ಇಂದು ಸೂಪರ್​ಕಿಂಗ್ಸ್​ಗೆ ಸನ್​ರೈಸರ್ಸ್​ ಸವಾಲು; ಚೆಪಾಕ್​ನಲ್ಲಿ ಗೆಲುವಿನ ಹಳಿ ಏರಲು ಪೈಪೋಟಿ

ಚೆನ್ನೈ: ತವರಿನಲ್ಲಿ ಆಡಿದ ಆರಂಭಿಕ 3 ಪಂದ್ಯಗಳಲ್ಲಿ ಗೆದ್ದಿದ್ದ ಚೆನ್ನೈ ಸೂಪರ್​ಕಿಂಗ್ಸ್​ ಕಳೆದ ಪಂದ್ಯದಲ್ಲಿ ಲಖನೌ ಎದುರು ಸೋತಿದ್ದರೆ, ಸನ್​ರೈಸರ್ಸ್​ ಹೈದರಾಬಾದ್​ ತಂಡವೂ ತವರಿನ ಆರಂಭಿಕ 2 ಪಂದ್ಯಗಳಲ್ಲಿ ಗೆದ್ದ ಬಳಿಕ ಕಳೆದ ಪಂದ್ಯದಲ್ಲಿ ಆರ್​ಸಿಬಿ ಎದುರು ಸೋಲುಂಡಿದೆ. ತವರಿನ ಪ್ರಾಬಲ್ಯ ಬಿಟ್ಟುಕೊಟ್ಟು ಮುಗ್ಗರಿಸಿರುವ ಉಭಯ ತಂಡಗಳು ಐಪಿಎಲ್​-17ರಲ್ಲಿ ಭಾನುವಾರದ 2ನೇ ಪಂದ್ಯದಲ್ಲಿ ಮುಖಾಮುಖಿ ಆಗಲಿವೆ. ಹಾಲಿ ಚಾಂಪಿಯನ್​ ಚೆನ್ನೆ$ ಸೂಪರ್​ಕಿಂಗ್ಸ್​ ತವರಿನ ಪ್ರಾಬಲ್ಯವನ್ನು ಮರುಸ್ಥಾಪಿಸುವತ್ತ ಗಮನಹರಿಸಿದೆ.

ಸಿಎಸ್​ಕೆ ತಂಡ ಲಖನೌ ಎದುರು ಸತತ 2 ಪಂದ್ಯದಲ್ಲಿ ಸೋಲು ಅನುಭವಿಸಿದ ಹಿನ್ನಡೆ ಹೊಂದಿದ್ದು, ಅಂಕಪಟ್ಟಿಯಲ್ಲಿ ಪ್ರಗತಿ ಕಾಣಲು ಗೆಲುವಿನ ಅನಿವಾರ್ಯತೆ ಹೊಂದಿದೆ. ಸಿಎಸ್​ಕೆ ಇದುವರೆಗೆ ಆಡಿರುವ 8 ಪಂದ್ಯಗಳಲ್ಲಿ 4 ಜಯ, 4 ಸೋಲಿನ ಮಿಶ್ರ ಫಲ ಎದುರಿಸಿದ್ದರೆ, ಸನ್​ರೈಸರ್ಸ್​ ತಂಡ ಇಷ್ಟೇ ಪಂದ್ಯಗಳಲ್ಲಿ 5 ಜಯ ಮತ್ತು 3 ಸೋಲು ಅನುಭವಿಸಿದೆ. ಸತತ 4 ಗೆಲುವಿನ ಬಳಿಕ ಸನ್​ರೈಸರ್ಸ್​ ಕಳೆದ ಪಂದ್ಯದಲ್ಲಿ ಆರ್​ಸಿಬಿ ಎದುರು ಚೇಸಿಂಗ್​ ವೇಳೆ ಲಯ ತಪ್ಪಿ ಪವರ್​ಪ್ಲೇನಲ್ಲೇ ಸೋಲಿನ ಸುಳಿಯಲ್ಲಿ ಸಿಲುಕಿತ್ತು.

ಚೆಪಾಕ್​ ಮೈದಾನದಲ್ಲಿ ಕಳೆದ ಕೆಲ ಪಂದ್ಯಗಳಿಂದ 2ನೇ ಸರದಿಯಲ್ಲಿ ಇಬ್ಬನಿ ಸಮಸ್ಯೆ ಕಾಡುತ್ತಿದೆ. ಹೀಗಾಗಿ ಚೇಸಿಂಗ್​ ಸುಲಭವೆನಿಸುತ್ತಿದೆ. ಆದರೆ ಸನ್​ರೈಸರ್ಸ್​ಗೆ ಮೊದಲ ಬ್ಯಾಟಿಂಗ್​ ಮಾಡಿ ಮೊತ್ತ ರಸಿಕೊಳ್ಳುವುದರಲ್ಲೇ ಹೆಚ್ಚಿನ ಗೆಲುವು ಲಭಿಸಿದೆ. ಹೀಗಾಗಿ ಟಾಸ್​ ಯಾವ ಪಾತ್ರ ವಹಿಸಲಿದೆ ಎಂಬುದನ್ನು ಕಾದು ನೋಡಬೇಕಿದೆ.

