ಟಿ20 ವಿಶ್ವಕಪ್​ನಿಂದ ಐಸಿಸಿ ಜಾರಿಗೊಳಿಸಲಿದೆ ಹೊಸ ನಿಯಮ; ಏನಿದು ಸ್ಟಾಪ್​ ಕ್ಲಾಕ್​?

ನವದೆಹಲಿ: ಅಂತಾರಾಷ್ಟ್ರೀಯ ಏಕದಿನ ಮತ್ತು ಟಿ20 ಕ್ರಿಕೆಟ್​ನಲ್ಲಿ ಕಳೆದ ಡಿಸೆಂಬರ್​ನಿಂದ ಪ್ರಾಯೋಗಿಕವಾಗಿ ಜಾರಿಯಲ್ಲಿದ್ದ ಸ್ಟಾಪ್​ ಕ್ಲಾಕ್​ ನಿಯಮಾವಳಿಯನ್ನು ಜೂನ್​ನಿಂದ ಶಾಶ್ವತವಾಗಿ ಜಾರಿಗೊಳಿಸಲು ಅಂತಾರಾಷ್ಟ್ರೀಯ ಕ್ರಿಕೆಟ್​ ಕೌನ್ಸಿಲ್​ (ಐಸಿಸಿ) ನಿರ್ಧರಿಸಿದೆ. ಜೂನ್​ನಲ್ಲಿ ಅಮೆರಿಕ&ವೆಸ್ಟ್​ ಇಂಡೀಸ್​ ಜಂಟಿ ಆತಿಥ್ಯದಲ್ಲಿ ನಡೆಯಲಿರುವ ಟಿ20 ವಿಶ್ವಕಪ್​ನಿಂದ ಈ ನಿಯಮ ಜಾರಿಗೆ ಬರಲಿದೆ.

ಸ್ಟಾಪ್​ ಕ್ಲಾಕ್​ ನಿಯಮದ ಅನ್ವಯ ಪ್ರತಿ ಓವರ್​ ನಡುವೆ 60 ಸೆಕೆಂಡ್​ಗಳ ಕೌಂಟ್​ಡೌನ್​ ಇರುತ್ತದೆ. ಈ ಕೌಂಟ್​ಡೌನ್​ ಸೊನ್ನೆಯನ್ನು ತಲುಪುವ ಮುನ್ನ ಮುಂದಿನ ಓವರ್​ ಆರಂಭಗೊಳ್ಳಬೇಕು. ಈ ಕೌಂಟ್​ಡೌನ್​ ಏಕದಿನ ಮತ್ತು ಟಿ20 ಪಂದ್ಯಗಳ ಪ್ರತಿ ಓವರ್​ಗಳ ನಡುವೆ ಇರುತ್ತದೆ. ಇದನ್ನು ಉಲ್ಲಂಘಿಸಿದರೆ ಮೊದಲ 2 ಸಲ ಎಚ್ಚರಿಕೆ ನೀಡಲಾಗುತ್ತದೆ. 3ನೇ ಬಾರಿ 5 ರನ್​ ದಂಡ ವಿಧಿಸಲಾಗುತ್ತದೆ. ಪಂದ್ಯದ ನಡುವೆ ಸಮಯ ವ್ಯರ್ಥವಾಗುವುದನ್ನು ತಪ್ಪಿಸಲು ಈ ನಿಯಮ ಜಾರಿಗೊಳಿಸಲಾಗಿದೆ.

ಪ್ರತಿ ಓವರ್​ ನಡುವೆ ಕ್ರೀಡಾಂಗಣದ ದೈತ್ಯಪರದೆಯಲ್ಲಿ 60 ಸೆಕೆಂಡ್​ಗಳ ಎಲೆಕ್ಟ್ರಾನಿಕ್​ ಸ್ಟಾಪ್​ ಕ್ಲಾಕ್​ ತೋರಿಸಲಾಗುತ್ತದೆ. ಇದರ ಉಲ್ಲಂನೆ ಆದಾಗ ಅದರ ವಿರುದ್ಧ ಕ್ರಮ ತೆಗೆದುಕೊಳ್ಳುವ ಅಧಿಕಾರ ಮೈದಾನದ ಅಂಪೈರ್​ಗೆ ಇರುತ್ತದೆ. ಜತೆಗೆ ಬ್ಯಾಟರ್​, ಬೌಲರ್​, ಫೀಲ್ಡರ್ಸ್​ ಅಥವಾ ಬೇರೆ ಯಾರಿಂದಾಗಿ ಈ ವಿಳಂಬ ಆಯಿತು ಎಂದೂ ಅವರು ನಿರ್ಧರಿಸಬೇಕಾಗುತ್ತದೆ.

"ಸ್ಟಾಪ್​ ಕ್ಲಾಕ್​ ಅನ್ನು 2024ರ ಏಪ್ರಿಲ್​ವರೆಗೆ ಪ್ರಾಯೋಗಿಕವಾಗಿ ಅಳವಡಿಸಿಕೊಳ್ಳಲು ನಿರ್ಧರಿಸಲಾಗಿತ್ತು. ಆದರೆ ಇದರ ಸಕಾರಾತ್ಮಕ ಲಿತಾಂಶ ಈಗಾಗಲೆ ಬಂದಿದ್ದು, ಪಂದ್ಯಗಳು ಸರಿಯಾದ ಸಮಯದಲ್ಲಿ ಮುಕ್ತಾಯ ಕಾಣುತ್ತಿವೆ. ಪ್ರತಿ ಏಕದಿನ ಪಂದ್ಯದಲ್ಲೂ ಸುಮಾರು 20 ನಿಮಿಷ ಉಳಿಕೆಯಾಗುತ್ತಿದೆ' ಎಂದು ಐಸಿಸಿ ತಿಳಿಸಿದೆ.

https://www.vijayavani.net/rcb-name-will-change-rishabh-shetty-gave-a-hint