ಕ್ರೀಡೆ

ಜಾವಗಲ್​ ಶ್ರೀನಾಥ್​ ಬರ್ತ್​ಡೇಗೆ ಶುಭಾಶಯಗಳ ಸುರಿಮಳೆ

srinath birthday51
vijayavani
Published on: 

ಬೆಂಗಳೂರು: ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ 551 ವಿಕೆಟ್​ ಸಂಪಾದಿಸಿರುವ ಭಾರತ ತಂಡದ ಮಾಜಿ ವೇಗದ ಬೌಲರ್​ ಹಾಗೂ ಕನ್ನಡಿಗ ಜಾವಗಲ್​ ಶ್ರೀನಾಥ್​ ಅವರಿಗೆ ಸೋಮವಾರ 51ನೇ ಜನ್ಮದಿನದ ಸಂಭ್ರಮ. ಈ ಹಿನ್ನೆಲೆಯಲ್ಲಿ ಅವರಿಗೆ ಅಭಿಮಾನಿಗಳು ಮತ್ತು ಕ್ರಿಕೆಟ್​ ವಲಯದಿಂದ ಶುಭಾಶಯಗಳ ಸುರಿಮಳೆಯಾಗಿದೆ.

ಬಿಸಿಸಿಐ ಟ್ವಿಟರ್​ ಖಾತೆಯಲ್ಲಿ ಶ್ರೀನಾಥ್​ ಜನ್ಮದಿನಕ್ಕೆ ಶುಭಾಶಯ ಹೇಳುವ ಜತೆಗೆ ಅವರ ಸಾಧನೆಗಳನ್ನೂ ಮೆಲುಕು ಹಾಕಲಾಗಿದೆ. ಭಾರತ ಪರ ಏಕದಿನ ಕ್ರಿಕೆಟ್​ನಲ್ಲಿ 300ಕ್ಕೂ ಅಧಿಕ ವಿಕೆಟ್​ ಕಬಳಿಸಿರುವ ಏಕೈಕ ವೇಗದ ಬೌಲರ್​ ಎಂಬ ಅವರ ಹೆಗ್ಗಳಿಕೆಯನ್ನೂ ಸ್ಮರಿಸಲಾಗಿದೆ.

ಶ್ರೀನಾಥ್ ಅವರ ಮಾಜಿ ಸಹ-ಆಟಗಾರ ಹಾಗೂ ಮಾಜಿ ಸ್ಪಿನ್ನರ್​ ಸುನೀಲ್​ ಜೋಶಿ ಅವರು ಕನ್ನಡದಲ್ಲೇ ಶುಭಾಶಯ ತಿಳಿಸಿದ್ದಾರೆ. 'ಹುಟ್ಟುಹಬ್ಬದ ಶುಭಾಶಯಗಳು ನನ್ನ ಸ್ನೇಹಿತರಾದ ಜಾವಗಲ್​ ಶ್ರೀನಾಥ್​ ಅವರಿಗೆ. ಭಾರತದ ಖ್ಯಾತ ವೇಗದ ಬೌಲರ್​ ಸಾಕಷ್ಟು ಕೀರ್ತಿಯನ್ನು ಭಾರತ ಮತ್ತು ಕರ್ನಾಟಕಕ್ಕೆ ಒದಗಿಸಿ ಕೊಟ್ಟಿದ್ದಾರೆ' ಎಂದು ಸುನೀಲ್​ ಜೋಶಿ ಬರೆದಿದ್ದಾರೆ.

ಶ್ರೀನಾಥ್​ ಸಮಕಾಲೀನ ಕರ್ನಾಟಕದ ಮತ್ತೋರ್ವ ಮಾಜಿ ವೇಗದ ಬೌಲರ್​ ದೊಡ್ಡ ಗಣೇಶ್​ ಅವರೂ ಟ್ವಿಟರ್​ನಲ್ಲಿ ಶುಭಾಶಯ ತಿಳಿಸಿದ್ದು, ಶ್ರೀನಾಥ್​ ನಿಜಕ್ಕೂ ದಿಗ್ಗಜ ಮತ್ತು ನನ್ನ ಅಣ್ಣ ಇದ್ದಂತೆ ಎಂದು ಬರೆದುಕೊಂಡಿದ್ದಾರೆ.

ಇದನ್ನೂ ಓದಿ: ಜಾವಗಲ್​ ಶ್ರೀನಾಥ್​ಗೆ ಇಂದು 51ನೇ ಜನ್ಮದಿನದ ಸಂಭ್ರಮ

ಹಾಲಿ ಐಸಿಸಿ ಮ್ಯಾಚ್​ ರೆಫ್ರಿಯೂ ಆಗಿರುವ ಶ್ರೀನಾಥ್​ ಅವರಿಗೆ ಐಸಿಸಿ ಟ್ವಿಟರ್​ ಖಾತೆಯಲ್ಲೂ ಶುಭಾಶಯ ತಿಳಿಸಲಾಗಿದ್ದು, ಅವರ ಸಾಧನೆಗಳನ್ನೂ ಮೆಲುಕು ಹಾಕಲಾಗಿದೆ. ಶ್ರೀನಾಥ್ ಅವರ ಸಾಕಷ್ಟು ಅಭಿಮಾನಿಗಳು ಕೂಡ ಸಾಮಾಜಿಕ ಜಾಲತಾಣಗಳಲ್ಲಿ ಶುಭಾಶಯಗಳ ಸುರಿಮಳೆ ಹರಿಸಿದ್ದಾರೆ. ಇದೇ ವೇಳೆ ಅವರ ವೆಸ್ಟ್​ ಇಂಡೀಸ್​ ವಿರುದ್ಧದ ಏಕದಿನ ಪಂದ್ಯದಲ್ಲಿ ಅವರ ಅದ್ಭುತ ಸ್ವಿಂಗ್​ ಎಸೆತವೊಂದರ ವಿಡಿಯೋ ಕೂಡ ವೈರಲ್​ ಆಗಿದೆ.

ಕ್ರಿಕೆಟ್​
ಶುಭಾಶಯ
ಬರ್ತ್​ಡೇ
ಬೌಲರ್​
ಜಾವಗಲ್​ ಶ್ರೀನಾಥ್​
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net