ಪಾಕಿಸ್ತಾನ ವಿರುದ್ಧದ ಸೋಲಿನ ನೋವಿಗೆ 14 ವರ್ಷಗಳ ಬಳಿಕ ಸೇಡು ತೀರಿಸಿಕೊಂಡ ಸೌರಭ್​!

ನ್ಯೂಯಾರ್ಕ್​: ವಿಶ್ವದ ದೊಡ್ಡಣ ಅಮೆರಿಕದಲ್ಲಿ ನಡೆಯುತ್ತಿರುವ ಟಿ20 ವಿಶ್ವಕಪ್ ಕ್ರಿಕೆಟ್ ಪ್ರೇಮಿಗಳಿಗೆ ಫುಲ್ ಕಿಕ್ ನೀಡುತ್ತಿದೆ. ಜೂನ್ 01 ರಂದು ಆರಂಭವಾದ ಈ ಮೆಗಾ ಟೂರ್ನಮೆಂಟ್​ ಅದ್ಧೂರಿಯಾಗಿ ನಡೆಯುತ್ತಿದೆ. ಟಿ20 ವಿಶ್ವಕಪ್‌ನಲ್ಲಿ ನಂಬಲಾಗದ ಗೆಲುವುಗಳು ದಾಖಲಾಗುತ್ತಿವೆ. ಬಲಿಷ್ಠ ತಂಡಗಳಿಗೆ ಕ್ರಿಕೆಟ್​ ಶಿಶುಗಳು ತೀವ್ರ ಪೈಪೋಟಿ ನೀಡುತ್ತಿವೆ. ಮೆಗಾ ಟೂರ್ನಿಯ ಅಂಗವಾಗಿ ಜೂನ್​ 06ರಂದು ಅಮೆರಿಕ ಮತ್ತು ಪಾಕಿಸ್ತಾನ ತಂಡಗಳ ನಡುವೆ ಪಂದ್ಯ ನಡೆಯಿತು. ಈ ಪಂದ್ಯದಲ್ಲಿ ಆತಿಥೇಯ ಅಮೆರಿಕ ತಂಡ ಪಾಕಿಸ್ತಾನವನ್ನು ಸೋಲಿಸಿತು. ಎಲ್ಲಾ ವಿಭಾಗಗಳಲ್ಲೂ ಉತ್ತಮ ಪ್ರದರ್ಶನ ನೀಡಿದ ಅಮೆರಿಕ, ಪಾಕಿಸ್ತಾನವನ್ನು ಸೂಪರ್​ ಓವರ್​ನಲ್ಲಿ ಸೋಲಿಸಿತು. ಯುವ ಕ್ರಿಕೆಟಿಗ ಸೌರಭ್ ನೇತ್ರವಾಲ್ಕರ್ ಅಮೆರಿಕದ ಯಶಸ್ಸಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು. ತಮ್ಮ ಬೌಲಿಂಗ್​ ದಾಳಿಯಿಂದ ಪಾಕಿಸ್ತಾನಕ್ಕೆ ಸೆಡ್ಡು ಹೊಡೆದು ಅಮೆರಿಕಕ್ಕೆ ಐತಿಹಾಸಿಕ ಜಯ ತಂದುಕೊಟ್ಟರು.

ಟಿ20 ವಿಶ್ವಕಪ್‌ನಲ್ಲಿ ಅಮೆರಿಕದ ಗೆಲುವಿನೊಂದಿಗೆ ಸೌರಭ್ ನೇತ್ರವಾಲ್ಕರ್ ಹೆಸರು ಕ್ರಿಕೆಟ್ ಲೋಕದಲ್ಲಿ ಹೆಚ್ಚು ಚರ್ಚೆಯಾಗುತ್ತಿದೆ. ನಿನ್ನೆಯ ಪಂದ್ಯದಲ್ಲಿ ನೇತ್ರವಾಲ್ಕರ್ ಮಿಂಚಿನಂತೆ ಬೌಲಿಂಗ್ ಮಾಡಿ ಪಾಕಿಸ್ತಾನವನ್ನು ಕಡಿಮೆ ಸ್ಕೋರ್​ಗೆ ಕಟ್ಟಿಹಾಕಿದರು. ನಿಗದಿತ 20 ಓವರ್‌ಗಳಲ್ಲಿ ಪಾಕಿಸ್ತಾನ ಮತ್ತು ಯುಎಸ್‌ಎ ತಂಡಗಳ ಸ್ಕೋರ್‌ಗಳು ಸಮವಾಗಿದ್ದವು. ಇದರಿಂದ ಸೂಪರ್ ಓವರ್ ಅನಿವಾರ್ಯವಾಯಿತು. ಸೂಪರ್ ಓವರ್‌ನಲ್ಲಿ ನೇತ್ರವಾಲ್ಕರ್ ಅವರ ಸೂಪರ್ ಬೌಲಿಂಗ್‌ನಿಂದ ಅಮೆರಿಕ ಪಾಕಿಸ್ತಾನವನ್ನು ಸೋಲಿಸಿ ಐತಿಹಾಸಿಕ ಗೆಲುವು ಸಾಧಿಸಿತು.