ಸಿಎಸ್​ಕೆಗೆ ಬ್ಯಾಟಿಂಗ್​ ಕಳವಳ

ಬ್ಯಾಟಿಂಗ್​ ವಿಭಾಗದ ಅಸ್ಥಿರ ನಿರ್ವಹಣೆ ಸಿಎಸ್​ಕೆ ತಂಡಕ್ಕೆ ಕಳವಳ ತಂದಿದೆ. ಕಳೆದ ಪಂದ್ಯದಲ್ಲಿ ನಾಯಕ ಋತುರಾಜ್​ ಗಾಯಕ್ವಾಡ್​ ಶತಕ ಸಿಡಿಸಿದರೂ ಗೆಲ್ಲಲಾಗಿರಲಿಲ್ಲ. ಋತುರಾಜ್​ ಜತೆಗೆ ಶಿವಂ ದುಬೆ ಹೊರತಾಗಿ ಇತರ ಬ್ಯಾಟರ್​ಗಳು ಕೈಕೊಡುತ್ತಿದ್ದಾರೆ. ಅದರಲ್ಲೂ ಪ್ರಮುಖವಾಗಿ ಕಿವೀಸ್​ ಬ್ಯಾಟರ್​ಗಳಾದ ರಚಿನ್​ ರವೀಂದ್ರ ಮತ್ತು ಡೆರಿಲ್​ ಮಿಚೆಲ್​ ವೈಫಲ್ಯದಿಂದಾಗಿ ಸಿಎಸ್​ಕೆ ತಂಡ ಬ್ಯಾಟಿಂಗ್​ ಕ್ರಮಾಂಕದಲ್ಲೂ ಪದೇಪದೆ ಬದಲಾವಣೆ ಮಾಡುವಂತಾಗಿದೆ. ಇನ್ನು ಲಖನೌ ಎದುರು ಚೆಪಾಕ್​ನಲ್ಲಿ 212 ರನ್​ ರಸಿಕೊಳ್ಳಲಾಗದೆ ಸೋತಿದ್ದು ಬೌಲಿಂಗ್​ ವಿಭಾಗದಲ್ಲೂ ಸಮಸ್ಯೆ ಸೃಷ್ಟಿಸಿದೆ. ತಂಡದ ಪ್ರಮುಖ ಅಸ್ತ್ರಗಳಾದ ಮಥೀಶ ಪಥಿರಣ&ಮುಸ್ತಾಫಿಜುರ್​ ಕೂಡ ಸ್ಲಾಗ್​ ಓವರ್​ಗಳಲ್ಲಿ ದಂಡನೆಗೆ ಒಳಗಾಗಿದ್ದು, ದೊಡ್ಡ ಹಿನ್ನಡೆ ಎನಿಸಿದೆ. ರವೀಂದ್ರ ಜಡೇಜಾ ಬೌಲಿಂಗ್​ ಟೂರ್ನಿಯುದ್ದಕ್ಕೂ ಪರಿಣಾಮಕಾರಿ ಎನಿಸಿಲ್ಲ.

ಸನ್​ರೈಸರ್ಸ್​ಗೆ ಬ್ಯಾಟಿಂಗ್​ ಬಲ

ಆರ್​ಸಿಬಿ ವಿರುದ್ಧದ ಪಂದ್ಯದಲ್ಲಿ 207 ರನ್​ ಸವಾಲು ಬೆನ್ನಟ್ಟಲಾಗದೆ ಸೋತಿದ್ದರೂ, ಸನ್​ರೈಸರ್ಸ್​ಗೆ ಈಗಲೂ ಬ್ಯಾಟಿಂಗ್​ ವಿಭಾಗವೇ ಪ್ರಮುಖ ಬಲ ಎನಿಸಿದೆ. ಪವರ್​ಪ್ಲೇನಲ್ಲಿ ಟ್ರಾವಿಸ್​ ಹೆಡ್​-ಅಭಿಷೇಕ್​ ಶರ್ಮ ಗರ್ಜಿಸಿದರೆ ಸನ್​ರೈಸರ್ಸ್​ ಅರ್ಧ ಪಂದ್ಯವನ್ನೇ ಗೆದ್ದಂತೆ ಆಗುತ್ತಿದೆ. ಮಧ್ಯಮ ಕ್ರಮಾಂಕದಲ್ಲಿ ಹೆನ್ರಿಕ್​ ಕ್ಲಾಸೆನ್​, ನಿತೀಶ್​ ರೆಡ್ಡಿ, ಅಬ್ದುಲ್​ ಸಮದ್​ ಬಿರುಸಿನಾಟ ಆಡುತ್ತಿದ್ದರೆ, ಏಡನ್​ ಮಾರ್ಕ್ರಮ್​ ಮಾತ್ರ ಕಳೆದೆರಡು ಪಂದ್ಯಗಳಿಂದ ವೈಫಲ್ಯ ಕಾಣುತ್ತಿದ್ದಾರೆ. ಬೌಲಿಂಗ್​ ವಿಭಾಗದಲ್ಲಿ ಭುವನೇಶ್ವರ್​ ದುಬಾರಿಯಾಗುತ್ತಿದ್ದು, ಕಳೆದ 3 ಪಂದ್ಯಗಳಲ್ಲಿ ಕೇವಲ 1 ವಿಕೆಟ್​ ಕಬಳಿಸಿದ್ದಾರೆ. ವೇಗಿಗಳಾದ ಉಮ್ರಾನ್​ ಮಲಿಕ್​, ಜಲ್ಲಾಕ್​ ಫಾರೂಖಿ, ಆಕಾಶ್​ ಸಿಂಗ್​ ಅವಕಾಶದ ನಿರೀಕ್ಷೆಯಲ್ಲಿದ್ದಾರೆ.

ಮುಖಾಮುಖಿ: 20

ಸಿಎಸ್​ಕೆ: 14

ಎಸ್​ಆರ್​ಎಚ್​: 6

ಆರಂಭ: ರಾತ್ರಿ 7.30

ನೇರಪ್ರಸಾರ: ಸ್ಟಾರ್​ ಸ್ಪೋರ್ಟ್ಸ್​, ಜಿಯೋಸಿನಿಮಾ.

https://www.vijayavani.net/indian-medal-tally-swells-to-15-at-asian-u-20-athletics-meet