 247.7 ಅಂಕ ಕಲೆಹಾಕಿ ಚಿನ್ನಕ್ಕೆ ಕೊರಳೊಡ್ಡಿದರು. ಆರ್ಚರಿ ಸ್ಪರ್ಧೆಯ ಮಿಶ್ರ ತಂಡ ಕಂಪೌಂಡ್​ ವಿಭಾಗದಲ್ಲಿ ಶೀತಲ್​ ದೇವಿ ಮತ್ತು ರಾಕೇಶ್​ ಕುಮಾರ್​ ಭಾರತಕ್ಕೆ ದಿನದ 3ನೇ ಚಿನ್ನ ತಂದುಕೊಟ್ಟರು.

ಅಥ್ಲೆಟಿಕ್ಸ್​ನಲ್ಲಿ ಪ್ರಾಬಲ್ಯ

ಭಾರತ ಅಥ್ಲೆಟಿಕ್ಸ್​ನಲ್ಲಿ ಪದಕ ಬೇಟೆ ಮುಂದುವರಿಸಿದ್ದು, ಗುರುವಾರ 1 ಚಿನ್ನ ಸಹಿತ 8 ಪದಕಗಳನ್ನು ಗೆದ್ದುಕೊಂಡಿತು. ಇದುವರೆಗೆ ಒಟ್ಟು 82ರಲ್ಲಿ 45 ಪದಕ ಮತ್ತು 18ರಲ್ಲಿ 14 ಚಿನ್ನ ಅಥ್ಲೆಟಿಕ್ಸ್​ನಲ್ಲೇ ಒಲಿದಿವೆ. ಮಹಿಳೆಯರ 100 ಮೀ. ಓಟದ ಟಿ12 ವಿಭಾಗದಲ್ಲಿ ಸಿಮ್ರನ್​ ಮತ್ತು ಶಾಟ್​ಪುಟ್​ ಸ್ಪರ್ಧೆಯ ಎಫ್​34 ವಿಭಾಗದಲ್ಲಿ ಭಾಗ್ಯಶ್ರೀ ಮಾಧವರಾವ್​ ಜಾಧವ್​ ಬೆಳ್ಳಿ ಪದಕ ಗೆದ್ದುಕೊಂಡರು. ಪುರುಷರ ಡಿಸ್ಕಸ್​ ಥ್ರೋ ಎಫ್​11 ವಿಭಾಗದಲ್ಲಿ ಮೋನು ಂಗಾಸ್​ ಕೂಡ ಬೆಳ್ಳಿ ಜಯಿಸಿದರು.

ಬಂಗಾರದ ಸನಿಹ ಕನ್ನಡಿಗ ಸುಹಾಸ್​

ಉತ್ತರ ಪ್ರದೇಶದಲ್ಲಿ ಜಿಲ್ಲಾಧಿಕಾರಿ ಆಗಿರುವ ಕನ್ನಡಿಗ ಸುಹಾಸ್​ ಯತಿರಾಜ್​ ಪ್ಯಾರಾ ಬ್ಯಾಡ್ಮಿಂಟನ್​ ಸ್ಪರ್ಧೆಯ ಎಸ್​ಎಲ್​4 ವಿಭಾಗದಲ್ಲಿ ಫೈನಲ್​ಗೇರಿದ್ದು, ಶುಕ್ರವಾರ ಚಿನ್ನದ ಪದಕಕ್ಕೆ ಹೋರಾಡಲಿದ್ದಾರೆ. ಶಿವಮೊಗ್ಗ ಮೂಲದ ಸುಹಾಸ್​ ಗುರುವಾರ ನಡೆದ ಸೆಮಿಫೈನಲ್​ನಲ್ಲಿ ಇಂಡೋನೇಷ್ಯಾದ ಫ್ರೆಡಿ ಸೆಟಿಯವಾನ್​ ಎದುರು 21-12, 21-19ರಿಂದ ಗೆದ್ದರು. ಫೈನಲ್​ನಲ್ಲಿ ಮಲೇಷ್ಯಾದ ಮೊಹಮದ್​ ಅಮಿನ್​ ಎದುರು ಸೆಣಸಲಿದ್ದಾರೆ. ಇನ್ನುಳಿದಂತೆ ಭಾರತಕ್ಕೆ ಶುಕ್ರವಾರ ಬ್ಯಾಡ್ಮಿಂಟನ್​ನಲ್ಲೇ ಒಟ್ಟು 6 ಕಂಚಿನ ಪದಕಗಳು ಒಲಿದವು.

https://www.vijayavani.net/mysore-will-be-a-memory-i-cherish-forever-a-city-rich-in-history