ವಿಶ್ವ ನಂ. 1 ಪಟ್ಟಕ್ಕೇರಿದ ಗಿಲ್​, ಸಿರಾಜ್; ​ಐಸಿಸಿ ಏಕದಿನ ರ‍್ಯಾಂಕಿಂಗ್​ನಲ್ಲಿ ಭಾರತೀಯರ ಪಾರುಪತ್ಯ!

ಬೆಂಗಳೂರು: ತವರಿನ ಏಕದಿನ ವಿಶ್ವಕಪ್​ನಲ್ಲಿ ಟೀಮ್​ ಇಂಡಿಯಾ ಸತತ 8 ಗೆಲುವಿನೊಂದಿಗೆ ಅಜೇಯವಾಗಿ ಮುನ್ನುಗ್ಗುತ್ತಿರುವ ನಡುವೆ ಐಸಿಸಿ ರ‍್ಯಾಂಕಿಂಗ್​ನಲ್ಲೂ ಭಾರತೀಯರು ಪಾರುಪತ್ಯ ಸಾಧಿಸಿದ್ದಾರೆ. ಐಸಿಸಿ ಏಕದಿನ ಬ್ಯಾಟಿಂಗ್ ರ‍್ಯಾಂಕಿಂಗ್​ನಲ್ಲಿ ಆರಂಭಿಕ ಶುಭಮಾನ್​ ಗಿಲ್​ ಮೊಟ್ಟಮೊದಲ ಬಾರಿಗೆ ಅಗ್ರಸ್ಥಾನಕ್ಕೇರಿದ ಸಾಧನೆ ಮಾಡಿದ್ದರೆ, ಬೌಲಿಂಗ್​ ರ‍್ಯಾಂಕಿಂಗ್​ನಲ್ಲಿ ವೇಗಿ ಮೊಹಮದ್​ ಸಿರಾಜ್​ ವಿಶ್ವ ನಂ. 1 ಪಟ್ಟಕ್ಕೆ ಮರಳಿದ್ದಾರೆ. ಇಬ್ಬರೂ ಪಾಕಿಸ್ತಾನದ ಆಟಗಾರರನ್ನು ಹಿಮ್ಮೆಟ್ಟಿಸಿ ಈ ಸಾಧನೆ ಮಾಡಿರುವುದು ವಿಶೇಷವಾಗಿದೆ.

ವಿಶ್ವಕಪ್​ ಶುರುವಾದ ಆರಂಭದಲ್ಲೇ ಗಿಲ್​ ನಂ. 1 ಪಟ್ಟಕ್ಕೇರುವ ಅವಕಾಶ ಹೊಂದಿದ್ದರು. ಆದರೆ ಡೆಂಘೆ ಜ್ವರದಿಂದ ಆರಂಭಿಕ 2 ಪಂದ್ಯ ತಪ್ಪಿಸಿಕೊಂಡಿದ್ದರಿಂದ ಅವರಿಗೆ ಹಿನ್ನಡೆಯಾಗಿತ್ತು. ಶ್ರೀಲಂಕಾ ವಿರುದ್ಧದ ಪಂದ್ಯದಲ್ಲಿ 92 ರನ್​ ಸಿಡಿಸಿದ ಸಾಧನೆಯಿಂದ 24 ವರ್ಷದ ಗಿಲ್​ (830 ಅಂಕ) ಕೊನೆಗೂ ಪಾಕಿಸ್ತಾನದ ನಾಯಕ ಬಾಬರ್​ ಅಜಮ್​ರನ್ನು (824 ಅಂಕ) ಹಿಂದಿಕ್ಕಿ ಅಗ್ರಸ್ಥಾನವನ್ನು ಅಲಂಕರಿಸಿದ್ದಾರೆ. ಕಳೆದ ಎರಡೂವರೆ ವರ್ಷಕ್ಕೂ (951 ದಿನ) ಅಧಿಕ ಸಮಯದಿಂದ ಅಗ್ರಸ್ಥಾನದಲ್ಲಿದ್ದ ಬಾಬರ್​ ಈಗ 2ನೇ ಸ್ಥಾನಕ್ಕೆ ಕುಸಿದಿದ್ದಾರೆ.