ಸೂಪರ್ ಓವರ್‌ನಲ್ಲಿ 19 ರನ್‌ಗಳ ಗುರಿಯೊಂದಿಗೆ ರಿಂಗ್‌ಗೆ ಬಂದ ನೇತ್ರವಾಲ್ಕರ್ ಒಂದು ವಿಕೆಟ್ ಪಡೆಯುವ ಮೂಲಕ ಪಾಕಿಸ್ತಾನವನ್ನು 13 ರನ್‌ಗಳಿಗೆ ಸೀಮಿತಗೊಳಿಸಿದರು. ಈ ಪಂದ್ಯದಲ್ಲಿ 04 ಓವರ್ ಬೌಲ್ ಮಾಡಿದ ನೇತ್ರವಾಲ್ಕರ್ 18 ರನ್ ನೀಡಿ ಪಾಕ್ ದಾಂಡಿಗರಾದ ರಿಜ್ವಾನ್ ಮತ್ತು ಇಫ್ತಿಕರ್ ಅಹ್ಮದ್ ಅವರ ವಿಕೆಟ್ ಪಡೆದರು. ತಮ್ಮ ಸಂವೇದನಾಶೀಲ ಬೌಲಿಂಗ್‌ನಿಂದ ನೇತ್ರವಾಲ್ಕರ್ ಹೆಚ್ಚು ಚರ್ಚೆಯಾದರು. ಇದೀಗ ನೇತ್ರವಾಲ್ಕರ್ ಯಾರು ಎಂದು ನೆಟಿಜನ್‌ಗಳು ಸಾಮಾಜಿಕ ಜಾಲತಾಣಗಳಲ್ಲಿ ಜಾಲಾಡುತ್ತಿದ್ದಾರೆ. ಆದರೆ, ಸೌರಭ್ ಮುಂಬೈ ಕ್ರಿಕೆಟಿಗ. ಅವರು ಈ ಹಿಂದೆ ಭಾರತಕ್ಕಾಗಿ ಅಂಡರ್-19 ವಿಶ್ವಕಪ್‌ನಲ್ಲಿ ಭಾಗವಹಿಸಿದ್ದರು.

ಸೌರಭ್ ಅವರನ್ನು 2010ರ ಅಂಡರ್-19 ವಿಶ್ವಕಪ್‌ಗೆ ಭಾರತ ಆಯ್ಕೆ ಮಾಡಿತ್ತು. ಸೌರಭ್ ಅಂಡರ್-19 ವಿಶ್ವಕಪ್‌ನಲ್ಲಿ 6 ಪಂದ್ಯಗಳಲ್ಲಿ 9 ವಿಕೆಟ್ ಪಡೆದರು. ಆಗ ಭಾರತ ಕ್ವಾರ್ಟರ್ ಫೈನಲ್‌ನಲ್ಲಿ ಪಾಕಿಸ್ತಾನದ ವಿರುದ್ಧ ಸೋತಿದ್ದರಿಂದ ಸೆಮಿಫೈನಲ್ ತಲುಪಲು ಸಾಧ್ಯವಾಗಲಿಲ್ಲ. ಆ ಪಂದ್ಯದಲ್ಲಿ ಭಾರತ ತಂಡ ಮೊದಲು ಬ್ಯಾಟ್​ ಮಾಡಿ 114 ರನ್ ಗಳಿಸಿತು. ಪಾಕಿಸ್ತಾನ 22.3 ಓವರ್‌ಗಳಲ್ಲಿ 8 ವಿಕೆಟ್ ಕಳೆದುಕೊಂಡು ಜಯಗಳಿಸಿತು. ಆಗ ನೇತ್ರವಾಲ್ಕರ್ 5 ಓವರ್​ಗಳಲ್ಲಿ 16 ರನ್ ನೀಡಿ ಒಂದು ವಿಕೆಟ್ ಪಡೆದಿದ್ದರು. ಅಂದು ಭಾರತವನ್ನು ಗೆಲ್ಲಿಸಲುನ ಸಾಧ್ಯವಾಗದ ಸೌರಭ್, 14 ವರ್ಷಗಳ ನಂತರ ಅಮೆರಿಕ ಪರ ಆಡಿ, ಪಾಕಿಸ್ತಾನವನ್ನು ಸೋಲಿಸುವ ಮೂಲಕ ಅಮೆರಿಕವನ್ನು ಗೆಲ್ಲಿಸಿದ್ದಾರೆ. ಆಗ ಪಾಕ್ ತಂಡದಲ್ಲಿ ಆಡಿದ್ದ ಬಾಬರ್ ಅಜಮ್ ಪ್ರಸ್ತುತ ಪಾಕಿಸ್ತಾನದ ನಾಯಕರಾಗಿದ್ದಾರೆ ಎಂಬುದು ಗಮನಾರ್ಹ.

