ಭಾರತ-ಆಸೀಸ್ ನಡುವಿನ ಟೆಸ್ಟ್ ಸರಣಿಯ ಕೊನೇ ಎರಡೂ ಪಂದ್ಯಗಳು ಸಿಡ್ನಿ ಕ್ರಿಕೆಟ್ ಮೈದಾನದಲ್ಲಿ (ಎಸ್ಸಿಜಿ) ನಡೆಯುವ ಸಾಧ್ಯತೆ ಇದೆ. ಹಾಲಿ ವೇಳಾಪಟ್ಟಿಯ ಪ್ರಕಾರ 3ನೇ ಟೆಸ್ಟ್ ಸಿಡ್ನಿಯಲ್ಲಿ ನಡೆದರೆ, 4ನೇ ಹಾಗೂ ಅಂತಿಮ ಟೆಸ್ಟ್ ಬ್ರಿಸ್ಬೇನ್ನಲ್ಲಿ ನಡೆಯಬೇಕಾಗಿದೆ. ಆದರೆ ಸದ್ಯ ಸಿಡ್ನಿಯಲ್ಲಿ (ನ್ಯೂ ಸೌತ್ ವೇಲ್ಸ್) ಕರೊನಾ ಪ್ರಕರಣಗಳ ಏರಿಕೆಯಾಗಿರುವುದರಿಂದ ತಂಡಗಳು ಇಲ್ಲಿ ಆಡಿ ಬ್ರಿಸ್ಬೇನ್ಗೆ ಹೊರಟಾಗ ಅಲ್ಲಿನ ಕ್ವೀನ್ಸ್ಲ್ಯಾಂಡ್ ಸರ್ಕಾರ ಕ್ವಾರಂಟೈನ್ನಿಂದ ವಿನಾಯಿತಿ ನೀಡಲು ನಿರಾಕರಿಸಿದರೆ, ಜನವರಿ 15ರಿಂದ ಅಂತಿಮ ಟೆಸ್ಟ್ ನಡೆಸುವುದು ಅಸಾಧ್ಯವಾಗುತ್ತದೆ. ಅಲ್ಲದೆ ಒಂದು ವೇಳೆ ಕ್ವೀನ್ಸ್ಲ್ಯಾಂಡ್ ಸರ್ಕಾರ, ನ್ಯೂ ಸೌತ್ ವೇಲ್ಸ್ನ ಗಡಿಯನ್ನು ಬಂದ್ ಮಾಡಿದರೆ ಆಗಲೂ ತಂಡಗಳಿಗೆ ಸಿಡ್ನಿಯಿಂದ ಬ್ರಿಸ್ಬೇನ್ಗೆ ಪ್ರಯಾಣಿಸುವುದು ಅಸಾಧ್ಯವಾಗುತ್ತದೆ. ಈ ಸಮಸ್ಯೆಯಿಂದ ಪಾರಾಗಲೂ ಕೊನೇ ಎರಡೂ ಟೆಸ್ಟ್ಗಳನ್ನು ತಾನೇ ಆಯೋಜಿಸಲು ಸಿದ್ಧವಿರುವುದಾಗಿ ಎಸ್ಸಿಜಿ ತಿಳಿಸಿದೆ. ಜನವರಿ 7ರಿಂದ ನಡೆಯುವ ನ್ಯೂ ಇಯರ್ ಟೆಸ್ಟ್ನ ಆತಿಥ್ಯ ಉಳಿಸಿಕೊಳ್ಳುವುದಕ್ಕಾಗಿ ಎಸ್ಸಿಜಿ ಈ ಆರ್ ಇಟ್ಟಿದೆ. ಇದಲ್ಲದೆ ಕರೊನಾ ಭೀತಿಯಿಂದಾಗಿ ಸಿಡ್ನಿಯಲ್ಲಿ ಪಂದ್ಯ ನಡೆಸುವುದು ಕಷ್ಟವಾದರೆ, ಆಗ 3ನೇ ಪಂದ್ಯವನ್ನೂ ತಾನೇ ಆಯೋಜಿಸುವುದಾಗಿ ಮೆಲ್ಬೋರ್ನ್ ಕ್ರಿಕೆಟ್ ಗ್ರೌಂಡ್ (ಎಂಸಿಜಿ) ಕೂಡ ಈಗಾಗಲೆ ಆರ್ ನೀಡಿದೆ.