ಗಿಲ್​ ವಿಶ್ವಕಪ್​ನಲ್ಲಿ ಇದುವರೆಗೆ ಆಡಿದ 6 ಇನಿಂಗ್ಸ್​ಗಳಿಂದ 219 ರನ್​ ಕಲೆಹಾಕಿದ್ದರೆ, ಬಾಬರ್​ 8 ಇನಿಂಗ್ಸ್​ಗಳಿಂದ 282 ರನ್​ ಕಲೆಹಾಕಿದ್ದಾರೆ. ಗಿಲ್​ ಹಾಲಿ ವರ್ಷ ಆಡಿರುವ 26 ಏಕದಿನ ಪಂದ್ಯಗಳಲ್ಲಿ 4 ಶತಕಗಳ (1 ದ್ವಿಶತಕ) ಸಹಿತ 63ರ ಸರಾಸರಿಯಲ್ಲಿ 1,449 ರನ್​ ಬಾರಿಸಿದ್ದಾರೆ.

ಕೊಹ್ಲಿಗೂ ಬಡ್ತಿ: ದಕ್ಷಿಣ ಆಫ್ರಿಕಾ ವಿರುದ್ಧ ಕೋಲ್ಕತದಲ್ಲಿ 49ನೇ ಶತಕ ಸಿಡಿಸಿ ವಿಜೃಂಭಿಸಿದ ವಿರಾಟ್​ ಕೊಹ್ಲಿ ಕೂಡ ರ‍್ಯಾಂಕಿಂಗ್​ನಲ್ಲಿ ಬಡ್ತಿ ಪಡೆದಿದ್ದು, 4ನೇ ಸ್ಥಾನಕ್ಕೇರಿದ್ದಾರೆ. ನಾಯಕ ರೋಹಿತ್​ ಶರ್ಮ 6ನೇ ಸ್ಥಾನಕ್ಕೇರಿದ್ದಾರೆ. ವಿಶ್ವಕಪ್​ನ ಟಾಪ್​ ಸ್ಕೋರರ್​ ದಕ್ಷಿಣ ಆಫ್ರಿಕಾ ಕ್ವಿಂಟನ್​ ಡಿಕಾಕ್​ 3ನೇ ಸ್ಥಾನದಲ್ಲಿದ್ದಾರೆ.

