ಏಕದಿನ ವಿಶ್ವಕಪ್​ ವೇಳಾಪಟ್ಟಿಯಲ್ಲಿ ಮತ್ತೊಂದು ದೋಷ! ಈ ಬಾರಿ ಹೈದರಾಬಾದ್​ನಿಂದ ತಕರಾರು

ಹೈದರಾಬಾದ್​: ಅಹಮದಾಬಾದ್​ ಮತ್ತು ಕೋಲ್ಕತದಲ್ಲಿ ನಿಗದಿಯಾಗಿದ್ದ ಪಂದ್ಯಗಳಿಗೆ ಭದ್ರತಾ ಕಳವಳ ವ್ಯಕ್ತವಾದ ಹಿನ್ನೆಲೆಯಲ್ಲಿ ಏಕದಿನ ವಿಶ್ವಕಪ್​ ಟೂರ್ನಿಯ ವೇಳಾಪಟ್ಟಿಯನ್ನು ಐಸಿಸಿ ಇತ್ತೀಚೆಗಷ್ಟೇ ಬದಲಾಯಿಸಿತ್ತು. ಇದೀಗ ಟೂರ್ನಿಗೆ ಒಂದೂವರೆ ತಿಂಗಳಷ್ಟೇ ಬಾಕಿ ಉಳಿದಿರುವ ನಡುವೆ ಹೈದರಾಬಾದ್​ ಕ್ರಿಕೆಟ್​ ಸಂಸ್ಥೆಯೂ (ಎಚ್​ಸಿಎ) ವೇಳಾಪಟ್ಟಿಯ ಬಗ್ಗೆ ತಕರಾರು ಎತ್ತಿದ್ದು, ಅಕ್ಟೋಬರ್​ 9 ಮತ್ತು 10ರಂದು ಸತತ 2 ದಿನಗಳಲ್ಲಿ ಪಂದ್ಯ ಆಯೋಜಿಸುವುದು ಭದ್ರತಾ ದೃಷ್ಟಿಯಿಂದ ಸವಾಲೆನಿಸಿದೆ ಎಂದಿದೆ. ಇದರಿಂದಾಗಿ, ಅಕ್ಟೋಬರ್​ 5ರಂದು ಆರಂಭಗೊಳ್ಳಲಿರುವ ಟೂರ್ನಿಯ ವೇಳಾಪಟ್ಟಿಗೆ ಮತ್ತೆ ತಿದ್ದುಪಡಿ ಮಾಡಲಾಗುವುದೇ ಎಂಬ ಕುತೂಹಲ ಮೂಡಿದೆ.

ಬಹಳಷ್ಟು ತಡವಾಗಿ ಕಳೆದ ಜೂನ್​ನಲ್ಲಷ್ಟೇ ಐಸಿಸಿ, ವಿಶ್ವಕಪ್​ ವೇಳಾಪಟ್ಟಿ ಬಿಡುಗಡೆಗೊಳಿಸಿತ್ತು. ಬಳಿಕ ನವರಾತ್ರಿ, ಕಾಳಿ ಪೂಜೆ ಹಬ್ಬದ ಹಿನ್ನೆಲೆಯಲ್ಲಿ ಭಾರತ&ಪಾಕ್​ ಸಹಿತ ಒಟ್ಟು 9 ಪಂದ್ಯಗಳ ದಿನಾಂಕ&ಸಮಯ ಬದಲಾಯಿಸಿದ ಐಸಿಸಿ ಈ ತಿಂಗಳ ಆರಂಭದಲ್ಲಿ ಪರಿಷತ ವೇಳಾಪಟ್ಟಿ ಬಿಡುಗಡೆಗೊಳಿಸಿತ್ತು. ಈ ಬದಲಾದ ವೇಳಾಪಟ್ಟಿಯ ಅನ್ವಯ ಹೈದರಾಬಾದ್​ನಲ್ಲಿ ಅಕ್ಟೋಬರ್​ 12ರಂದು ನಿಗದಿಯಾಗಿದ್ದ ಪಾಕಿಸ್ತಾನ&ಶ್ರೀಲಂಕಾ ನಡುವಿನ ಪಂದ್ಯವನ್ನು ಅಕ್ಟೋಬರ್​ 10ಕ್ಕೆ ಮರುನಿಗದಿಗೊಳಿಸಲಾಗಿತ್ತು. ಆದರೆ ಇದಕ್ಕೆ ಮೊದಲೇ ಹೈದರಾಬಾದ್​ನಲ್ಲಿ ಅಕ್ಟೋಬರ್​ 9ರಂದು ನ್ಯೂಜಿಲೆಂಡ್​-ನೆದರ್ಲೆಂಡ್​ ನಡುವಿನ ಪಂದ್ಯ ನಿಗದಿಯಾಗಿತ್ತು. ಇದರಿಂದಾಗಿ ಸತತ 2 ದಿನಗಳಲ್ಲಿ ಪಂದ್ಯ ಆಯೋಜಿಸುವ ಸವಾಲು ಎದುರಿಸುತ್ತಿರುವ ಎಚ್​ಸಿಎಗೆ ಭದ್ರತಾ ಕಳವಳ ಉಂಟಾಗಿದೆ.

"ಖಂಡಿತವಾಗಿಯೂ ದಿನಾಂಕ ಬದಲಾವಣೆ ಮಾಡಬೇಕೇ ಎಂದು ಹೇಳಲಾರೆ. ಆದರೆ ಸತತ 2 ದಿನಗಳಲ್ಲಿ ಪಂದ್ಯ ಆಡುವುದು ಸರಿಯಲ್ಲ. ಈ ಬಗ್ಗೆ ಬಿಸಿಸಿಐ ಮರುಪರಿಶೀಲನೆ ನಡೆಸಿದರೆ ಉತ್ತಮ. ನಾವೂ ಭದ್ರತಾ ಸಂಸ್ಥೆಗಳೊಂದಿಗೆ ಮಾತುಕತೆಯಲ್ಲಿದ್ದೇವೆ. ಇದೇ ವೇಳೆ ನಮ್ಮ ಪರಿಸ್ಥಿತಿಯನ್ನು ಬಿಸಿಸಿಐಗೂ ವಿವರಿಸುತ್ತೇವೆ' ಎಂದು ಎಚ್​ಸಿಎ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಪ್ರತಿ ಅಂತಾರಾಷ್ಟ್ರೀಯ ಪಂದ್ಯಕ್ಕೆ ಹೈದರಾಬಾದ್​ ಪೊಲೀಸ್​ ಇಲಾಖೆ 2,000-2,500 ಸಿಬ್ಬಂದಿಯನ್ನು ಭದ್ರತೆಗೆ ನಿಯೋಜಿಸುತ್ತದೆ. ಆದರೆ ಈ ಪೈಕಿ ಒಂದು ಪಂದ್ಯದಲ್ಲಿ ಪಾಕಿಸ್ತಾನ ತಂಡವೂ ಆಡಲಿರುವುದರಿಂದ ಭದ್ರತೆ ಇನ್ನಷ್ಟು ಹೆಚ್ಚಾಗಲಿದೆ..

https://www.vijayavani.net/return-after-retirement-for-cricket-worldcup