ಇಂದಿನಿಂದ ಮಹಿಳೆಯರ ಟೆಸ್ಟ್​; ನವಿ ಮುಂಬೈನಲ್ಲಿ ಭಾರತ-ಇಂಗ್ಲೆಂಡ್​ ಮುಖಾಮುಖಿ

ಮುಂಬೈ: ಹರ್ಮಾನ್​ಪ್ರೀತ್​ ಕೌರ್​ ಸಾರಥ್ಯದ ಭಾರತದ ಮಹಿಳಾ ತಂಡ ಟೆಸ್ಟ್​ ಕ್ರಿಕೆಟ್​ ಸತ್ವಪರೀಕ್ಷೆಗೆ ಸಜ್ಜಾಗಿದ್ದು, ಗುರುವಾರದಿಂದ 4 ದಿನಗಳ ಕಾಲ ಪ್ರವಾಸಿ ಇಂಗ್ಲೆಂಡ್​ ವಿರುದ್ಧ ಏಕೈಕ ಟೆಸ್ಟ್​ ಪಂದ್ಯವನ್ನು ಆಡಲಿದೆ. ಭಾರತದಲ್ಲಿ 9 ವರ್ಷಗಳ ಬಳಿಕ ಮಹಿಳೆಯರ ಟೆಸ್ಟ್​ ಪಂದ್ಯ ನಡೆಯಲಿದೆ. ಪುರುಷರ ಟೆಸ್ಟ್​ನಂತೆ ಮಹಿಳಾ ಕ್ರಿಕೆಟ್​ನಲ್ಲೂ ಭಾರತ ಪ್ರವಾಸಿಗರನ್ನು ಸ್ಪಿನ್​ ಖೆಡ್ಡಾದಲ್ಲಿ ಬೀಳಿಸಲು ಪ್ರಯತ್ನಿಸಲಿದೆ.

ಭಾರತ ಮತ್ತು ಇಂಗ್ಲೆಂಡ್​ ಮಹಿಳಾ ತಂಡಗಳು 1986ರಿಂದ 14 ಟೆಸ್ಟ್​ ಪಂದ್ಯಗಳಲ್ಲಿ ಮುಖಾಮುಖಿಯಾಗಿವೆ. ಈ ಪೈಕಿ ಭಾರತ ಒಂದರಲ್ಲಿ ಸೋತಿದ್ದು, 2ರಲ್ಲಿ ಗೆದ್ದಿದೆ. ಉಳಿದ ಪಂದ್ಯಗಳು ಡ್ರಾಗೊಂಡಿವೆ. ಹರ್ಮಾನ್​ಪ್ರೀತ್​ ಕೌರ್​ ಇದೇ ಮೊದಲ ಬಾರಿಗೆ ಟೆಸ್ಟ್​ ಪಂದ್ಯದಲ್ಲಿ ಭಾರತ ತಂಡವನ್ನು ಮುನ್ನಡೆಸಲಿದ್ದಾರೆ. ನವಿ ಮುಂಬೈನ ಡಿವೈ ಪಾಟೀಲ್​ ಸ್ಟೇಡಿಯಂನಲ್ಲಿ ಪಂದ್ಯ ನಡೆಯಲಿದೆ.

ಕರ್ನಾಟಕದ ಎಡಗೈ ಆರಂಭಿಕ ಬ್ಯಾಟರ್​ ಶುಭಾ ಸತೀಶ್​ ಟೆಸ್ಟ್​ ಪದಾರ್ಪಣೆ ಅವಕಾಶ ಪಡೆಯುವ ನಿರೀಕ್ಷೆ ಇದೆ. ಟಿ20-ಏಕದಿನ ಅನುಭವಿಗಳಾದ ಜೆಮೀಮಾ ರೋಡ್ರಿಗಸ್​, ಹರ್ಲೀನ್​ ಡಿಯೋಲ್​ ಕೂಡ ಚೊಚ್ಚಲ ಟೆಸ್ಟ್​ ಅನುಭವದ ನಿರೀೆಯಲ್ಲಿದ್ದಾರೆ. ಈ ಪಂದ್ಯದೊಂದಿಗೆ ಇಂಗ್ಲೆಂಡ್​ ತಂಡ ಮಹಿಳಾ ಕ್ರಿಕೆಟ್​ನಲ್ಲಿ 100 ಟೆಸ್ಟ್​ ಆಡಿದ ಮೊದಲ ತಂಡವೆನಿಸಲಿದೆ.

2021ರಲ್ಲಿ ಬ್ರಿಸ್ಟಾಲ್​ನಲ್ಲಿ ಕೊನೆಯದಾಗಿ ಉಭಯ ತಂಡಗಳ ನಡುವೆ ಟೆಸ್ಟ್​ ಪಂದ್ಯ ನಡೆದಿತ್ತು. ಆ ಪಂದ್ಯದಲ್ಲಿ ಭಾರತ ರೋಚಕ ಡ್ರಾ ಸಾಧಿಸಿತ್ತು. ಸ್ಮೃತಿ ಮಂದನಾ ಮೊದಲ ಇನಿಂಗ್ಸ್​ನಲ್ಲಿ 78 ರನ್​ ಸಿಡಿಸಿ ಗಮನಸೆಳೆದಿದ್ದರೆ, ಶೆಫಾಲಿ ವರ್ಮ 96 ಮತ್ತು 63 ರನ್​ ಸಿಡಿಸಿ ಮಿಂಚಿದ್ದರು. ಭಾರತ ತಂಡ ಈ ಪಂದ್ಯದ ಬೆನ್ನಲ್ಲೇ ಪ್ರವಾಸ ಆಸ್ಟ್ರೆಲಿಯಾ ವಿರುದ್ಧವೂ ಡಿಸೆಂಬರ್​ 21ರಿಂದ 24ರವರೆಗೆ ವಾಂಖೆಡೆಯಲ್ಲಿ ಏಕೈಕ ಟೆಸ್ಟ್​ ಪಂದ್ಯವನ್ನು ಆಡಲಿದೆ.

ಭಾರತದಲ್ಲಿ ಈ ಮುನ್ನ 2014ರ ನವೆಂಬರ್​ನಲ್ಲಿ ಮೈಸೂರಿನಲ್ಲಿ ಕೊನೆಯದಾಗಿ ಮಹಿಳೆಯರ ಟೆಸ್ಟ್​ ಪಂದ್ಯ ನಡೆದಿತ್ತು. ದಕ್ಷಿಣ ಆಫ್ರಿಕಾ ವಿರುದ್ಧದ ಆ ಪಂದ್ಯದಲ್ಲಿ ಭಾರತ ಇನಿಂಗ್ಸ್​ ಮತ್ತು 34 ರನ್​ಗಳಿಂದ ಗೆದ್ದಿತ್ತು. ಮಿಥಾಲಿ ರಾಜ್​ ಮತ್ತು ಜೂಲನ್​ ಗೋಸ್ವಾಮಿ ನಿವೃತ್ತಿಯ ನಂತರ ಭಾರತ ಆಡುತ್ತಿರುವ ಮೊದಲ ಟೆಸ್ಟ್​ ಪಂದ್ಯವೂ ಇದಾಗಿದೆ.

ಆರಂಭ: ಬೆಳಗ್ಗೆ 9.30, ನೇರಪ್ರಸಾರ: ಜಿಯೋಸಿನಿಮಾ

https://www.vijayavani.net/india-retain-asia-cup-squad-as-uday-saharan-set-to-lead-in-u-19-world-cup