ನಾವು ನಿಮಗೆ ಸಂಜು ಸ್ಯಾಮ್ಸನ್​ ಕೊಟ್ಟರೆ ಆ ಇಬ್ಬರನ್ನು ನಮಗೆ ಕೊಡಿ: CSKಗೆ RR ಬೇಡಿಕೆ! Sanju Samson

Sanju Samson : ಐಪಿಎಲ್ (2026) 19ನೇ ಆವೃತ್ತಿ ಆರಂಭವಾಗುವ ಮೊದಲೇ ಬ್ಯಾಟ್ಸ್​ಮನ್​ ಹಾಗೂ ವಿಕೆಟ್​ ಕೀಪರ್​ ಸಂಜು ಸ್ಯಾಮ್ಸನ್ ರಾಜಸ್ಥಾನ ರಾಯಲ್ಸ್ ತಂಡವನ್ನು ತೊರೆಯಲು ಯೋಜಿಸುತ್ತಿದ್ದಾರೆ ಎಂಬ ವದಂತಿಗಳು ಸಾಮಾಜಿಕ ಜಾಲತಾಣದಲ್ಲಿ ಕೆಲವು ದಿನಗಳಿಂದ ಹರಿದಾಡುತ್ತಿವೆ. ಇತ್ತೀಚಿನ ಬೆಳವಣಿಗೆಗಳನ್ನು ಸೂಕ್ಷ್ಮವಾಗಿ ನೋಡಿ ಆ ವದಂತಿಗಳು ನಿಜ ಎಂದು ಸೂಚಿಸುತ್ತಿವೆ.

ಯಾವುದೇ ಐಪಿಎಲ್​ ಫ್ರಾಂಚೈಸಿ ಸಂಜು ಅವರನ್ನು ಟ್ರೇಡ್​ ವಿಂಡೋ ಮೂಲಕ ಖರೀದಿ ಮಾಡಲು ಬಯಸಿದರೆ, ಅವರಿಗೆ ಪ್ರತಿಯಾಗಿ ಇಬ್ಬರು ಆಟಗಾರರನ್ನು ಮತ್ತು ಹಣವನ್ನು ನೀಡಬೇಕು ಎಂದು ರಾಜಸ್ಥಾನ ರಾಯಲ್ಸ್ ಆಡಳಿತ ಮಂಡಳಿ ಒತ್ತಾಯಿಸಿದೆ ಎಂದು ತಿಳಿದುಬಂದಿದೆ.

ಅಂದಹಾಗೆ, ಆರ್​ಆರ್​ ಆಡಳಿತ ಮಂಡಳಿ ಸಂಜು ಅವರನ್ನು ಕೈಬಿಡಲು ನಿರ್ಧರಿಸಿದೆ ಎನ್ನಲಾಗಿದೆ. ವಾಸ್ತವವಾಗಿ, ಸಂಜು ಅವರ ಮೇಲೆ ಅಪಾರ ಆಸಕ್ತಿ ತೋರಿಸುತ್ತಿರುವ ಚೆನ್ನೈ ಸೂಪರ್​ ಕಿಂಗ್ಸ್​ ತಂಡಕ್ಕೆ ಆರ್​ಆರ್​ ತಂಡ ಒಂದು ಒಪ್ಪಂದವನ್ನು ಮುಂದಿಟ್ಟಿದೆ. ಅದೇನೆಂದರೆ, ಸಂಜು ಅವರನ್ನು ನೀಡಿದರೆ, ಅದಕ್ಕೆ ಬದಲಿಯಾಗಿ ಒಬ್ಬ ವಿದೇಶಿ ಆಟಗಾರ ಮತ್ತು ಒಬ್ಬ ದೇಶೀಯ ಆಟಗಾರನನ್ನು ನೀಡಬೇಕು ಎಂದು ಆರ್​ಆರ್ ಒತ್ತಾಯಿಸಿದೆ ಎಂದು ಮೂಲಗಳು ತಿಳಿಸಿವೆ. ಅಲ್ಲದೆ, ಸಿಎಸ್‌ಕೆ ಈ ಒಪ್ಪಂದಕ್ಕೆ ಒಪ್ಪಿದೆ ಅಂತಾನೂ ಹೇಳಲಾಗುತ್ತಿದೆ. ಆದಾಗ್ಯೂ, ಫ್ರಾಂಚೈಸಿಯ ಅಂತಿಮ ನಿರ್ಧಾರವು ಆರ್​ಆರ್​ ಮಾಲೀಕರು ಯಾರನ್ನು ಬಯಸುತ್ತಾರೆ ಎಂಬುದರ ಮೇಲೆ ಅವಲಂಬಿತವಾಗಿರುತ್ತದೆ.