ಅಗ್ರಸ್ಥಾನಕ್ಕೆ ಮರಳಿದ ಸಿರಾಜ್​

ವಿಶ್ವಕಪ್​ನಲ್ಲಿ ಇದುವರೆಗೆ 10 ವಿಕೆಟ್​ ಕಬಳಿಸಿರುವ ಮೊಹಮದ್​ ಸಿರಾಜ್​ ಕೆಲ ವಾರಗಳ ಬಳಿಕ ಮತ್ತೆ ವಿಶ್ವ ನಂ. 1 ಬೌಲರ್​ ಪಟ್ಟಕ್ಕೆ ಮರಳಿದ್ದಾರೆ. ಪಾಕಿಸ್ತಾನದ ವೇಗಿ ಶಹೀನ್​ ಷಾ ಅಫ್ರಿದಿ ಅವರನ್ನು ಹಿಂದಿಕ್ಕಿ ಸಿರಾಜ್​ ಈ ಸಾಧನೆ ಮಾಡಿದ್ದಾರೆ. ಕಳೆದ ವಾರ 3ನೇ ಸ್ಥಾನಕ್ಕೆ ಕುಸಿದಿದ್ದ ಸಿರಾಜ್​, ಲಂಕಾ-ಆಫ್ರಿಕಾ ವಿರುದ್ಧದ ಪಂದ್ಯಗಳಲ್ಲಿ ಒಟ್ಟು 4 ವಿಕೆಟ್​ ಕಬಳಿಸಿದ ಸಾಧನೆಯಿಂದ ಅಗ್ರಸ್ಥಾನಕ್ಕೆ ಮರಳಿದ್ದರೆ, ಅಫ್ರಿದಿ 5ನೇ ಸ್ಥಾನಕ್ಕಿಳಿದಿದ್ದಾರೆ. ಸ್ಪಿನ್ನರ್​ಗಳಾದ ಕೇಶವ್​ ಮಹಾರಾಜ್​, ಆಡಂ ಜಂಪಾ ಮತ್ತು ಕುಲದೀಪ್​ ಯಾದವ್​ ಕ್ರಮವಾಗಿ 2, 3, 4ನೇ ಸ್ಥಾನದಲ್ಲಿದ್ದಾರೆ. ಜಸ್​ಪ್ರೀತ್​ ಬುಮ್ರಾ 8 ಮತ್ತು ಮೊಹಮದ್​ ಶಮಿ 10ನೇ ಸ್ಥಾನಕ್ಕೇರಿದ್ದು, ಅಗ್ರ 10ರಲ್ಲಿ ಭಾರತದ ನಾಲ್ವರು ಬೌಲರ್​ಗಳು ಸ್ಥಾನ ಪಡೆದಂತಾಗಿದೆ.

4: ಶುಭಮಾನ್​ ಗಿಲ್​ ಏಕದಿನ ರ‍್ಯಾಂಕಿಂಗ್​ನಲ್ಲಿ ನಂ. 1 ಪಟ್ಟಕ್ಕೇರಿದ 4ನೇ ಭಾರತೀಯ ಬ್ಯಾಟರ್​ ಆಗಿದ್ದಾರೆ. ಸಚಿನ್​ ತೆಂಡುಲ್ಕರ್​, ಎಂಎಸ್​ ಧೋನಿ, ವಿರಾಟ್​ ಕೊಹ್ಲಿ ಮೊದಲ ಮೂವರು.

41: ಶುಭಮಾನ್​ ಗಿಲ್​ (41 ಇನಿಂಗ್ಸ್​) ಐಸಿಸಿ ಏಕದಿನ ಬ್ಯಾಟಿಂಗ್​ ರ‍್ಯಾಂಕಿಂಗ್​ನಲ್ಲಿ ನಂ. 1 ಪಟ್ಟಕ್ಕೇರಿದ ಭಾರತದ 2ನೇ ಅತಿವೇಗದ ಸಾಧಕರಾಗಿದ್ದಾರೆ. ಎಂಎಸ್​ ಧೋನಿ 38 ಇನಿಂಗ್ಸ್​ಗಳಲ್ಲೇ ಈ ಸಾಧನೆ ಮಾಡಿದ್ದು ದಾಖಲೆ.

*ನಂ. 1 ಭಾರತೀಯರು

ಏಕದಿನ ಬ್ಯಾಟಿಂಗ್​: ಶುಭಮಾನ್​ ಗಿಲ್​

ಏಕದಿನ ಬೌಲಿಂಗ್​: ಮೊಹಮದ್​ ಸಿರಾಜ್​

ಟಿ20 ಬ್ಯಾಟಿಂಗ್​: ಸೂರ್ಯಕುಮಾರ್​

ಟೆಸ್ಟ್​ ಬೌಲಿಂಗ್​: ಆರ್​. ಅಶ್ವಿನ್​

ಟೆಸ್ಟ್​ ಆಲ್ರೌಂಡರ್​: ರವೀಂದ್ರ ಜಡೇಜಾ

ಟೆಸ್ಟ್​, ಏಕದಿನ, ಟಿ20 ತಂಡ ರ‍್ಯಾಂಕಿಂಗ್​: ಭಾರತ

https://www.vijayavani.net/hyderabad-t20-between-india-and-australia-to-shift-bengaluru