ಲಘುವಾಗಿ ಪರಿಗಣಿಸಿದ್ರೆ ಬೆಲೆ ತೆರಬೇಕಾಗುತ್ತೆ: ರೋಹಿತ್​ಗೆ ಎಚ್ಚರಿಕೆ ನೀಡಿದ ಹರ್ಭಜನ್​ ಸಿಂಗ್!​

ನವದೆಹಲಿ: ಟೀಮ್​ ಇಂಡಿಯಾ ಟಿ20 ವಿಶ್ವಕಪ್​ನಲ್ಲಿ ಸತತ ಗೆಲುವಿನೊಂದಿಗೆ ಸೂಪರ್-8 ಹಂತವನ್ನು ತಲುಪಿದೆ. ಗ್ರೂಪ್ ಹಂತದಲ್ಲಿ ಐರ್ಲೆಂಡ್, ಪಾಕಿಸ್ತಾನ, ಅಮೆರಿಕ ತಂಡಗಳನ್ನು ಮಣಿಸಿರುವ ರೋಹಿತ್ ಸೇನೆ ಸೂಪರ್ 8 ಕದನಕ್ಕೂ ಮುನ್ನ ಆತ್ಮವಿಶ್ವಾಸವನ್ನು ಹೆಚ್ಚಿಸಿಕೊಂಡಿದೆ. ಆದರೆ, ನಿಜವಾದ ಸವಾಲು ಇದೀಗ ಎದುರಾಗಲಿದೆ.

ಭಾರತ ತಂಡವು ಅಫ್ಘಾನಿಸ್ತಾನ, ಆಸ್ಟ್ರೇಲಿಯಾ ಮತ್ತು ಬಾಂಗ್ಲಾದೇಶದಂತಹ ಅಪಾಯಕಾರಿ ತಂಡಗಳನ್ನು ಸೂಪರ್​ 8 ಹಂತದಲ್ಲಿ ಎದುರಿಸಲಿದೆ. ಈ ಮೂರು ತಂಡಗಳು ವೆಸ್ಟ್ ಇಂಡೀಸ್ ಪಿಚ್‌ಗಳಲ್ಲಿ ಲೀಗ್ ಹಂತದ ಪಂದ್ಯಗಳನ್ನೂ ಆಡಿವೆ. ಇದರಿಂದಾಗಿ ಅಲ್ಲಿನ ಪಿಚ್​ಗಳಿಗೆ ಒಗ್ಗಿಕೊಂಡಿವೆ. ಆದರೆ, ಭಾರತ, ಅಮೆರಿಕ ಪಿಚ್​ಗಳಲ್ಲಿ ಗ್ರೂಪ್​ ಪಂದ್ಯಗಳನ್ನು ಆಡಿದವು. ಹೀಗಾಗಿ ವಿಂಡೀಸ್​ ಪಿಚ್​ಗಳಿಗೆ ಒಗ್ಗಿಕೊಳ್ಳಬೇಕಾಗಿದೆ. ಹೀಗಾಗಿ ಕಠಿಣ ಅಭ್ಯಾಸ ಮಾಡಿದೆ. ಗ್ರೂಪ್ ಹಂತದಲ್ಲಿ ನಿರಾಸೆ ಮೂಡಿಸಿರುವ ಟೀಮ್​ ಇಂಡಿಯಾದ ಬ್ಯಾಟಿಂಗ್ ಯೂನಿಟ್ ಇದೀಗ ಯಾವ ರೀತಿ ಪ್ರದರ್ಶನ ನೀಡಲಿದೆ ಎಂಬುದರ ಮೇಲೆ ಯಶಸ್ಸು ನಿಂತಿದೆ.