ಇನ್ನು ಈ ಪ್ರಕ್ರಿಯೆ ಪೂರ್ಣಗೊಳ್ಳಲು ಬಹಳ ಸಮಯ ತೆಗೆದುಕೊಳ್ಳುವ ಸಾಧ್ಯತೆಯಿದೆ. ಅಂದಹಾಗೆ, ಸಂಜು ಅವರು ರಾಜಸ್ಥಾನ ರಾಯಲ್ಸ್ ಜೊತೆ 2027ರ ಸೀಸನ್ ವರೆಗೆ ಒಪ್ಪಂದ ಮಾಡಿಕೊಂಡಿದ್ದಾರೆ. ಅವರಾಗೇ ಬಿಡುಗಡೆ ಮಾಡದ ಹೊರತು ಸಂಜು ಅವರು ಸ್ವಯಂ ಪ್ರೇರಿತವಾಗಿ ಬೇರೆ ಫ್ರಾಂಚೈಸ್‌ಗೆ ಹೋಗಲು ಸಾಧ್ಯವಿಲ್ಲ. ವಾಸ್ತವವಾಗಿ, ಸಂಜು, ಮ್ಯಾನೇಜ್‌ಮೆಂಟ್‌ನೊಂದಿಗೆ ಹಲವು ಸಂಪರ್ಕಗಳನ್ನು ಹೊಂದಿದ್ದಾರೆ. ನಾಯಕ ಕೂಡ ಹೌದು. ಇದಲ್ಲದೆ, ಕೋಚ್ ರಾಹುಲ್​ ದ್ರಾವಿಡ್ ಅವರ ನೆಚ್ಚಿನ ಶಿಷ್ಯ. ಅವರ ನಡುವೆ ಯಾವ ವಿಷಯದ ಬಗ್ಗೆ ಭಿನ್ನಾಭಿಪ್ರಾಯಗಳು ಹುಟ್ಟಿಕೊಂಡವು ಎಂಬುದು ತಿಳಿದಿಲ್ಲ.

ಆದರೆ, 2025ರ ಐಪಿಎಲ್ ಋತುವಿನ ಮಧ್ಯದಲ್ಲಿ, ಸ್ಯಾಮ್ಸನ್ ಅವರು ಮುಖ್ಯ ಕೋಚ್ ರಾಹುಲ್ ದ್ರಾವಿಡ್ ಮತ್ತು ತಂಡದ ನಿರ್ವಹಣೆಯೊಂದಿಗೆ ಭಿನ್ನಾಭಿಪ್ರಾಯ ಹೊಂದಿದ್ದರು ಎಂದು ವರದಿಗಳು ಬಂದವು. ಜೋಸ್ ಬಟ್ಲರ್ ಅವರಂತಹ ಪ್ರಮುಖ ಆಟಗಾರನನ್ನು ಸೀಸನ್​ಗೂ ಮುಂಚಿತವಾಗಿ ಬಿಡುಗಡೆ ಮಾಡಿದ್ದು ಮತ್ತು ಗಾಯದಿಂದ ಚೇತರಿಸಿಕೊಂಡ ನಂತರವೂ ಕೆಲವು ಪಂದ್ಯಗಳಲ್ಲಿ ರಿಯಾನ್ ಪರಾಗ್ ಅವರ ನಾಯಕತ್ವವನ್ನು ಮುಂದುವರಿಸಿದ್ದು ಸ್ಯಾಮ್ಸನ್​ಗೆ ಇಷ್ಟವಾಗಲಿಲ್ಲ. ಇದರಿಂದ ಅವರ ಅಸಮಾಧಾನಗೊಂಡಿದ್ದರು. ಹೀಗಾಗಿ ತಂಡವನ್ನು ತೊರೆಯಲು ಬಯಸಿದ್ದಾರೆ ಎಂಬ ಮಾತುಗಳು ಕೇಳಿಬಂದಿವೆ.

