ಆಸೀಸ್​ನಲ್ಲಿ ಚೆಂಡು ವಿರೂಪ ವಿವಾದದ ನಡುವೆ ಸೋಲು ಕಂಡ ಭಾರತ ಎ ತಂಡ!

ಮೆಕಾಯ್​: ಭಾರತ ಟೆಸ್ಟ್​ ತಂಡ ತವರಿನಲ್ಲೇ ವೈಟ್​ವಾಷ್​ ಎದುರಿಸಿರುವ ನಡುವೆ ಅತ್ತ ಬಾರ್ಡರ್​&ಗಾವಸ್ಕರ್​ ಟ್ರೋಫಿಗೆ ಪೂರ್ವಭಾವಿಯಾಗಿ ಆಸ್ಟ್ರೆಲಿಯಾ ಪ್ರವಾಸ ಕೈಗೊಂಡಿರುವ ಭಾರತ ಎ ತಂಡವೂ ಮುಗ್ಗರಿಸಿದೆ. ನಾಯಕ ನಾಥನ್​ ಮೆಕ್​ಸ್ವೀನಿ (88*) ಮತ್ತು ಬೆವು ವೆಬ್​ಸ್ಟರ್​ (61*) ದಿಟ್ಟ ಜತೆಯಾಟದ ಎದುರು ಮಂಕಾದ ಭಾರತ ಎ ತಂಡ ಮೊದಲ ಚತುರ್ದಿನ ಪಂದ್ಯದಲ್ಲಿ ಆಸ್ಟ್ರೆಲಿಯಾ ಎ ಎದುರು 7 ವಿಕೆಟ್​ಗಳಿಂದ ಪರಾಭವಗೊಂಡಿದೆ. ಇದರಿಂದ 2 ಪಂದ್ಯಗಳ ಸರಣಿಯಲ್ಲಿ ಋತುರಾಜ್​ ಗಾಯಕ್ವಾಡ್​ ಪಡೆ 0-1 ಹಿನ್ನಡೆ ಅನುಭವಿಸಿದೆ. ಸರಣಿಯ 2ನೇ ಪಂದ್ಯ ಗುರುವಾರದಿಂದ ಮೆಲ್ಬೋರ್ನ್​ನಲ್ಲಿ ನಡೆಯಲಿದೆ.

ಪಂದ್ಯದ 3ನೇ ದಿನದಾಟದಲ್ಲಿ ಭಾರತ ಎ ತಂಡ 312 ರನ್​ಗಳಿಗೆ ಸರ್ವಪತನ ಕಂಡಿತು. ಸಾಯಿ ಸುದರ್ಶನ್​ (103) ಶತಕ ಸಿಡಿಸಿದರೆ, ಕನ್ನಡಿಗ ದೇವದತ್​ ಪಡಿಕ್ಕಲ್​ (88) ಶತಕ ತಪ್ಪಿಸಿಕೊಂಡರು. 225 ರನ್​ ಗುರಿ ಪಡೆದ ಆಸೀಸ್​, 3ನೇ ದಿನದಂತ್ಯಕ್ಕೆ 3 ವಿಕೆಟ್​ಗೆ 139 ರನ್​ ಗಳಿಸಿತು. ಕೊನೇ ದಿನ ಗೆಲುವಿಗೆ ಮತ್ತೆ 86 ರನ್​ ಗಳಿಸಬೇಕಾಗಿದ್ದ ಆಸೀಸ್​ ಎ, 3 ವಿಕೆಟ್​ಗೆ 226 ರನ್​ ಗಳಿಸಿ ಜಯ ಸಾಧಿಸಿತು. ಭಾರತ ಕೊನೇ ದಿನ ಒಂದೂ ವಿಕೆಟ್​ ಗಳಿಸಲು ಶಕ್ತವಾಗಲಿಲ್ಲ.