ಸೂಪರ್-8ರಲ್ಲಿ ನಿಜವಾದ ಪೈಪೋಟಿ ಇರುವುದು ಆಸ್ಟ್ರೇಲಿಯಾದ ಜೊತೆ. ಆಸಿಸ್​ ತಂಡ ತುಂಬಾ ಅಪಾಯಕಾರಿ ಎಂದು ಎಲ್ಲರೂ ಭಾವಿಸುತ್ತಾರೆ. ಕಾಂಗರೂಗಳನ್ನು ಸೋಲಿಸಿದರೆ, ಭಾರತಕ್ಕೆ ಟ್ರೋಫಿ ಖಚಿತ ಎನ್ನಲಾಗುತ್ತಿದೆ. ಆದರೆ, ಈ ಮೆಗಾ ಟೂರ್ನಿಯಲ್ಲಿ ಅಫ್ಘಾನಿಸ್ತಾನ ತಂಡ ಸೂಪರ್ ಫಾರ್ಮ್‌ನಲ್ಲಿದೆ. ಕೆರಿಬಿಯನ್ ಪಿಚ್ ಗಳನ್ನು ಬಳಸಿಕೊಂಡು ತಂಡದ ಸ್ಪಿನ್ನರ್​ಗಳು ಬಿರುಸಿನ ಬೌಲಿಂಗ್ ದಾಳಿ ಮಾಡುತ್ತಿದ್ದಾರೆ. ಆಫ್ಘಾನ್ ಬ್ಯಾಟ್ಸ್‌ಮನ್‌ಗಳು ಇಲ್ಲಿ ದೊಡ್ಡ ಸ್ಕೋರ್‌ಗಳನ್ನು ಬಾರಿಸುತ್ತಿದ್ದಾರೆ. ಹೀಗಾಗಿ ಆಫ್ಘಾನ್​ ಕೂಡ ಟೀಮ್​ ಇಂಡಿಯಾಗೆ ಬೆದರಿಕೆ ಆಗಬಹುದು ಎಂದು ಅನೇಕ ಕ್ರಿಕೆಟ್​ ಪರಿಣಿತರು ಹೇಳುತ್ತಾರೆ. ಅನುಭವಿ ಸ್ಪಿನ್ನರ್ ಹರ್ಭಜನ್ ಸಿಂಗ್ ಕೂಡ ಇದೇ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಅಫ್ಘಾನಿಸ್ತಾನವನ್ನು ಕಡಿಮೆ ಅಂದಾಜು ಮಾಡಬಾರದು. ತಂಡವನ್ನು ಲಘುವಾಗಿ ಪರಿಗಣಿಸಿದರೆ ಭಾರೀ ಬೆಲೆ ತೆರಬೇಕಾಗುತ್ತದೆ ಎಂದು ನಾಯಕ ರೋಹಿತ್ ಶರ್ಮಗೆ ಭಜ್ಜಿ ಎಚ್ಚರಿಕೆ ನೀಡಿದ್ದಾರೆ.

ಅಫ್ಘಾನಿಸ್ತಾನ ಉತ್ತಮ ತಂಡ. ಆ ತಂಡ ಉತ್ತಮವಾಗಿ ಆಡುತ್ತಿದೆ. ಅತಿ ಕಡಿಮೆ ಸಮಯದಲ್ಲಿ ತಂಡ ಎತ್ತರಕ್ಕೆ ಬೆಳೆದಿದೆ. ಅಫ್ಘಾನಿಸ್ತಾನ ತಂಡದಲ್ಲಿ ರಶೀದ್ ಖಾನ್, ಮೊಹಮ್ಮದ್ ನಬಿಯಂತಹ ಮ್ಯಾಚ್ ವಿನ್ನರ್‌ಗಳಿದ್ದಾರೆ. ಆ ತಂಡದ ಸ್ಪಿನ್ ದಾಳಿ ಅತ್ಯುತ್ತಮವಾಗಿದೆ. ಈ ಪಂದ್ಯಾವಳಿಯಲ್ಲಿ ಅಫ್ಘಾನಿಸ್ತಾನವು ಅಮೋಘವಾದ ಸ್ಪಿನ್ನರ್‌ಗಳನ್ನು ಹೊಂದಿದೆ. ಬ್ಯಾಟ್ಸ್‌ಮನ್‌ಗಳು ಯಾವುದೇ ದೊಡ್ಡ ತಂಡವನ್ನು ಸೋಲಿಸುವ ಸಾಮರ್ಥ್ಯವನ್ನು ಹೊಂದಿದ್ದಾರೆ. ಹೀಗಾಗಿ ಅವರನ್ನು ಕಡಿಮೆ ಅಂದಾಜು ಮಾಡಬೇಡಿ, ಅವರ ಜೊತೆ ಎಚ್ಚರಿಕೆಯಿಂದಿರಿ ಎಂದು ಭಜ್ಜಿ ಟೀಮ್​ ಇಂಡಿಯಾಗೆ ಸಲಹೆ ನೀಡಿದ್ದಾರೆ.

ಟೀಮ್​ ಇಂಡಿಯಾ ಇಂದು ಅಫ್ಘಾನಿಸ್ತಾನ ವಿರುದ್ಧ ಸೂಪರ್​ 8 ಹಂತದ ಮೊದಲ ಪಂದ್ಯವನ್ನು ಆಡಲಿದೆ. ಈ ಹಿನ್ನೆಲೆಯಲ್ಲಿ ಭಜ್ಜಿ ಈ ಹೇಳಿಕೆಯನ್ನು ನೀಡಿದ್ದಾರೆ. (ಏಜೆನ್ಸೀಸ್​)

https://www.vijayavani.net/rohit-not-kohli-he-is-the-key-for-team-india-in-super-8-fleming

https://www.vijayavani.net/amala-shaji-says-life-is-full-of-disappointments-and-setbacks-fans-will-always-support