ಕಳೆದ ಐಪಿಎಲ್ ಸೀಸನ್ ಮುಗಿದ ನಂತರ, ಸಿಎಸ್‌ಕೆ ಸಿಇಒ ಮತ್ತು ಫ್ರಾಂಚೈಸಿಯ ಮುಖ್ಯ ತರಬೇತುದಾರ ಅಮೆರಿಕದಲ್ಲಿ ಸಂಜು ಅವರನ್ನು ಭೇಟಿಯಾದರು ಎಂದು ವರದಿಯಾಗಿದೆ. ಅವರ ನಡುವೆ ಸಕಾರಾತ್ಮಕ ಚರ್ಚೆಗಳು ನಡೆದಂತೆ ತೋರುತ್ತದೆ. ಎಲ್ಲವೂ ಯೋಜನೆಯಂತೆ ನಡೆದು ಸಂಜು ಅವರೇನಾದರೂ ಸಿಎಸ್‌ಕೆಗೆ ಬಂದರೆ, ಅವರು ಸಾಮಾನ್ಯ ಆಟಗಾರನಾಗಿ ಮುಂದುವರಿಯುತ್ತಾರೋ ಅಥವಾ ರುತುರಾಜ್ ಅವರನ್ನು ಬದಲಾಯಿಸಿ ನಾಯಕತ್ವವನ್ನು ಅವರಿಗೆ ಹಸ್ತಾಂತರಿಸಲಾಗುತ್ತದೆಯೇ ಎಂಬುದು ಮಿಲಿಯನ್ ಡಾಲರ್ ಪ್ರಶ್ನೆಯಾಗಿದೆ.

ರುತುರಾಜ್ ಇದೀಗ ಧೋನಿ ನಾಯಕತ್ವದಲ್ಲಿ ನಾಯಕನಾಗಿ ತನ್ನನ್ನು ತಾನು ಸ್ಥಾಪಿಸಿಕೊಳ್ಳುತ್ತಿದ್ದಾರೆ. ಈ ಪರಿಸ್ಥಿತಿಯಲ್ಲಿ, ಸಿಎಸ್‌ಕೆ ಆಡಳಿತ ಮಂಡಳಿಯು ಸಂಜುಗಾಗಿ ಅವರನ್ನು ತ್ಯಾಗ ಮಾಡಲು ಸಿದ್ಧರಿಲ್ಲದಿರಬಹುದು. ಏನಾಗುತ್ತದೆ ಎಂದು ನೋಡೋಣ.

ಇದನ್ನೂ ಓದಿ: 7ನೇ ತರಗತಿ ವಿದ್ಯಾರ್ಥಿ ಆತ್ಮಹತ್ಯೆ ಕೇಸ್​ಗೆ ಟ್ವಿಸ್ಟ್​: ರೂಮಿನಲ್ಲಿ ಕಂಡ ಚಿತ್ರ ಹೇಳಿದ್ದೇನು? ಆಘಾತಕಾರಿ ಸಂಗತಿ ಬಯಲು! Student Death