ಭಾರತ ಎ: 107 ಮತ್ತು 312 (ಸಾಯಿ ಸುದರ್ಶನ್​ 103, ಪಡಿಕ್ಕಲ್​ 88, ಕಿಶನ್​ 32, ನಿತೀಶ್​ 17, ನವದೀಪ್​ ಸೈನಿ 18*, ಓನೀಲ್​ 55ಕ್ಕೆ 4, ಮರ್ಫಿ 77ಕ್ಕೆ 3), ಆಸ್ಟ್ರೆಲಿಯಾ ಎ: 195 ಮತ್ತು 75 ಓವರ್​ಗಳಲ್ಲಿ 3 ವಿಕೆಟ್​ಗೆ 226 (ಹ್ಯಾರಿಸ್​ 36, ಮೆಕ್​ಸ್ವೀನಿ 88*, ವೆಬ್​ಸ್ಟರ್​ 61*, ಮುಕೇಶ್​ 51ಕ್ಕೆ 1, ಪ್ರಸಿದ್ಧ ಕೃಷ್ಣ 27ಕ್ಕೆ 1).

ಚೆಂಡು ವಿರೂಪ ವಿವಾದ

ಅಂತಿಮ ದಿನದಾಟ ಆರಂಭಕ್ಕೆ ಮುನ್ನ ಅಂಪೈರ್​ಗಳು ಚೆಂಡು ಬದಲಾಯಿಸಿದರು. ಆಗ ಕೆಲ ಭಾರತೀಯ ಆಟಗಾರರು ಆಕ್ಷೇಪ ಎತ್ತಿದರು. ಆದರೆ ಚೆಂಡಿನ ಮೇಲೆ ಕೆಲ ಪರಚಿದ ಕಲೆಗಳಿವೆ ಎಂದು ಅಂಪೈರ್​ ಶಾನ್​ ಕ್ರೇಗ್​ ಚೆಂಡು ಬದಲಾವಣೆಯನ್ನು ಸಮರ್ಥಿಸಿಕೊಂಡರು. ಈ ಬಗ್ಗೆ ವಿಕೆಟ್​ ಕೀಪರ್​ ಇಶಾನ್​ ಕಿಶನ್​ ತೀವ್ರ ವಾಗ್ವಾದ ನಡೆಸಿದಾಗ ಅಂಪೈರ್​ ಕ್ರೇಗ್​ ಶಿಸ್ತು ಕ್ರಮ ತೆಗೆದುಕೊಳ್ಳುವ ಎಚ್ಚರಿಕೆ ನೀಡಿದರು. ನಂತರದಲ್ಲಿ ಕ್ರಿಕೆಟ್​ ಆಸ್ಟ್ರೆಲಿಯಾ ಪ್ರಕಟಣೆಯೊಂದನ್ನು ನೀಡಿ, ಚೆಂಡಿನ ಸ್ಥಿತಿ ಕೆಟ್ಟಿದ್ದರಿಂದ ಅದನ್ನು ಬದಲಾವಣೆ ಮಾಡಲಾಯಿತು ಮತ್ತು ಕಿಶನ್​ ವಿರುದ್ಧ ಯಾವುದೇ ಕ್ರಮ ತೆಗೆದುಕೊಳ್ಳುವುದಿಲ್ಲ ಎಂದು ಸ್ಪಷ್ಟಪಡಿಸಿತು. ಆದರೆ ಚೆಂಡು ವಿರೂಪಗೊಂಡಿದ್ದಕ್ಕೆ, ನಿಯಮಾವಳಿ ಪ್ರಕಾರ ಭಾರತ ಎ ತಂಡಕ್ಕೆ ಪೆನಾಲ್ಟಿಯನ್ನೂ ವಿಧಿಸದೆ ಇದ್ದುದು ಗೊಂದಲಕ್ಕೆ ಕಾರಣವಾಯಿತು.

https://www.vijayavani.net/anish-sarkar-the-three-year-old-from-kolkata-is-now-a-fide-rated-chess-player