ನವದೆಹಲಿ: ಪಾಕಿಸ್ತಾನದ ಆತಿಥ್ಯದಲ್ಲಿ ನಿಗದಿಯಾಗಿರುವ 2025ರ ಐಸಿಸಿ ಚಾಂಪಿಯನ್ಸ್ ಟ್ರೋಫಿಯನ್ನು ಏಕದಿನಕ್ಕೆ ಬದಲಾಗಿ ಟಿ20 ಕ್ರಿಕೆಟ್ ಪ್ರಕಾರದಲ್ಲಿ ಆಯೋಜಿಸುವ ಸಾಧ್ಯತೆ ಕಾಣಿಸಿದೆ. ಟೂರ್ನಿಯ ನೇರಪ್ರಸಾರ ಹಕ್ಕು ಹೊಂದಿರುವ ಡಿಸ್ನಿ-ಸ್ಟಾರ್ ಸಂಸ್ಥೆ, ಏಕದಿನಕ್ಕೆ ಬದಲಾಗಿ ಟಿ20 ಪ್ರಕಾರದಲ್ಲಿ ಟೂರ್ನಿ ಆಯೋಜಿಸುವಂತೆ ಐಸಿಸಿ ಮುಂದೆ ಬೇಡಿಕೆ ಇಟ್ಟಿದೆ. ಏಕದಿನ ಕ್ರಿಕೆಟ್ ಮಾದರಿಯ ಕುಸಿಯುತ್ತಿರುವ ಜನಪ್ರಿಯತೆ ಮತ್ತು ಟಿ20ಗಿಂತ ಕಡಿಮೆ ಆರ್ಥಿಕ ಲಾಭದಾಯಕವಾಗಿರುವುದನ್ನು ಇದು ಸೂಚಿಸುತ್ತಿದೆ.
ಹಾಲಿ ವೇಳಾಪಟ್ಟಿಯ ಪ್ರಕಾರ ಐಸಿಸಿ, 2025 ಮತ್ತು 2029ರಲ್ಲಿ ಚಾಂಪಿಯನ್ಸ್ ಟ್ರೋಫಿ ಮತ್ತು 2024, 2026, 2028, 2030ರಲ್ಲಿ ಟಿ20 ವಿಶ್ವಕಪ್ ನಿಗದಿಪಡಿಸಿದೆ. ಜತೆಗೆ 2027ರಲ್ಲಿ ದಕ್ಷಿಣ ಆಫ್ರಿಕಾ-ಜಿಂಬಾಬ್ವೆ ಹಾಗೂ 2031ರಲ್ಲಿ ಭಾರತ-ಬಾಂಗ್ಲಾದಲ್ಲಿ ಏಕದಿನ ವಿಶ್ವಕಪ್ ನಿಗದಿಪಡಿಸಿದೆ. ಚಾಂಪಿಯನ್ಸ್ ಟ್ರೋಫಿಯೂ ಟಿ20 ಟೂರ್ನಿಯಾಗಿ ಬದಲಾದರೆ, ಮುಂದಿನ 4 ವರ್ಷ ಅಂದರೆ 2027ರವರೆಗೆ ಐಸಿಸಿಯ ಯಾವುದೇ ಏಕದಿನ ಟೂರ್ನಿ ಇಲ್ಲದಂತಾಗುತ್ತದೆ. 2024ರಿಂದ 2027ರವರೆಗಿನ 4 ವರ್ಷಗಳ ಅವಧಿಗೆ ಭಾರತೀಯ ಮಾರುಕಟ್ಟೆಯಲ್ಲಿ ಐಸಿಸಿ ಟೂರ್ನಿಗಳನ್ನು ನೇರಪ್ರಸಾರ ಮಾಡುವ ಹಕ್ಕನ್ನು 25 ಸಾವಿರ ಕೋಟಿ ರೂ.ಗಳಿಗೆ ಪಡೆದುಕೊಂಡಿರುವ ಡಿಸ್ನಿ-ಸ್ಟಾರ್, ಏಕದಿನಕ್ಕಿಂತ ಟಿ20 ಟೂರ್ನಿ ಲಾಭದಾಯಕವೆಂದು ಪರಿಗಣಿಸಿದೆ.
ಹಾಲಿ ವಿಶ್ವಕಪ್ನಲ್ಲಿ ಅಗ್ರ 8 ಸ್ಥಾನ ಪಡೆದ ತಂಡಗಳಿಗೆ ಚಾಂಪಿಯನ್ಸ್ ಟ್ರೋಫಿ ಅರ್ಹತೆ ನೀಡಲಾಗುತ್ತಿದೆ. ಆದರೆ, ಇದು ಟಿ20 ಟೂರ್ನಿಯಾದರೆ, ಏಕದಿನದ ನಿರ್ವಹಣೆ ಆಧಾರದಲ್ಲಿ ಟಿ20 ಟೂರ್ನಿಗೆ ಅರ್ಹತೆ ನೀಡುವ ಮಾನದಂಡ ಟೀಕೆಗೆ ಗುರಿಯಾಗಲಿದೆ.