ನೇತ್ರವಲ್ಕರ್ ಅವರು 1991, ಅಕ್ಟೋಬರ್ 16ರಂದು ಮುಂಬೈನಲ್ಲಿ ಜನಿಸಿದರು. ಕ್ರಿಕೆಟ್​ನಲ್ಲಿನ ಕಠಿಣ ಸ್ಪರ್ಧೆಯಿಂದಾಗಿ ಭಾರತದಲ್ಲಿ ತನ್ನ ಪ್ರತಿಭೆಯನ್ನು ಮತ್ತಷ್ಟು ಹೆಚ್ಚಿಸಿಕೊಳ್ಳಲು ಅವಕಾಶ ಸಿಗಲಿಲ್ಲ. ಹೀಗಾಗಿ 2015ರಲ್ಲಿ ಯುನೈಟೆಡ್ ಸ್ಟೇಟ್ಸ್ ಆಫ್ ಅಮೆರಿಕಗೆ ಬಂದು ನೆಲೆಸಿದರು. ಸುಮಾರು 9 ವರ್ಷಗಳ ನಂತರ ತಮ್ಮ ವೃತ್ತಿಜೀವನವನ್ನು ಮರು ಆರಂಭಿಸಿ, ಇದೀಗ ತಮ್ಮಿಷ್ಟದ ಕ್ರೀಡೆಯಲ್ಲಿ ಇತಿಹಾಸವನ್ನು ನಿರ್ಮಿಸಿದ್ದಾರೆ. ನೇತ್ರವಲ್ಕರ್ ಅವರು ಮುಂಬೈಗಾಗಿ ರಣಜಿ ಟ್ರೋಫಿ ಪಂದ್ಯವನ್ನು ಆಡಿದ್ದಾರೆ. ಭಾರತದ ಕ್ರಿಕೆಟ್​ ತಾರೆಗಳಾದ ಕೆ.ಎಲ್ ರಾಹುಲ್, ಮಯಾಂಕ್ ಅಗರ್ವಾಲ್, ಹರ್ಷಲ್ ಪಟೇಲ್, ಜಯದೇವ್ ಉನದ್ಕತ್ ಹಾಗೂ ಸಂದೀಪ್ ಶರ್ಮಾ ಅವರು ಟೀಮ್​ಮೇಟ್​ ಆಗಿದ್ದರು.

ನೇತ್ರವಲ್ಕರ್ ಅವರು ಕೇವಲ ಪ್ರತಿಭಾನ್ವಿತ ಕ್ರಿಕೆಟಿಗ ಮಾತ್ರವಲ್ಲದೆ ಅದ್ಭುತ ಇಂಜಿನಿಯರ್ ಕೂಡ ಆಗಿದ್ದಾರೆ. ಒರಾಕಲ್‌ನಲ್ಲಿ ಹಿರಿಯ ಸಾಫ್ಟ್‌ವೇರ್ ಇಂಜಿನಿಯರ್ ಆಗಿ ಕ್ರೀಡೆ ಮತ್ತು ತಮ್ಮ ವೃತ್ತಿಯಲ್ಲಿ ಸಮತೋಲನ ಕಾಯ್ದುಕೊಂಡಿದ್ದರು. ತಮ್ಮ ಸಂಸ್ಥೆಗಾಗಿ ಕೋಡಿಂಗ್ ಮಾಡುವುದು ಅವರ ಪ್ರಾಥಮಿಕ ಕೆಲಸವಾಗಿದೆ. ಆದರೆ, ಕ್ರಿಕೆಟ್​ ಮೇಲಿನ ಉತ್ಸಾಹ ಮತ್ತು ಇಂಜಿನಿಯರ್​ ಕೆಲಸ ಎರಡನ್ನೂ ನಿರ್ವಹಿಸುವುದು ಅತ್ಯಂತ ಸಂಕೀರ್ಣವಾದ ಕೆಲಸವಾಗಿ ಉಳಿಯಿತು. ಆದರೂ ಎರಡನ್ನೂ ತುಂಬಾ ಅದ್ಭುತವಾಗಿ ನಿಭಾಯಿಸಿದರು ಮತ್ತು ಪ್ರಸ್ತುತ ಅಮೆರಿಕದಲ್ಲಿ ನಡೆಯುತ್ತಿರುವ T20 ವಿಶ್ವಕಪ್‌ನಲ್ಲಿ ಅಮೆರಿಕ ಇತಿಹಾಸ ನಿರ್ಮಿಸುವಲ್ಲಿ ನೇತ್ರವಲ್ಕರ್​ ನಿರ್ಣಾಯಕ ಪಾತ್ರ ವಹಿಸಿದ್ದಾರೆ. (ಏಜೆನ್ಸೀಸ್​)

https://www.vijayavani.net/indian-born-oracle-software-engineer-leads-usa-to-victory-against-pakistan-in-t20-world-cup-2024

https://www.vijayavani.net/a-good-deed-by-elon-musk-but-a-villager-addicted-to-pornography