VIDEO: ಬದಲಾಗಲಿದೆ ಆರ್​ಸಿಬಿ ಹೆಸರು! ಸುಳಿವು ಬಿಟ್ಟುಕೊಟ್ಟರು ರಿಷಬ್​ ಶೆಟ್ಟಿ!

ಬೆಂಗಳೂರು: ಅಭಿಮಾನಿಗಳ ಬಹುವರ್ಷಗಳ ಬೇಡಿಕೆಯನ್ನು ಆರ್​ಸಿಬಿ ತಂಡ ಕೊನೆಗೂ ಈಡೇರಿಸಲು ಮುಂದಾಗಿದೆ. ಇಂಗ್ಲಿಷ್​ನಲ್ಲಿ "ರಾಯಲ್​ ಚಾಲೆಂಜರ್ಸ್​ ಬ್ಯಾಂಗಲೋರ್​' (Bangalore) ಎಂದಿರುವ ತಂಡದ ಹೆಸರು ಇನ್ನು ಮುಂದೆ "ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು' (Bengaluru) ಎಂದು ಬದಲಾಗುವ ನಿರೀಕ್ಷೆ ಹರಡಿದೆ. ಆರ್​ಸಿಬಿ ತಂಡ ಸಾಮಾಜಿಕ ಜಾಲತಾಣದಲ್ಲಿ ಬುಧವಾರ ಪ್ರಕಟಿಸಿರುವ ವಿಶೇಷ ವಿಡಿಯೋದಲ್ಲಿ ಕಾಣಿಸಿಕೊಂಡಿರುವ ಸ್ಯಾಂಡಲ್​ವುಡ್​ ನಟ ರಿಷಬ್​ ಶೆಟ್ಟಿ ಈ ಬಗ್ಗೆ ಸುಳಿವು ಬಿಟ್ಟುಕೊಟ್ಟಿದ್ದಾರೆ. ಮಾರ್ಚ್​ 19ರಂದು ಬೆಂಗಳೂರಿನ ಎಂ. ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ನಡೆಯಲಿರುವ ಆರ್​ಸಿಬಿ ಅನ್​ಬಾಕ್ಸ್​ ಕಾರ್ಯಕ್ರಮದಲ್ಲಿ ಈ ಬಗ್ಗೆ ಅಧಿಕೃತ ಘೋಷಣೆ ಹೊರಬೀಳುವ ನಿರೀಕ್ಷೆ ಇದೆ. ಆದರೆ "ಆರ್​ಸಿಬಿ' ಎಂಬ ಶಾರ್ಟ್​ನೇಮ್​ ಹಾಗೆಯೇ ಇರಲಿದೆ.

ಆರ್​ಸಿಬಿ ತಂಡದ ಪ್ರೋಮೋ ವಿಡಿಯೋದಲ್ಲಿ ರಿಷಬ್​ ಶೆಟ್ಟಿ, ಕಂಬಳದ ಮೂರು ಕೋಣಗಳ ಬಳಿ "ಕಾಂತಾರ' ಸ್ಟೈಲ್​ನಲ್ಲಿ ಬರುತ್ತಾರೆ. ರಾಯಲ್​, ಚಾಲೆಂಜರ್ಸ್​ ಮತ್ತು ಬ್ಯಾಂಗಲೋರ್​ ಎಂದು ಬರೆದ ಕೆಂಪು ಬಟ್ಟೆ ಕೋಣಗಳ ಮೇಲಿರುತ್ತದೆ. ಈ ಪೈಕಿ "ಬ್ಯಾಂಗಲೋರ್​' ಎಂದು ಬರೆದಿರುವ ಕೋಣದ ಬಳಿ ಬಂದು ರಿಷಬ್​ ಅದನ್ನು ಅಲ್ಲಿಂದ ಹೋಗುವಂತೆ ಸೂಚಿಸುತ್ತಾರೆ. ನಂತರ "ಅರ್ಥ ಆಯ್ತಾ?' ಎಂದು ವೀಕ್ಷಕರ ಕಡೆ ತಿರುಗಿ ಪ್ರಶ್ನೆ ಹಾಕುತ್ತಾರೆ. ಈ ಮೂಲಕ ಬ್ಯಾಂಗಲೋರ್​ ಇನ್ನು ಬೆಂಗಳೂರು ಆಗಲಿದೆ ಎಂಬ ಸುಳಿವು ನೀಡಿದ್ದಾರೆ.

ಐಪಿಎಲ್​ ಆರಂಭಗೊಂಡು 16 ವರ್ಷಗಳೇ ಕಳೆದಿದ್ದರೂ ಒಮ್ಮೆಯೂ ಪ್ರಶಸ್ತಿಗೆ ಮುತ್ತಿಕ್ಕದಿರುವ ಆರ್​ಸಿಬಿ ತಂಡ ಹೆಸರಿನಲ್ಲಿ ಸಣ್ಣ ಮಾರ್ಪಾಡುವ ಮಾಡಿಕೊಳ್ಳುವ ಮೂಲಕ ಅದೃಷ್ಟ ಖುಲಾಯಿಸುವ ಮತ್ತು ರಾಜ್ಯದ ಅಭಿಮಾನಿಗಳಿಗೆ ಮತ್ತಷ್ಟು ಹತ್ತಿರವಾಗುವ ತವಕದಲ್ಲಿದೆ.

ಇತರ ಲೀಗ್​ಗಳಲ್ಲಿ ಬೆಂಗಳೂರು ಇದೆ

ಐಪಿಎಲ್​ ಹೊರತಾಗಿ ಇತರ ಎಲ್ಲ ಕ್ರೀಡಾ ಲೀಗ್​ಗಳಲ್ಲಿ ಆಡುವ ಬೆಂಗಳೂರಿನ ತಂಡಗಳು ಈಗಾಗಲೆ ಇಂಗ್ಲಿಷ್​ನಲ್ಲಿ "ಬೆಂಗಳೂರು' ಎಂಬ ಹೆಸರನ್ನೇ ಹೊಂದಿವೆ. ಐಎಸ್​ಎಲ್​ನಲ್ಲಿ ಆಡುವ ಬೆಂಗಳೂರು ಎಫ್​ಸಿ, ಪ್ರೊ ಕಬಡ್ಡಿ ಲೀಗ್​ನಲ್ಲಿ ಆಡುವ ಬೆಂಗಳೂರು ಬುಲ್ಸ್​, ಪೆಮ್​ ವಾಲಿಬಾಲ್​ ಲೀಗ್​ನಲ್ಲಿ ಆಡುವ ಬೆಂಗಳೂರು ಟಾರ್ಪಿಡೋಸ್​, ಪ್ರೀಮಿಯರ್​ ಬ್ಯಾಡ್ಮಿಂಟನ್​ ಲೀಗ್​ನಲ್ಲಿ ಆಡುವ ಬೆಂಗಳೂರು ರ್ಯಾಪ್ಟರ್ಸ್​ ತಂಡಗಳು ಇಂಗ್ಲಿಷ್​ನಲ್ಲೂ 'Bengaluru' ಎಂಬ ಹೆಸರನ್ನೇ ಹೊಂದಿವೆ.

https://www.vijayavani.net/bajrang-punia-ravi-dahiya-eliminated-from-paris-olympics-qualification-race