ಇನ್ನು ಸಂಜು ಐಪಿಎಲ್​ ಪ್ರಯಾಣದ ವಿಚಾರಕ್ಕೆ ಬಂದರೆ, 2013ರಲ್ಲಿ ರಾಜಸ್ಥಾನ ರಾಯಲ್ಸ್ ತಂಡದೊಂದಿಗೆ ಐಪಿಎಲ್ ಪ್ರಯಾಣವನ್ನು ಪ್ರಾರಂಭಿಸಿದ ಸಂಜು, ಎರಡು ವರ್ಷಗಳ ಅಂತರದಲ್ಲಿ ತಮ್ಮ ಸಂಪೂರ್ಣ ಐಪಿಎಲ್ ವೃತ್ತಿಜೀವನವನ್ನು ಫ್ರಾಂಚೈಸಿಯೊಂದಿಗೆ ಮುಂದುವರಿಸಿದರು. ಅವರು 2019 ಮತ್ತು 2020 ರ ಋತುಗಳಲ್ಲಿ ಅದ್ಭುತ ಪ್ರದರ್ಶನ ನೀಡಿದರು ಮತ್ತು 2021 ರ ಋತುವಿನಲ್ಲಿ ರಾಯಲ್ಸ್ ತಂಡದ ನಾಯಕರಾಗಿ ಹೆಸರಿಸಲ್ಪಟ್ಟರು. ಸಂಜು ನಾಯಕತ್ವದಲ್ಲಿ, ತಂಡವು 2022 ರ ಋತುವಿನ ಫೈನಲ್ ತಲುಪಿತು.

2025ರ ಸೀಸನ್‌ಗೆ ಮೊದಲು ಬದಲಾವಣೆಗಳು ಮತ್ತು ಸೇರ್ಪಡೆಗಳ ಬಗ್ಗೆ ಮ್ಯಾನೇಜ್‌ಮೆಂಟ್ ಮತ್ತು ಸಂಜು ನಡುವೆ ಅಂತರವಿತ್ತು ಎಂದು ಹೇಳಲಾಗುತ್ತದೆ. ಸೀಸನ್ ಅಂತ್ಯದ ವೇಳೆಗೆ ಆ ಅಂತರವು ಉತ್ತುಂಗಕ್ಕೇರಿತು. ವಾಸ್ತವವಾಗಿ, ಸಂಜು ರಾಯಲ್ಸ್ ತೊರೆಯಲು ಬಲವಾಗಿ ಬಯಸಿದ್ದರು. ಈ ವಿಷಯದಲ್ಲಿ ಸಿಎಸ್‌ಕೆ ಅವರನ್ನು ಸಂಪರ್ಕಿಸಿದೆ ಎಂದು ತಿಳಿದುಬಂದಿದೆ.

ಐಪಿಎಲ್ 2026ರ ಹರಾಜು ನವೆಂಬರ್ ಅಂತ್ಯ ಅಥವಾ ಡಿಸೆಂಬರ್‌ನಲ್ಲಿ ನಡೆಯಲಿದೆ. ಬಿಸಿಸಿಐ ಫ್ರಾಂಚೈಸಿಗಳಿಗೆ ನವೆಂಬರ್​ವರೆಗೆ ಕಾಲಾವಕಾಶ ನೀಡಿದ್ದು, ಅವರು ಉಳಿಸಿಕೊಳ್ಳುವ ಮತ್ತು ಬಿಡುಗಡೆ ಮಾಡುವ ಆಟಗಾರರ ಪಟ್ಟಿಯನ್ನು ಸಲ್ಲಿಸಬೇಕಿದೆ. ಈ ಗಡುವಿನ ಮೊದಲು ರಾಜಸ್ಥಾನ ಸ್ಯಾಮ್ಸನ್ ಬಗ್ಗೆ ನಿರ್ಧಾರ ತೆಗೆದುಕೊಳ್ಳಲಿದೆ. ತಮ್ಮ ತಂಡದಲ್ಲಿ ಮುಂದುವರಿಯಲು ಸಂಜು ಅವರನ್ನು ಮನವೊಲಿಸಲು ಪ್ರಯತ್ನಿಸುತ್ತಾರೆಯೇ? ಅಥವಾ ಬೇರೆ ತಂಡಕ್ಕೆ ಹೋಗಲು ಬಿಡುತ್ತಾರೆಯೇ? ಇದು ನಿಜಕ್ಕೂ ಆಸಕ್ತಿದಾಯಕವಾಗಿದೆ. (ಏಜೆನ್ಸೀಸ್​)

https://www.vijayavani.net/sanju-samson-asks-to-be-released-by-rajasthan-royals-ahead-of-ipl-2026-auction

https://www.vijayavani.net/who-after-jasprit-bumrah-and-mohammed-siraj-is-indias-fast-bowling-assembly-line-drying-up